Read gen Efesòtɔwo 6 Bible Online

Efesòtɔwo 6 - gen bible

Efesòtɔwo 6

¹Đèviwo, mì sè ètonu na mìabe àjìtɔwo, lè Tɔhonɔ̀ mè. Ekèa ye sɔ̀gbè.

²Èse dodo cucugbã kè ŋuti fìãfìã bɔ̀ ɖoa ye nyi be: “Bù ètɔ wò ku ènɔ̀ wò,

³ne ènu ne nyɔ na wò, eye wòa nɔ̀ àgbè dìdi lè ànyigbãa ji.”

⁴Ètɔwo, mì mu gbà na mìabe èviwo ne jè àgla ò. Vɔ̀ bòhũa, mì hɛ̃ wo, àleke be woa teŋu le woa ɖokoewo, eye woa wɔ̀ ɖo ɖoɖo kèwo Tɔhonɔ̀ fiɔa ji.

⁵Sumɔviwo, mì sè ètonu na àpetɔ kèwo lè mìa si lè àgbè kèa mèa kudo vɔ̃vɔ̃, gbakudo bùbu, eye mì kɔ̀ èjì mè, sɔ sumɔ wo, sìgbè Kristò mì le sumɔ nène.

⁶Mì mu gbà wɔ̀ àmè ŋùkumènu kpò, be yèwoa jè ŋùmè na wo ò. Vɔ̀a, bòhũ sìgbè Kristò be sumɔ̃viwo nènea, mì wɔ̀ ènu kè Mawu jia so mìabe èjì mè ke.

⁷Mì kɔ̀ èjì mè ɖo èdɔwɔ̀wɔ ŋuti, sìgbè Tɔhonɔ̀ ye mì le wɔ̀ ɛ̀ na nène; mu nyi sìgbè na àgbètɔwo nène ò.

⁸Mì nya be Tɔhonɔ̀ la tu èfɛ̃ na àmè sia àmè, lè ènu nyuɛ̃ ɖe sia ɖe kè be wɔ̀a mè, ne e nyi kluvi, àlo àblɔ̀ɖèvi a.

⁹Àpetɔwo, mìawo cã mì wɔ̀ nènea ke na mìabe kluviwo, eye mì tɔtè vɔ̃vɔ̃ dodo na wo. Mì ɖo ŋùku e ji, be àmè kè nyi mìa kudo woa keŋu be Tɔhonɔ̀a lè jiŋùkusi. E yaa, mu kpɔna àmè ɖekpe be ŋùmè ò.

¹⁰Mɛmlɛ̃a, mì xɔ̀ mìabe ŋusɛ̃ so mìabe ɖèka wɔ̀wɔ kudo Tɔhonɔ̀a mè.

¹¹Mì kpla àhùawɔ̀nu kèwo keŋu Mawu sɔ na mìa, àleke be mìa teŋu sitè ɖo Legba be àyèmɔwo kpata ŋuti.

¹²Đo mu nyi àgbètɔwo mi le wɔ̀ àvũ kudo ò. Vɔ̀a kudo gbɔ̃gbɔ̃mè ŋusɛ̃wo, gbɔ̃gbɔ̃mè jiɖùɖuwo, jiɖùtɔ kèwo lè xixe do vìvìti kèa mèa, kudo ènuvuɛ̃ wɔ̀wɔ be ŋusɛ̃ kèwo lè jiŋùkusia wo ye mi le wɔ̀ àvũ kudo.

¹³Ye ŋutia, mì bla Mawu be àhùawɔ̀nu bliboa be àkpà, àleke be ne ŋùkèkè vuɛ̃ ŋua va tù mìa, mìa teŋu nɔ̀tè, la wɔ̀ àvũ, kaka yì vɔ̀vɔnu, eye ŋusɛ̃ bèa gbà nɔ̀ mìa si.

¹⁴Ye ŋutia, mì so kplà! Mì sɔ nyàwo bla àlì ji, eye mì sɔ ènujɔ̀jɔɛwɔ̀wɔ ɖo àkɔta sìgbè *àkɔtakpoxɔ̀nu nène.

¹⁵Àŋɛ̀nyuɛ̃, kè hɛ̃nà ŋuti fàfa va na a, ne nyi àhùayì-fɔ̀kpa kè mì la do a.

¹⁶Sɔ kpe ɖo ekèawo kpata ŋutia, mì le xɔ̀sè, kè nyi *àkpoxɔ̀nua ɖo àsi, ne mìa teŋu nɔ ci àmènyràhũa be èzò kèwo le bì vlàvlàvlàawo.

¹⁷Mì cɔ̃ ègàkuku kè nyi Mawu be hlùɛ̃gãa, eye mì le Mawu be ènyà, kè nyi Gbɔ̃gbɔ̃ a be àhùawuia ɖo àsi goŋu-goŋu.

¹⁸Mì na Gbɔ̃gbɔ̃ a ne kplɔ̀ mì, mìa nɔ fãkue wè sia wè. Mì biɔ Mawu veve ɖe be bèa do mì àlɔ̀. Ɖo ekèa ŋutia, mì do veve ènu, mìa nɔ̀ ŋùsà, eye mìa fãkue veve ɖe ɖo àɖèsãwo ta.

¹⁹Mì gbà fãkue ɖo nyè cã ta nyè, ne wàlɛbɛ kè mù la pò nupo a, Mawu ne sɔ ènyà kè sɔ̀gbèa ɖo àyèmè na mù, ne ma pò nupo kudo kãkã ɖo ji, sɔ ɖè ènu wawla kè lè àŋɛ̀nyuɛ̃ a mèa fiɔ.

²⁰Togbɔ be mù lè ègàkpa mè fifì cã a, mù nyi àŋɛ̀nyuɛ̃ a be *àmèdɔ̃dɔ̃. Mì fãkue be ma teŋu gblɔ̃ ɛ̀ kudo kãkã ɖo ji, sìgbè àlekè be jè be ma gblɔ̃ ɛ̀a nène.

²¹Tikikò, mia nɔ̀vi-ŋusù ɖève, àmè kè nyi sumɔ̃vi ànùkuame, lè Tɔhonɔ̀ be èdɔa mèa, la gblɔ̃ ènu kèwo keŋu le jɔ̀, lè gbɔ nyè fikèa na mì.

²²Ye ŋutia mù le dɔ̃ ɛ̀ ɖoɖa mì, ne bèa va gblɔ̃ àlekè mi lè fikèa ɖoa na mì, eye bèa do mì ŋusɛ̃.

²³Mawu, Àta kudo Tɔhonɔ̀ Yesù Kristò, ne na mì fàfa kudo lɔ̃lɔ̃ kè ŋuti xɔ̀se bɔ̀ ɖoa, mì, nɔ̀vi nyèwo kpata.

²⁴Màje ne nɔ̀ kudo àmè kèwo kpata lɔ̃nà mia Tɔhonɔ̀ Yesù Kristò, lè àdodoe mèa.