Read gen Fìlipìtɔwo 3 Bible Online

Fìlipìtɔwo 3 - gen bible

Fìlipìtɔwo 3

¹Lè ènuwuwua, nɔ̀vi nyèwo, mì nɔ jɔ̀jì lè Tɔhonɔ̀ mè. Mu sɛ̃ŋu na mù be ma ŋlɔ̀ ènyà ɖèkaa ke ɖoɖa mì ò; e la do ŋusɛ̃ mì bòhũ.

²Mì jè àyè na ènuvuɛ̃ wɔ̀tɔwo, àvũ ŋuawo, àmè kèwo do àbì woabe ŋutilãwo ŋuti be yèwo sò èvo a.

³Miawo ye nyi àmè kèwo wo sò èvo na nyàwo a, ɖo mi le sumɔ Mawu lè Gbɔ̃gbɔ̃ mè, ɖo mi sɔ miabe gogo dà ɖo Yesù Kristò ji, eye mi mu dona jì ɖo àgbètɔ be wɔ̀nawo ŋuti ò.

⁴Vɔ̀a nyè cã, mù teŋu dojì ɖo wɔ̀na nyèwo ŋuti, ne àmè ɖe susu be yè la sɔ àmè be wɔ̀na sɔ fiɔ yebe àmè nyinyia, mù teŋu ɖè è fiɔ wu nènemea.

⁵Ènyè yaa, kè wo jì mùa, ŋùkèkè ènyigɔ̃a gbè, wo sò èvo na mù. Izràɛlvi jìji ye mù nyi, so Bɛnyamìn be kɔ̀ta mè. Hebrùvi àdodoe, ne wo la zɔ̃ ɖo èsea jia, mù nyi Farizì.

⁶Ne wo la gblɔ̃ vevedonu tɔ̀a, mù tĩ èhabɔ̀bɔa yomè. Ne wo la gblɔ̃ àgbè nyuɛ̃ nɔ̀nɔ, sɔ zɔ̃ ɖo èsea jia, wo mu la kpɔ àgɔ̀jèje ɖekpe lè ŋuti nyè ò.

⁷Ènu kèawo kpata kèwo ɖènà àlè na mù sãa, fifìa, mù le kpɔ wo sìgbè ènu gbalowo nène, ɖo Kristò ŋuti.

⁸Mu nyi nɔ̀nɔmè kèawo ɖèɖe kpò ò, vɔ̀a mù bù ènuwo kpata be wo nyi ènu gũgũwo, ɖo nyɔna xɔ̀asì ŋua, Yesù Kristò Tɔhonɔ̀ nyè kè mù jèsìa ŋuti. Đo e ye ŋuti mù bù ènu nɔ̀ àmè siwo kpata be wo nyi ènu mà ɖè àlè kèwo mù gble ɖɛa, àleke be Kristò ne sù àsi nyè.

⁹Ne ma tɛ ɖo Kristò ŋuti àdodoe a, nyè mu gbà susu be mù nyi àmè wɔ̀nà jɔ̀jɔɛ, zɔ̃ ɖo èsea ji ò. Vɔ̀ bòhũa, ma wɔ̀ ènu kè nyɔa, sɔ xɔ̀ Kristò ji sè, ènu kè xɔ̀sea biɔ be ma wɔ̀a kpò. Ekèa nyi jɔ̀jɔɛwɔ̀wɔ kè so Mawu gbɔ, ekè ye ŋutɔ nana àmè kè xɔ̀sèa.

¹⁰Ènu kè kpò mù hiãa, ye nyi be ma jèsi Kristò ku yebe fɔ̃fɔ̃ so èku be ŋusɛ̃, ne ma mã yebe vevesèse, ne ma sɔ̀ kudo è lè yebe èku mè,

¹¹gbàkudo ŋùɖo kèa be, ne e teŋu va e mèa, ma to lè èku mè va àgbè mè.

¹²Nyè mu bù be mù ɖo jèpea vɔ̀ ò, àlo mù ɖù blibo vɔ̀ ò, vɔ̀a mù kpɔ̀tɔ̀ le zɔ̃, le tè è kpɔ, ne àpe àsi ne sù àjɔ̀a ji, ɖo nyè ŋutɔ cã Yesù Kristò be àsi sù ji nyè vɔ̀.

¹³Lè nyàwo toto mèa, nɔ̀vi nyèwo, nyè mu susu be àpe àlɔ̀ sù e ji hàɖe ò. Vɔ̀, ènu ɖèka kè mù le wɔ̀a, ye nyi be mù ŋlɔ̀be ènu kè lè ŋùgbea, eye mù le drɛ̃do na ekè lè ŋùkɔ̀a.

¹⁴Ènu kè lè ŋùkɔ̀ na mùa ye mù le nyà, ne ma xɔ̀ Mawu be àmèyɔyɔ lè Yesù Kristò mè be àjɔ̀, lè jiŋùkusi.

¹⁵Mi, àmè kèwo sĩ lè gbɔ̃gbɔ̃ mèa, mi na susu ɖèka ŋua ne nɔ̀ mia si. Vɔ̀a, ne àmè ɖe susu ènu bu so e ŋutia, Mawu ŋutɔ la kɔ̀ e ŋuti na mì.

¹⁶Àfi kè mi va ɖo fifìa, mì na mia zɔ̃ èmɔ ŋua ke ji, la yì àfi kè mi ɖotaa.

¹⁷Nɔ̀vi nyèwo, mì kpɔ ènu kè mù le wɔ̀a, ne mìa kpata, mìa wɔ̀ ɛ̀. Mi na kpɔwɔɛ; mì le ŋùkuvi ɖo àmè kèwo le zɔ̃ ɖo kpɔwɔɛ ŋua jia ŋuti, ne mìa wɔ̀ ɖo e ji.

¹⁸Mù gblɔ̃ ekèa na mì, zè nène ɖe va yì, eye fifìa mù gbà le gblɔ̃ ɛ̀ kudo àɖàsì be, àmè sùgbɔ be àgbè nɔ̀nɔ le ɖè fiɔ be wo nyi Kristò kè ku lè àtisòga ŋutia be kɛ̃tɔwo.

¹⁹Wo lè pu dù, le yì cɔ̃crɔ̃ mè. Woabe pòdo ye nyi ènu kè wò sumɔnaa; woabe ŋùkpɛ̃nuwɔ̀wɔ ye nyi gogo na wo, wo bùnà tamè so xixe mè be ènuwo ŋuti kpò.

²⁰Vɔ̀ miawo yaa, jiŋùkusi be dùmèviwo mi nyi, eye mi lètè veve ɖe kpɔ miabe hlùɛ̃tɔ Yesù Kristò be vava.

²¹Àmè kè la ɖɔ̀lì miabe ŋutilã kpɔ̃tɔ̃ɛ kèa, sɔ ɖì yebe gogo be ŋutilãa, zɔ̃ ɖo yebe ŋusɛ̃ kè ŋuti, e teŋu bɔ̀bɔ̀nà ènuwo keŋu ɖo ye ŋutɔ, yebe àcɛ̀ gɔ̃mèa.