Read gen Fìlipìtɔwo 4 Bible Online

Fìlipìtɔwo 4 - gen bible

Fìlipìtɔwo 4

¹Nène a, nɔ̀vi nyè ɖèvewo, mì, àmè kèwo mù jro veve ɖe be ma gbà kpɔ kèawo, mì àmè kèwo be ènu nyɔ na mù, eye mù sɔ yinagòawo, mì nɔ̀tè sɛ̃sɛ̃ ɖe lè Tɔhonɔ̀ mè, nɔ̀vi nyè ɖèvewo.

²Mù le biɔ so Evodìa gbɔ, eye mù gbà le biɔ so Sɛ̃tikè gbɔ be mìa wɔ̀ ɖèka sìgbè nɔ̀viwo nène, lè Tɔhonɔ̀ mè.

³Mù le biɔ wò, èhadɔwɔ̀tɔ veve nyè cã, be wòa do àlɔ̀ nyɔ̃nù kèawo, ɖo wo wɔ̀ èdɔ ku mù veve ɖe, sɔ kãkã àŋɛ̀nyuɛ̃ a. Mù le ɖo ŋùku Klèma ku àmè kèwo kpata be nyikɔ lè àgbè be xoma a mèawo ji.

⁴Mì nɔ jɔ̀jì wè sia wè, lè Kristò mè. Mù gbà le gblɔ̃ ɛ̀ ke be: mì nɔ jɔ̀jì!

⁵Àmèwo kpata ne jèsi miabe xòmèfàa. Tɔhonɔ̀ be vava lili.

⁶Mì mu gbà ci siayi ɖo ènu ɖe ŋuti ò, vɔ̀ a lè ènuwo keŋu mè a, mì sɔ kuefãwo ku blìbɔ̀-blìbɔ̀ bɔ̀ ɖo àkpedodo ŋuti, sɔ biɔ ènu kèwo ye hiã mì a Mawu.

⁷Eye Mawu be fàfa kè wu ènunyawo keŋuã, ne kpɔ mìabe èjìwo kudo mìabe àyèwo keŋu ji lè mìabe ɖèkawɔ̀wɔ kudo Kristò Yesù mè.

⁸Sɔ wu enua, nɔ̀viwo, mì na ènu kè nyi nyàwo a, ènu kè jè na bùbu, ènu kè nyi ènu jɔ̀jɔɛ, ènu kè kɔ̀, ènu kè nyɔa, ènu kè jè àmè ŋùmè a, ne xɔ̀ mìabe àgbènɔ̀nɔ keŋu.

⁹Mì nɔ̀ àgbè ɖo ènu kè mì kpla kudo kè mì xɔ̀ so gbɔ nyèa ji. Mì wɔ̀ ɖo ènu kèwo mù gblɔ̃ kudo ekèwo mù wɔ̀awo ji. Eye fàfa be Mawu a, ne nɔ̀ ku mì.

¹⁰Mù kpɔ jìjɔɛ gã ɖe lè Tɔhonɔ̀ mè, be mì gbà kpɔ èmɔnu yeye, sɔ wɔ̀ ènu nyuɛ̃ na mù. Mu nyi be mì tɔtè ekèa wɔ̀wɔ ò, vɔ̀ mì mu gbà kpɔ èmɔnu kèa sɔ ɖè è fiɔ mù ò.

¹¹Nyè mu le pò nupo nènea, ɖo mù lè èhiã mè ŋuti ò. Mù kpla ɖokoe nyè be ènu kè lè àsi nyèa, ne jè ŋùmè na mù.

¹²Mù nya àgbè nɔ̀nɔ lè èhiã mè, eye mù gbà nya àgbènɔ̀nɔ lè ènu sùgbɔ ɖoɖo mè. Mù kpla ekèa be, lè àfi ɖekpekpe, àlo lè gà ɖekpekpe gà mèa, ma jɔ̀jì, lè ènu sù àmèsi loo, àlo lè àdɔ̀wùamè mè, lè ènu sùgbɔ loo, àlo lè ènu vi ɖe kpò mè.

¹³Mù teŋu ɖù ènu kèawo keŋu ji, ɖo Kristò kè le do mù ŋusɛ̃a ŋuti.

¹⁴Vɔ̀a, e nyi ènu nyuɛ̃ ɖe ŋutɔ be mì kpɔ èmɔnu lè àpe tagbãwo mè.

¹⁵Mìa Fìlipìtɔwo, mìa ŋutɔwo mì nya ɛ̀ nyuɛ̃ ɖe be, ekè mù jo lè Màkedonìa, wàlɛbɛ kè wo le do àŋɛ̀nyuɛ̃ a, mìawo kpò ye nyi èhabɔ̀bɔ kè kpe ɖo ŋuti nyè, do mù àlɔ̀ lè àlè kudo ènu gũ àmè mè.

¹⁶Wàlɛbɛ kè mù nɔ̀ Tɛsalonikàa, mì ɖo àlɔ̀do ɖoɖa mù wu zè ɖèka ŋutɔ cã.

¹⁷Mu nyi be mù le ji la xɔ̀ ènu nana so mìa si kpò ò. Vɔ̀a, mù le ji be àlè ɖe ne so e mè na mì.

¹⁸Mù ɖo ènuwo keŋu, kaka e wu àpe èhiã. Ènu kè mì sɔ ɖoɖa mù to Epafroditò jia sù àsi nyè. Eye e sù àpe èhiãwo keŋu nu. Mìabe ènu nana kèawo le nyi vɔsa hɔ̃hɔ̃ɛ gbigbli kè jènà ŋùmè na Mawu kè xɔ̀ ɛ̀a.

¹⁹Mawu nyè la na mìabe ènu hiãhiãwo keŋu la sù mìa si, sɔ zɔ̃ ɖo yebe àdɔ̀kùnu flãŋuwo nu lè Yesù Kristò mè.

²⁰Gogo na Mawu, mia Tɔ, so fifì kaka sɔ yì! * Àmèn.

²¹Mì do ègbè na àmè cãcãwo dòmètɔ ɖe sia ɖe lè Yesù Kristò mè. Nɔ̀vi kèwo lè gbɔ nyèa, wo do ègbè ɖoɖa mì.

²²Mawu be dùkɔ̃a be èhamètɔ kèwo kpata lè fikèa, vevetɔa, àmè kèwo lè èfìɔ gãa be àxomèa do ègbè ɖoɖa mì.

²³Tɔhonɔ̀ Kristò Yesù be màje ne nɔ̀ kudo mìa kpata.