Read gen Kolosètɔwo 2 Bible Online

Kolosètɔwo 2 - gen bible

Kolosètɔwo 2

¹Mù jro be, mìa nya àvũ gã kè mù le drɛ̃ ɖo mìa ku àmè kèwo lè Laodikè, kudo àmè sùgbɔ bu kèwo mu kpɔ kpɔ ènyè, àmètia hàɖe òa ta,

²ne woa ɖɔ ku jìdo, eye woa wɔ̀ ɖèka lè lɔ̃lɔ̃ mè, eye kãkã ɖo e ji kè sona ènunya àdodoe mèa ne nyi woabe àdɔ̀kùnu. Nène a ye wo la nya Mawu be àmlìmànu kè nyi Kristò,

³àmè kè mè ènunya kudo ŋɔŋɔ jè ènu mè be àdɔ̀kùnu keŋu wla ɖoa.

⁴Mù le gblɔ̃ ekèa, ne àmè ɖe mu gbà sɔ ènumè vivi sɔ flù mì ò.

⁵Đo ne nyè mu lè mìa gbɔ, lè ŋutilã mè ò cã a, mù lè mìa gbɔ lè gbɔ̃gbɔ̃ mè, eye èjì le jɔ̀ mù, ekè mù le kpɔ mì lè mìabe èdɔ nu kudo mìabe xɔ̀sè ɖoɖo ɖo Kristò ji be èkèlili.

⁶Ye ŋutia, sìgbè àlekè mì xɔ̀ Kristò Yesù, Tɔhonɔ̀a nènea, mì zɔ̃ nènea ke.

⁷Mìa ɖo èkè eye woa fiɔ mì ènu lè e mè, eye mìa likè lè xɔ̀sè mè, sìgbè àlekè wo kpla mìa nène, ne mìa flãŋu lè àkpe dodo mè.

⁸Mì kpɔ nyuɛ̃ ɖe, ne àmè ɖe mu gbà sɔ xixe mè be ènunya gbalo kè flùnà àmèa blè mì ò. Đo, wo kù ɖo àgbètɔwo be èkɔ̀do ku xixe mè be ŋusɛ̃wo ŋuti, vɔ̀a wo mu kù ɖo Kristò ŋuti ò.

⁹Đo Mawu be ɖɔɖɔ keŋu lè e mè, lè ŋutilã be nɔ̀nɔmè mè.

¹⁰Eye wo ɖɔ mì, lè àmè kè nyi ètatɔ na jiɖùɖu kudo hɔ̃hlɔ̃ keŋuã mè.

¹¹Wo sò èvo na mì lè ɖèka wɔ̀wɔ ku Kristò mè. Mu nyi *èvosòso kè wo sɔ àlɔ̀ wɔ̀a ò, vɔ̀a lè ŋutilã be ɖèɖè ɖɛ mè. Ekèa ye nyi Kristò be èvo sòso.

¹²Wo ɖì mì ku ì, lè mawusilèle mè, àmè kè mè wo fɔ̃ mìawo cã lè, to xɔ̀sè ɖoɖo ɖo Mawu kè fɔ̃ ɛ̀ so àmè kukuwo dòmèa be ŋusɛ̃ ji.

¹³Mì, àmè kèwo ku lè mìabe dàdawo ku mìabe ŋutilã be èvo màsò mèa, Mawu gbɔ̀ mì àgbè ku ì, eye e sɔ mìabe dàdawo keŋu sɔ kè mì,

¹⁴ekè e tutu *èse kè lè do èhùɛ do mi, eye yebe ŋɔ̀ŋlɔ̃wo sitè ɖo mia ŋutia. E ɖè wo jo, wàlɛbɛ kè e ka ɛ̀ ɖo àtisògaa ŋutia.

¹⁵E gbã jiɖùɖuwo ku hɔ̃hlɔ̃wo do, e ɖè wo sia àgbãŋùgbà, eye e ɖù woa ji, kplɔ̀ wo àhùale yì Èvia be jiɖùɖu be àsàɖa mè.

¹⁶Ye ŋutia, mì mu gbà na àmè ɖe ne ɖo kòjo ku mì lè ènu kèwo mì ɖù, àlo ènu kèwo mì nù, àlo so àzã ɖùɖu, àlo wètri yeye, àlo jɛ̃gbɔ̃zã gomè ŋuti ò.

¹⁷Ekèa Kpata nyi ènu kèwo gbãnà a be vɔ̃vɔ̃lì. Vɔ̀a ènu ŋutɔ-ŋutɔa lè Kristò mè.

¹⁸Mì mu gbà na àmè kèwo jɔ̀nàjì lè vevedonu gbalo kudo Mawu be àtikplɔtɔwo be sɛ̃sɛ̃ mèa woa na be mìabe àjɔ̀a ne gũ na mì ò. Wo kãmana na yebe àvìmènuwo, eye woabe ŋutilã be susuwo kɔna wo yìji gbalo.

¹⁹Vɔ̀a wo mu tɛna ɖo èta kè gbɔ ŋutilã bliboa kpɔna ɖùɖu lèa ŋuti ò. Kè ètaa ca ɖo ŋutinuwo kudo èkãwo ŋutia, ye wɔ̀ woa kpata wo ɖona sĩsĩ kè so Mawu gbɔa.

²⁰Ekè mì ku kudo Kristò, eye mì to lè xixea be ŋusɛ̃ gɔ̃mèa, nukɛ ŋuti mì gbà na wo le do èse na mì, sìgbè xixea mè mì gbà lè nène ò be:

²¹“Mù gbà sɔ ènu kèa ò!” “Mù gbà ɖɔ ènu ŋua kpɔ ò!” “Mù gbà tɔ àsi ekèa ò!”

²²Ènu kèawo keŋu la crɔ̃ lè woabe zãzãwo mè. Àgbètɔwo be ɖoɖowo kudo ènufiɔfiɔwo ye wo nyi.

²³Ènu kèawo xɔ̀ ènunya be nyikɔ lè sɛ̃sɛ̃ kè woa ŋutɔwo cã, lè ɖokoe bɔ̀bɔ kudo àyà dodo na ŋutilãa mè. Vɔ̀a, wo mu ɖo bùbu ɖekpe wu ŋutilã be pòɖɔɖɔ ò.