Read gen Kolosètɔwo 3 Bible Online

Kolosètɔwo 3 - gen bible

Kolosètɔwo 3

¹Ne mì fɔ̃ kudo Kristò nyàwo a, mì ji ènu kèwo lè jiŋùkusi, àfi kè Kristò nɔ̀ ànyi lè Mawu be ɖùsi mè lèa.

²Mìabe susuwo ne nɔ̀ jiŋùkusi be ènuwo ji. Mì mu gbà sɔ wo ɖo ànyigbã ji be ènuwo ji ò.

³Đo mì ku, eye mìabe àgbè lè wawla kudo Kristò lè Mawu mè.

⁴Ne Kristò, kè le nyi mìabe àgbè a, la to vaa, wàlɛbɛ ŋuaa, mìa cã mì la to va kudo è lè gogo mè.

⁵Ye ŋutia, mì wù mìabe ŋutinu kèwo lè ànyigbã jia: gbòlòwɔ̀wɔ, màkɔ̀ màkɔ nyinyi, èjro pòɖi, èjro vuɛ̃ kudo ŋùbìa, kè nyi vòdusɛ̃sɛ̃a,

⁶ɖo ènu kèawo ŋuti Mawu be àdɔ̀mèze va àmè kèwo gbe be yèwo mu la ɖo èto è òawo ji.

⁷Mìawo cã mì zɔ̃ lè ènu kèawo mè sã, wàlɛbɛ kè ènuvuɛ̃ kèawo ɖù mìabe àgbè jia.

⁸Vɔ̀a fifìa, mìawo cã mì ɖè àsi lè ènu kèawo keŋu, kèwo nyi èjìbibi, àdɔ̀mèze, hũnyànyrã, bùsu-nya gbɔ̃gblɔ̃, kudo ŋùkpɛ̃nya kèwo tona lè mìabe ènu mèa ŋuti.

⁹Mì mu gbà ɖà àjè, na mìa nɔ̀nɔwo ò, ɖo mì ɖè àmè xoxoa kudo yebe wɔ̀nàawo ɖɛ,

¹⁰eye mì sɔ àmè yeyea do, àmè yeye kè wo wɔ̀ yeye na ènunya lè àmè kè ɖo èa be ŋùfɛ̃ mè.

¹¹Fikèa, àmè kè mu nyi Yudàvi ò, àlo Yudàvi, àmè kè sò èvo, àlo àmè kè mu sò èvo òa, ŋùmèmàkɔ̀tɔ, àlo blèmàtɔ, sumɔ̃vi, àlo àxomè vi jìji mu lè ò, vɔ̀a Kristò ye nyi ènu sia ènu, lè ènuwo keŋu mè.

¹²Ye ŋutia, sìgbè Mawu be àmè cãcã kɔ̀kɔ̀ɛwo ku àmè ɖèvewo nènea, mì ɖo ŋuzĩzĩkuku, àmènuveve, ɖokoe bɔ̀bɔ, hòmèfà, àdòdò,

¹³mì gbɔ̃ èjì ɖɛ blɛ̀wù ku mìa nɔ̀nɔwo. Ne àmè ɖe ɖo ènyà ɖe ɖo nɔ̀via ŋutia, ne sɔ ɛ̀ kè è; sìgbè àlekè Tɔhonɔ̀ sɔ kènà mìa, nènea ke mìa cã, mì nɔ sɔ kè mìa nɔ̀nɔwo.

¹⁴Vɔ̀a, wu ekèawo keŋuã, mì sɔ lɔ̃lɔ̃ wɔ̀ àwù do. Ekèa ye nyi èkàdodo àdodoe a.

¹⁵Kristò be fàfaa ne ɖùji lè mìabe èjìwo mè, ekèa ŋuti wo yɔ mìa cã ɖo, ne mìa nyi ŋutilã ɖèka. Mì nyi àkpedomewo.

¹⁶Mì na Kristò be ènyàa ne nɔ̀ mìa mè ku yebe àdɔ̀kùnuwo fuu, eye mìa sɔ ènunya keŋu nɔ kpla ènu mìa nɔ̀nɔwo, mì nɔ pò ètoɖo na mìa nɔ̀nɔwo ku Psalmòwo, kudo kafuhawo, gbàkudo Gbɔ̃gbɔ̃ mè be èhàwo. Mì nɔ jì èhà kèawo ku mìabe èjì blibo kudo àkpe dodo.

¹⁷Eye ènu sia ènu kè mì la teŋu wɔ̀ lè nupòpo àlo lè ènuwɔ̀wɔ mèa, mì wɔ̀ ɛ̀ keŋu lè Tɔhonɔ̀ Yesù be nyikɔ mè, eye mìa do àkpe na Mawu, Ètɔ, to e ji.

¹⁸Nyɔ̃nùwo, mì bɔ̀bɔ̀ èta na mìa srɔ̃wo, sìgbè àlekè e jè lè Tɔhonɔ̀ mèa nène.

¹⁹Ŋusùwo, mì lɔ̃ mìa srɔ̃wo, eye mì mu gbà sɛ̃ èta mè ɖo woa ŋuti ò.

²⁰Đèviwo, mì sè ètonu na mìabe àjìtɔwo lè ènuwo keŋu mè, ɖo ekèa jènà Tɔhonɔ̀ be ŋùmè.

²¹Ètɔwo, mì mu gbà do àdɔ̀mèze na mìabe èviwo, ne wo mu gbà gbɔjɔ ò.

²²Sumɔviwo, mì sè ètonu lè ènuwo keŋu mè na mìabe àpetɔwo, mu nyi lè ŋùkuvi ji, ne mìa jè àgbètɔ be ŋùmè ò, vɔ̀a lè èjìmè kɔ̀kɔ̀ɛ mè lè Tɔhonɔ̀ be sisi mè.

²³Eye ènu sia ènu kè mì le wɔ̀a, mì wɔ̀ ɛ̀ ku èjro nyuɛ̃, sìgbè Tɔhonɔ̀ mì le wɔ̀ ɛ̀ na nène, mu nyi na àgbètɔwo ò,

²⁴ekè mì nya be, mì la xɔ̀ ècrɔ̃a be àjɔ̀ so Tɔhonɔ̀ gbɔa. Đo Àpetɔa, Kristò ye; yebe èdɔ mè ye mì lè.

²⁵Đo àmè kè wɔ̀nà màjɔ̀màjɔ̀a, la xɔ̀ màjɔ̀ màjɔ be èfɛ̃tu; eye àmè be ŋùmè sisi mu lè Mawu gbɔ ò.