Read gen 1Tɛsalonikà 1 Bible Online

1Tɛsalonikà 1 - gen bible

1Tɛsalonikà 1

¹Ènyè Paolò ku Silvanɔ̀ kudo Timòteo ye le ŋlɔ̀ xoma kèa na mì, èhabɔ̀bɔ kè lè Tɛsalonikà, ekè ye nyi Mawu Ètɔ kudo Tɔhonɔ̀ Yesù Kristò tɔ̀a. Màje ku fàfa ne nɔ̀ ku mì.

²Mi dona àkpe na Mawu wè sia wè ɖo mìa keŋu ta, eye mi ɖonaŋù mì lè miabe kuefãwo mè.

³Ne mi lè Mawu mia Tɔ be ŋùmè a, mi ɖona ŋùkuvi e ji be mìabe ènuwɔ̀na fiɔ be mì xɔ̀ Mawu ji sè nyàwo, eye mìabe àgbàgba jèje cã ɖè mìabe lɔ̃lɔ̃ fiɔ. Gbà wua, lekè mì lètè goŋua ɖè è fiɔ be mì le kpɔ èmɔ na mia Tɔhonɔ̀ Yesù Kristò.

⁴Nɔ̀viwo, mì, àmè kèwo Mawu lɔ̃ àdodoe a, mi nya nyuɛ̃ ɖe be Mawu ŋutɔ ye cã mì.

⁵Àŋɛ̀nyuɛ̃ kè mi hɛ̃ va na mìa, mu nyi ènyà ɖèɖe kpò be nyi, mi gblɔ̃ na mì ò, vɔ̀ bòhũ, ŋusɛ̃ ku Gbɔ̃gbɔ̃ Kɔ̀kɔ̀ɛ a cã bɔ̀ ɖo e ŋuti, eye gbà wua, mi kã ɖo e ji be e lè e mè nyàwo. Ekè mi nɔ̀ mìa gbɔa, mi ɖè àmè kè ŋùkumè mi nyia fiɔ mì, mì kpɔ. Mìawo ŋuti mi wɔ̀ ekèa ɖo.

⁶Mì to miawo ku Tɔhonɔ̀a be àfɔ̀tope, ye ŋuti, ekè mì kpe èfũ sùgbɔ ŋutɔ lè ènyàa be xɔ̀xɔ mè cã a, Gbɔ̃gbɔ̃ Kɔ̀kɔ̀ɛ a do mì ŋusɛ̃ eye mì kpɔ jìjɔɛ.

⁷Ekèa wɔ̀ ɛ̀ be mì va zũ kpɔwɔɛ na xɔ̀sètɔ kèwo kpata lè Màkedonìa ku Akayìa.

⁸Đo mìa gbɔ ye Tɔhonɔ̀ be ènyàa ɖì so, mu nyi lè Màkedonìa ku Akayìa kpò ye be yì ò. Vɔ̀a xɔ̀sè kè mì ɖo ɖo Mawu ŋutia gbãkpe àfi sia àfi, kaka mu gbà lè veve ɖe be, mia pò ènu gbɔ̀xue ò.

⁹Đo àmèwo le pò nupo so mìa ŋuti, le gblɔ̃ lekè mì xɔ̀ mi ɖo, wàlɛbɛ kè mi va mìa gbɔa ku lekè mì trɔ so vòduwo yomè va Mawu gbɔ, ne mìa sumɔ Mawu àgbèagbèa, Mawu àdodoe a.

¹⁰Gbà wua, mì le nɔ̀tè kpɔ Èvia, Yesù, kè wo fɔ̃ so àmè kukuwo dòmèa. E ye hlùɛ̃ mi so Mawu be kòjoɖoɖo kè gbãnà a mè.