Read gen 1Tɛsalonikà 2 Bible Online

1Tɛsalonikà 2 - gen bible

1Tɛsalonikà 2

¹Nɔ̀viwo, sìgbè lekè mìa ŋutɔwo mì nya nènea, miabe mìa gbɔ vavaa mu nyi gbalo ò.

²Mì nya ɛ̀ cã be mi kpe èfũ, eye wo do ŋùkpɛ̃ mi lè Fìlipì, vɔ̀a, Mawu do ŋusɛ̃ mi, eye mi do yebe Àŋɛ̀nyuɛ̃ a na mì, lè veve sèse sùgbɔ mè.

³Ènu kè be èto mi le pò ɖo na mìa, mu so àmè fùflu, àlo susu màkɔ̀ màkɔ mè ò. Gbà wua, mi mu le wɔ̀ ekèa be mia sɔ àyè flù mì ò,

⁴vɔ̀ bòhũa, mi pònà nupo tɛ̀gbɛ̀ sìgbè lekè Mawu jro a nène, ɖo, mi jè ŋùmè na ɛ̀ eye be sɔ Àŋɛ̀nyuɛ̃ a do àsi na mi. Mi mu le ji la jè àmèwo be ŋùmè ò, vɔ̀ mia jè ŋùmè na Mawu ɖèɖe kpò. Đo ye ŋutɔ ye dona miabe èjìwo kpɔ.

⁵Sìgbè lekè mì nya nènea, mi mu sɔ àmèflùnya viviwo kafu àmè ɖekpe, àlo to àyè mè, bìaŋù ɖo àmè ɖekpe be ènu ŋuti kpɔ ò. Mawu ye nyi miabe ɖàsèfo!

⁶Sìgbè Kristò be *àmèdɔ̃dɔ̃wo nènea, mi la teŋu zĩ mìa ji, be mìa do bùbu mia ŋuti, vɔ̀a, mi mu ji be mìawo loo, àlo àmè buwo cã a, woa wɔ̀ ekèa na mi ò.

⁷Vɔ̀ bòhũa, mi bɔ̀bɔ mia ɖokoewo ɖo ànyi lè mìa dòmè, sìgbè àjìnɔ̀ kè lenabè na ye ŋutɔ be èviwo nène.

⁸Ekè mi ɖo lɔ̃lɔ̃ na mì ŋutia, mi sɔ̀gbè, mu nyi ne mia do Mawu be Àŋɛ̀nyuɛ̃ a ɖèɖe kpò na mì ò, vɔ̀ bòhũa, be mia sɔ miabe àgbè ŋutɔ cã na mì; ɖo, mì trɔ zũ èvi vevewo na mi.

⁹Nɔ̀viwo, mì ɖo ŋùkuvi e ji be gà kè mè mi le do Mawu be Àŋɛ̀nyuɛ̃ a na mìa, mi wɔ̀ èdɔ èzã ku kedè, kpɔ mia ɖokoewo ji, leke be, mi mu gbà zũ àgbã na mìa dòmètɔ ɖe ò.

¹⁰Mìawo ku Mawu keŋu la teŋu ɖù ɖase so mia ŋuti be ekè mi nɔ̀ mì, àmè kèwo xɔ̀sèa gbɔa, miabe nɔ̀nɔmè kɔ̀, nɔ̀ jɔ̀jɔɛ, eye ŋùmèkãkã ɖe mu nɔ̀ e ŋuti ò,

¹¹ɖo mì nya lekè mi pò ètoɖo na mìa dòmètɔ ɖe sia ɖe ku lɔ̃lɔ̃, sìgbè lekè ètɔ wɔ̀nà na èviawo a nène.

¹²Sɔ kpe ɖo ekèa ŋutia, mi gbà pò ètoɖo na mì, do ègbè àsi na mì, eye mi do mì ŋusɛ̃ be mìa nɔ̀ àgbè kè la jè ŋùmè na Mawu, àmè kè yɔ mì va ye ŋutɔ be èfìɔdu ku gogo mèa.

¹³Ènu kè ŋuti mi gbà dona àkpe na Mawu wè sia wèa, ye nyi be, ekè mi sɔ yebe ègbèdoàsi va na mìa, mì xɔ̀ ɛ̀ àtuu, mu nyi sìgbè àgbètɔ be ègbèdoàsi nène ò, vɔ̀ bòhũa, sìgbè Mawu tɔ̀ nène. Nène a ye be nyi tututu. Mawu be ègbèdoàsi kèa ye wɔ̀nà èdɔ lè mì, àmè kèwo xɔ̀sèa mè.

¹⁴Nɔ̀viwo, mìawo cã, mì sɔ̀ ku Mawu be èhabɔ̀bɔ kèwo wɔ̀ ɖèka ku Kristò Yesù lè Yudeà wo, ɖo mìawo cã mì kpe èfũ lè mìa ŋutɔ mìa nɔ̀viwo si mè, sìgbè lekè woawo cã, wo kpe èfũ lè Yudàviwo si mèa nène.

¹⁵Yudàvi kèwo ye wù Tɔhonɔ̀ Yesù ku Mawu be gblɔ̃ɖɛtɔwoa, woawo ke ye tĩ miawo cã, mia yomè. Wo do àdɔ̀mèze na Mawu, eye wo nyi àmèwo kpata be kɛ̃tɔ.

¹⁶Wo jènà àgbàgba, xena èmɔ na mi, be mi mu gbà do hlùɛ̃gã be àŋɛ̀nyuɛ̃ a na àmè kèwo mu nyi Yudàviwo ò. To ènu kèawo wɔ̀wɔ mèa, woabe ènuvuɛ̃wo va sùgbɔ kaka gbãgo, eye, lè memlɛ̃nua, Mawu be àdɔ̀mèze va jè woa ji.

¹⁷Nɔ̀viwo, gàmè kpòe ɖe ye nyi ekèa, mi jo lè mìa gbɔ. Ekè mi mu gbà le kpɔ mì ku ŋùkuvi cã òa, miabe susu ya lè mìa ji veve ɖe. E jro mi ŋutɔ, eye mi jè àgbàgba sùgbɔ be mia gbà va kpɔ mì ŋùkumè ku ŋùkumè.

¹⁸Mi ɖo è be mia va kpɔ mì ɖa ènyè Paolò ŋutɔ, mù ɖo è zè ɖèka ku èvè vɔ̀a Satana xe èmɔ na mi.

¹⁹Đo àmè kɛ ye la nyi miabe ŋùɖo ku jìjɔɛ kudo gogo be jègbà lè miabe Tɔhonɔ̀ Yesù be ŋùmè lè yebe vava mè, ne mu nyi mìawo ye ò?

²⁰Nyàwo, mìawo ye nyi miabe gogo ku jìjɔɛ!