Read gen 1Tɛsalonikà 3 Bible Online

1Tɛsalonikà 3 - gen bible

1Tɛsalonikà 3

¹Ye ŋutia, ekè mi mu gbà la teŋu nɔ̀tè kpe òa, mi ɖo è be miawo ɖèɖe mia ci Atenè.

²Eye mi ɖo Timòteo, mia nɔ̀vi, kè nyi Mawu be sumɔ̃vi-dɔwɔ̀tɔ lè Kristò be àŋɛ̀nyuɛ̃ a be dodo mèa ɖoɖa mì. Mi dɔ̃ ɛ̀ ɖoɖa, ne bèa do mì ŋusɛ̃, ne pòfiɔ mì ɖo mìabe xɔ̀sèa ŋuti,

³leke be èfũ kèwo mì le kpea mu gbà gbɔjɔ àmè ɖekpe ò. Mìa ŋutɔwo mì nya be ekèa ye nyi mìabe èdɔ.

⁴Ekè mi nɔ̀ mìa gbɔa, mi gblɔ̃ ɛ̀ na mì nyuɛ̃ ɖe jè ŋùkɔ̀, be mì la kpe èfũ hamèhamè, sìgbè lekè be le jɔ̀, mì le kpɔa nène.

⁵Nyè mu teŋu le dojì ò, ekèa ŋuti ye mù dɔ̃ Timòteo ɖoɖa ɖo, be ne va kpɔ lekè mìabe xɔ̀sèa lèa. Mù nɔ̀ vɔ̃vɔ̃ mè be èta mu nyɔ òa, Àmètèkpɔtɔa va tè mì kpɔ, eye miabe àgbàgba jèje a zũ ènu gbalo!

⁶Vɔ̀ fifìa, ekè Timòteo trɔ so mìa gbɔ va ɖo mia gbɔa, e hɛ̃ jìjɔɛ be ènyàa va na mi, so mìabe xɔ̀sè ku lɔ̃lɔ̃ ŋuti. E va gblɔ̃ na mi be mìabe ŋùkuviwo lè mia ji ŋutɔ, wè sia wè, eye mì ji vekuveku be yèwoa kpɔ mi, sìgbè lekè miawo cã mi ji vekuveku be mia gbà kpɔ mìa nène.

⁷Ye ŋutia, nɔ̀viwo, lè miabe xaxawo ku àyàɖùɖuwo keŋu mè cã a, mi gbà dona jì, ɖo xɔ̀sè kè lè mìa sia ŋuti.

⁸Đo ne mì lètè goŋu-goŋu lè ɖèkawɔ̀wɔ ku Tɔhonɔ̀ mèa, eŋuã, àgbè gbà ɖo mia mè.

⁹Mi la teŋu do àkpe na Mawu ɖo mìa ta be e sùa? Jìjɔɛ gã kè mì do na mi, lè miabe Mawu be ŋùmè a, wu gbɔ̃gblɔ̃.

¹⁰Mi lè kuefã ji veve ɖe, èzã ku kedè, be mia gbà dogò ŋùkumè ku ŋùkumè, àleke be mia sɔ ènu kèwo gbà kpɔ̀tɔ̀ lè mìabe xɔ̀sèa ŋutia, kpe è na mì.

¹¹Fifìa, Mawu, mia Tɔ ŋutɔ kudo mia Tɔhonɔ̀ Yesù, wo ne jɔ̀ miabe èmɔwo kaka mia va mìa gbɔ.

¹²Tɔhonɔ̀ ne na be lekè mì lɔ̃ mìa nɔ̀nɔwo ku àmè buwo keŋuã, ne sĩ ɖo e ji, ne kèkè èta, sìgbè lekè mi lɔ̃ mìa nène.

¹³Nène a Tɔhonɔ̀ ne likè mìabe èjìwo. Eye wàlɛbɛ kè mia Tɔhonɔ̀ Yesù ku yebe àmè kèwo ŋuti be kɔ̀a, wo la va toa, mìa nɔ̀tè goŋu-goŋu la zũ àmè kèwo ŋuti wo kɔ̀, àmè kèwo ŋuti ŋùmè kãkã mu lè ò, lè Mawu mia Tɔa be ŋùmè.