Read gen 1Tɛsalonikà 4 Bible Online

1Tɛsalonikà 4 - gen bible

1Tɛsalonikà 4

¹Mɛmlɛ̃a, nɔ̀viwo, mì kpla lekè mì la nɔ̀ àgbè, ne bèa jè ŋùmè na Mawu a so mia gbɔ, eye mì le nɔ̀ ɛ̀ cã, vɔ̀a, ekè mi do èha ku Tɔhonɔ̀ Yesù ŋutia, mi le pòfiɔ mì, le do ŋusɛ̃ mì be mìa yì e ji sùgbɔ wu.

²Mì nya ɖoɖo kèwo Tɔhonɔ̀ Yesù na mi wɔ̀ na mìa.

³Đo, e nyi Mawu be èjro be mìa nɔ̀ àgbè kɔ̀kɔ̀ɛ, eye mì mu gbà wɔ̀ *àhasì ò.

⁴Àmè sia àmè ne ɖè èsrɔ̃ lè kɔ̀kɔ̀ɛ mè ku bùbu mè.

⁵Vɔ̀a, mu nyi lè èjro pòɖi mè, sìgbè lekè àmè kèwo mu jèsi Mawu ò a, wɔ̀nà ɛ̀a nène ò.

⁶Lè ènu kèawo mèa, Mawu mu ji be àmè ɖekpe ne wɔ̀ èvuɛ̃ ɖo nɔ̀via ŋuti, àlo bèa bà ɛ̀ ò. Sìgbè lekè mi tɛ ègbè ɖo e ji na mì va yì xoxoa nènea, Tɔhonɔ̀ dɔ̃nà èto na àmè kè wɔ̀nà ènu kèawo dòmètɔ ɖekpekpe.

⁷Đo Mawu mu yɔ mi va be mia wɔ̀ àfɛ̃nu ò, vɔ̀ bòhũ, be mia va zũ àmè kèwo ŋuti wo kɔ̀a.

⁸Nène a, àmè kè gbe ɖoɖo kèawo wɔ̀wɔa, mu nyi àgbètɔ be gbe ò, vɔ̀ bòhũa, Mawu kè na mì yebe Gbɔ̃gbɔ̃ Kɔ̀kɔ̀ɛ a ye be gbe.

⁹Lè nɔ̀vi lɔ̃lɔ̃ gomèa, mu lè veve ɖe be ma ŋlɔ̀ ènu ɖekpe na mì so e ŋuti ò, ɖo, Mawu ŋutɔ fiɔ mì be mìa lɔ̃ mìa nɔ̀nɔwo xoxo.

¹⁰Sìgbè lekè mì wɔ̀nà na nɔ̀vi kèwo keŋu lè Màkedonìaa nènea, mi le pòfiɔ mì, nɔ̀viwo, be mìa gbà yì e ji fuu wu.

¹¹Mìabe ètaɖojinu ne nyi be mìa nɔ̀ àgbè lè fàfa mè, eye àmè sia àmè ne kpɔ ye ŋutɔ be ènyàwo gbɔ. Mì sɔ mìabe àlɔ̀wo wɔ̀ èdɔ, sìgbè lekè mi biɔ so mìa sia nène.

¹²Ekèa la wɔ̀ ɛ̀ be mì mu la gbà gba ɖo àmè ɖe ŋuti ò, eye àmè kèwo mu lè èhabɔ̀bɔa mè ò a, la bù mì.

¹³Nɔ̀viwo, mi ji veve ɖe be mìa nya ènu so àmè kèwo kua ŋuti, ne mì mu gbà ci siayi, sìgbè àmè bu kèwo si ŋùɖo mu lè ò a nène ò.

¹⁴Mi xɔ̀ ɛ̀ sè be Yesù ku eye be gbà fɔ̃ so èku. Nène a ke ye mi gbà xɔ̀sè cã be Mawu la to Yesù ji, la fɔ̃ àmè kèwo kua ɖo àgbè.

¹⁵Tɔhonɔ̀ ŋutɔ be ènyà ye mi le gblɔ̃ na mì, be mi, àmè kèwo la kpɔ̀tɔ̀ nɔ̀ àgbè lè Tɔhonɔ̀ be vava mèa, mi mu la jè ŋùkɔ̀ na àmè kèwo kua ò.

¹⁶Ne ègbèɖèɖe sɛ̃sɛ̃a ɖì so Mawu be àtikplɔtɔ gãa, nua, ne e ku Mawu be èkpɛ̃a, Tɔhonɔ̀ ŋutɔ la ɖì so jiŋùkusi va. Àmè cucugbã kèwo la fɔ̃a, wo ye nyi àmè kèwo xɔ̀ Kristò ji sè, gbɔ̀xue kua.

¹⁷E yomè a, Mi, àmè kèwo kpɔ̀tɔ̀ lè àgbèa, wo la kɔ mi ɖodu ku wo, yìji lè lilikpowo mè, àleke be mia yì kpe Tɔhonɔ̀ lè àya mè, eye nènea, mi la nɔ̀ ànyi ku ì kaka sɔ yì.

¹⁸Ye ŋutia, mì sɔ ènyà kèawo fa àkɔ na mìa nɔ̀nɔwo.