Read gen 1Tɛsalonikà 5 Bible Online

1Tɛsalonikà 5 - gen bible

1Tɛsalonikà 5

¹Nɔ̀viwo, mu lè veve ɖe be woa ŋlɔ̀ ènu ɖekpe na mì, so Tɔhonɔ̀ be vava hùenuwo ku gàpòpowo ŋuti ò.

²Đo, mìa ŋutɔwo, mì nya be Tɔhonɔ̀ be tɔtrɔ va be àzãa, la nɔ̀ sìgbè lekè fìãfìtɔ va ɖona àmè ji lè èzã mèa nène.

³Hùenu kè mè àmèwo la nɔ̀ gblɔ̃ be: “Fàfa sù àxue, eye mi lè èjì ɖèɖe mèa”, wàlɛbɛ ŋua tututu ye wo la crɔ̃ woa kpata. E la nɔ̀ sìgbè lekè èfu ɖù àmè lilina èfunɔ̀, eye mu teŋu sina lè e nu òa nène.

⁴Vɔ̀, nɔ̀viwo, mìawo yaa, mu nyi vìvìti mè ye mì lè, ne àzã kèa bèa va gbã mì do, sìgbè fìãfìtɔ nène ò.

⁵Đo, kɔ̀kɔ̀ɛ ku kedè mèviwo mìa kpata mì nyi, eye mu nyi èzã ku vìvìti mèviwo mi nyi ò.

⁶Ye ŋutia, mì mu gbà na mia nɔ̀ dɔ̃ àlɔ̃, sìgbè àmè buwo nène ò, vɔ̀ bòhũ, mì na mia nɔ̀ ŋùzɔ̃, eye mia nɔ̀ ŋùmè kɔ̀kɔ̀ɛ.

⁷Èzã mè ye wo dɔ̃na àlɔ̃, eye èzã mè ye wo muna àhà.

⁸Vɔ̀ ekè miawo, mi nyi kedè be sumɔ̃viwo ŋutia, mì na mia nɔ̀ ŋùmè kɔ̀kɔ̀ɛ. Miabe *àkɔtakpoxɔ̀nu ne nyi xɔ̀sè ku lɔ̃lɔ̃, eye mia cɔ̃ hlùɛ̃gã be ŋùɖo be ègàkuku.

⁹Đo, Mawu mu ɖo è ɖɛ be yèbe àdɔ̀mèzea ne crɔ̃ mi ò, vɔ̀ bòhũa, be yèa to mia Tɔhonɔ̀ Yesù Kristò ji, la hlùɛ̃ mi gã.

¹⁰Kristò ye ku ɖo mia ta, àleke be, ne mi lè àgbè ò, àlo ne mi ku ò, mia nɔ̀ ku ì.

¹¹Ye ŋutia mì do ŋusɛ̃ mìa nɔ̀nɔwo, eye mìa do àlɔ̀ mìa nɔ̀nɔwo, sìgbè lekè mì le wɔ̀ ɛ̀ vɔ̀a nène.

¹²Nɔ̀viwo, mi le ɖè kuku na mì be mìa sɔ bùbu na àmè kèwo le wɔ̀ èdɔ lè mìa dòmèa, àmè kèwo Tɔhonɔ̀ cã, wo le kplɔ̀ mì, eye wo le fiɔ mì ènuawo.

¹³Mì na wo bùbu gã ɖe, eye mìa lɔ̃ wo, ɖo èdɔ kè wo le wɔ̀a ŋuti. Mì nɔ̀ fàfa mè ku mìa nɔ̀nɔwo.

¹⁴Nɔ̀viwo, mi le ɖo àɖàŋù na mì be mì gbe ènyà na kuviɔ̃tɔwo, mì do ŋusɛ̃ vɔ̃vɔ̃nɔ̀tɔwo, mì do àlɔ̀ àmè kèwo gbɔjɔ eye mì gbɔ̃ èjì ɖɛ blɛ̀wù ku àmè sia àmè.

¹⁵Mì kpɔ nyuɛ̃ ɖe ne àmè ɖekpe mu gbà ɖo èvuɛ̃ èvuɛ̃ tèpe ò, vɔ̀ bòhũa, mì ji ènyuɛ̃ na mìa nɔ̀nɔwo ku na àmè sia àmè, wè sia wè.

¹⁶Mì nɔ kpɔ jìjɔɛ gà sia gàmè.

¹⁷Mì nɔ fãkue wè sia wè.

¹⁸Mì do àkpe na Mawu ɖo ènu sia ènu ta, ɖo ekèa ye nyi ènu kè Mawu ji so mì, àmè kèwo le do èha ku Kristò Yesùa, si.

¹⁹Mì mu gbà ci Gbɔ̃gbɔ̃ a ò,

²⁰eye mì mu gbà do èvlo gblɔ̃ɖɛtɔwo be ènyà ò.

²¹Vɔ̀a, mì do ènu sia ènu kpɔ, ne mìa le ènu kè nyɔa ɖo àsi.

²²Mì si lè ènu vuɛ̃ ɖe sia ɖe xòmèvi gbɔ.

²³Mawu, Àmè kè nana fàfaa ŋutɔ ne kɔ̀ mìa ŋuti keŋu-keŋu. Ne na mìabe gbɔ̃gbɔ̃, èkla ku ŋutilã ne nɔ̀ gãgã ɖe, ŋùmèkãkã mà ɖo, gbè kè gbè mia Tɔhonɔ̀ Yesù Kristò la trɔvaa.

²⁴Ànùkuaɖe ye nyi Àmè kè yɔ mìa, e ye ke la wɔ̀ ɖo ènu kèawo keŋu ji.

²⁵Nɔ̀viwo, mì fãkue ɖo mia cã, mia ta.

²⁶Mi do ègbè na nɔ̀viwo keŋu nyuɛ̃ ɖe!

²⁷Mù le biɔ so mìa si, sìgbè lekè Tɔhonɔ̀ jia nène, be mìa hlɛ̃ xoma kèa na èhamètɔwo keŋu.

²⁸Mia Tɔhonɔ̀ Yesù Kristò be màje ne nɔ̀ ku mì.