Read gen Yosùa 14 Bible Online

Yosùa 14 - gen bible

Yosùa 14

¹Ekèa ye nyi ècrɔ̃-nyigbã kè Izràɛlviwo xɔ̀ lè Kanàn-nyigbã jia, ècrɔ̃nu kè ye hũbonɔ Eleazàr ku Nun be èvi ŋusù Yosùa kudo xòmègawo mã na Izràɛl be kɔ̀ta mèviwo a:

²Sìgbè àlekè Tɔhonɔ̀ do è àsi na Mosè ne kɔ̀ta àsiɖèkɛ ku èfã nènea, wo wɔ̀ cãcã, sɔ mãa ànyigbã na àmè sia àmè.

³Ɖo Mosè na ècrɔ̃-nyigbã kɔ̀ta àmè èvè ku kɔ̀ta ɖèka be mamã mè lè Yɔrdàn be àgo ɖèa ji, vɔ̀ mu na Levìwo crɔ̃-nyigbã lè kɔ̀ta kpɔ̀tɛawo mè ò.

⁴Nyàwo, Yosɛ̀f be viwo mã ɖo kɔ̀ta èvè mè, Manasè ku Efràyim, eye wo mu na tèpe ɖekpe Levìwo lè ànyigbã ji ò, sɔ wu be woa zɛ̃ èdùwo mè, ne woabe èlãhawo woa kpɔ ègbeɖùpe, be woa gbà ɖo tèpe na woabe àdɔ̀kùnuwo.

⁵Nène a ye Izràɛlviwo mã ànyigbã, sɔ zɔ̃ ɖo ègbè kè Tɔhonɔ̀ do àsi na Mosè a ji.

⁶Yudà be kɔ̀ta be viwo va yì kpɔ Yosùa lè Gilgàl eye Kàlɛb nyi Yefunè be vi ŋusù so Kenàz be hɛ̃nua, gblɔ̃ na ɛ̀ be: “Wò nya ènyà kè Tɔhonɔ̀ gblɔ̃ na Mosè kè nyi Mawu be àmèa so è nyè gbàkudo èwò ŋuti lè Kàdɛs-Bàrneà nyuɛ̃ ɖe.

⁷Mù le ɖo èpè èkà wàlɛbɛ kè Tɔhonɔ̀ be sumɔ̃vi Mosè dɔ̃ mù so Kàdɛs-Bàrneà ne ma yì sã ŋùku lè ànyigbã kèa ji eye mù va ɖo ègbèa na ɛ̀ sɔ zɔ̃ ɖo jìjigbè nyèa ji pɛpɛpɛ.

⁸Ekè nɔ̀vi nyè kèwo kplɔ̀ mù yìa, wo le do àdìkasoe na dùkɔ̃a, nyè ya mù sègbè na Tɔhonɔ̀ Mawu nyè.

⁹Gbè ŋua gbèa, Mosè kã àtãŋu kèa be: “Ɛ̃ɛ, ànyigbã kè ji àfɔ̀ wò toa la nyi èwò ku jìjimèvi wòwo tɔ̀ ɖo wò nɔ̀ ègbè ji na Tɔhonɔ̀, Mawu nyè.”

¹⁰Eye, kpɔɖa èpè èkà ci àtɔ̃ ye va yì fifì kè Tɔhonɔ̀ na mù nɔ̀ àgbè sɔ zɔ̃ ɖo yebe ènyà kè be gblɔ̃ na Mosè wàlɛbɛ kè ye Izràɛlviwo gbà le zɔ̃ lè zògbèa jia; fifìa mù sĩ xɔ̀ èpè èkà èvè ci àtɔ̃.

¹¹Egbèa mù gbà ɖo ŋusɛ̃ sìgbè àlekè be nɔ̀ àsi nyè wàlɛbɛ kè Mosè dɔ̃ mù sã nène. Ŋusɛ̃ kè lè àsi nyè fifìa, gbà lè sìgbè ŋusùti wɔ̀ àhùa tɔ̀ nène. Mù gbà sɔ̀gbè la wɔ̀ èdɔ ɖekpekpe.

¹²Yeŋutia, so èto nyigbã kè ŋuti Tɔhonɔ̀ pò nupo so gbè ŋua gbèa na mù, ɖo wò sè gbè ŋua gbè ke be àgbògbò be èdù gãwo lè funu eye Anàk be viwo lè woa mè. Tamunyɔ òa, Tɔhonɔ̀ la kpe ɖo ŋuti nyè eye mù la xɔ̀ èdù kèawo sìgbè àlekè Tɔhonɔ̀ ŋutɔ gblɔ̃a nène.”

¹³Yosùa tu sì na Kàlɛb, Yefunè be vi ŋusùa eye be sɔ Hebrɔ̀n sɔ ɖù ècrɔ̃ na ɛ̀.

¹⁴Ènu kè ŋuti ye Hebrɔ̀n nyi ècrɔ̃ na Yefunè be vi ŋusù, Kàlɛb kè so Kenàz be hɛ̃nu kaka va na egbè ɖo e nɔ̀ ègbè ji na Tɔhonɔ̀, Izràɛl be Mawu a.

¹⁵Wo yɔna Hebrɔ̀n be èdùa sã be Kirìat-Arbà: Arbà kè nyi ŋusù kè jɔ̀ àsu lè Anàk be viwo kpata dòmèa. Eye ànyigbã kpɔ ŋuti fàfa, ɖo àhùa wɔ̀wɔ tɔtè.