Read gen Yosùa 15 Bible Online

Yosùa 15 - gen bible

Yosùa 15

¹Ànyigbã kè wo na Yudà be kɔ̀ta-viwo sɔ zɔ̃ ɖo woabe hɛ̃nu jia, kèkè so Edɔ̀m be lipò ji, yì Sin [6] be zògbè kè lè Nègev be ànyigbã ji, lè kaka àpùgo.

²Àpùgo be lipòa so èjè be àpùa [7] to lè kaka àfi kè ànyigbã ɖo àpùa mè lè sìgbè àɖe nène, kpãŋùkɔ̀ Nègev,

³eye be zɔ̃ nène yì àpùgo lɔ̀ge tùtà akràbim [8] be èkpoa ji, to Sin be zògbèa, gbà trɔ yì àpùgo lè Kàdɛs-Bàrneà, to Hɛsrɔ̀n yì kaka Àdar trɔ va tùtà Karkà,

⁴to Asmɔ̀n zɔ̃ yì Ejiptè be ètɔ̀ sàsra, va yì vɔ̀ ɖo àpù mè. “Ekèa ye la nyi mìabe lipò lè àpùgo.”

⁵Èwèzɛ̃pe be lipòa so èjè be àpùa to yì kaka Yɔrdàn be ètɔ̀a be vɔ̀vɔ nu. Lè èvègo lɔ̀gea, lipòa so ètɔ̀ via gbɔ yì Yɔrdàn be ètɔ̀a be vɔ̀vɔ nu.

⁶Lipòa yì Bɛt-Hoglà, yì to èvègo ne Bɛt-Àrabà kaka jè Rubɛ̀n be vi ŋusù Bohàn be èkpea gbɔ;

⁷Lipòa zɔ̃ Akɔ̀r be bàlìa mè yì Devìr, e pò e mè lè èvègo tùtà Gilgàl kè kpãŋùkɔ̀ Adumim be èkpoa, lè ètɔ̀ sàsra be àpùgo. E to Ein-Cemès be èsìawo gbɔ lɔ̀ge yì tɔtè ɖo Ein-Rogɛ̀l[9].

⁸Eye lipòa Bɛn-Hinɔ̀m be bàlìa mè lè Yebusìtɔwo be èkpoa be àpùgo lɔ̀ge, e gɔ̃mè ye nyi Yèruzàlɛm; e yomè a lipòa yì kaka èto kè lè Hinɔ̀m be bàlìa be ŋùkɔ̀a, be ètamè lè èwèɖoxɔ̀pe, lè Rèfaimtɔwo be gbàjà ji yì vɔ̀vɔnu lè èvègo lɔ̀ge.

⁹So ètoa be ta mèa, lipòa yì Nèftoà be èsìawo be jɔ̀sope, to èdù kèwo lè Efrɔ̀n be ètoa jia mè, eye e yì ɖo Balà lɔ̀ge, ekè wo gbà yɔna be Kirìat-Yearìm.

¹⁰So Balà, lipòa xa lè èwèɖoxɔ̀pe yì Seir be ètoa gbɔ lɔ̀ge to àvewo be ètoa be àxà ji lè èvègo, e gɔ̃mè ye nyi Kèsalɔ̀n, trɔ ɖiɖi va Bɛt-Sɛmès eye e gbà yì to Timnà.

¹¹E yomè a, lipòa zɔ̃ to Ekrɔ̀n be èdùa xa lè èvègo, yì xa lè Sikarɔ̀n to Balà be ètoa kpe do yì Yavnèl eye e vɔ̀ ɖo àpù [10] mè.

¹²Èwèɖoxɔ̀pe be lipòa nyi àpù gã ku yebe àgowo ji. Ekèawo ye nyi Yudàviwo be lipòwo gòdò va kpe sɔ zɔ̃ ɖo woabe hɛ̃nu ji.

¹³Na Yefunè be vi ŋusù Kàlɛb, wo na ɛ̀ Yudàviwo be ànyigbã be àkpa ɖe sɔ zɔ̃ ɖo ègbè kè Tɔhonɔ̀ do àsi na Yosùaa ji. E xɔ̀ Kirìat-Arbà àlo Arbà be èdù, kè gbà nyi Hebrɔ̀n. Arbà nyi Ànakìviwo be tɔgbe-tɔ̀gbè.

¹⁴Kàlɛb xɔ̀ ànyigbã lè Anàk be jìjimè vi ŋusù ètɔ̃ kèawo si: Sesaì be hɛ̃nu, Ahimàn be hɛ̃nu ku Talmaì be hɛ̃nu.

¹⁵So funua e yì wɔ̀ àhùa ku Devìr-tɔwo, èdù kè wo yɔna sã be Kirìat-Sefɛ̀r.

¹⁶Kàlɛb gblɔ̃ be: “Àmè kè la teŋu wɔ̀ àhùa ku Kirìat-Sefɛ̀r tɔwo la ɖù woa jia, mù la sɔ èvi nyè nyɔ̃nùvi Aksà [11] na ɛ̀, bèa ɖè.”

¹⁷Kenàz [12] be vi ŋusù Ɔtnìɛl kè nyi Kàlɛb be àtàviyɔvia, wɔ̀ àhùa, ɖù èdùa ji eye Kàlɛb sɔ èvia nyɔ̃nù Aksà na ɛ̀ be ɖè.

¹⁸Vɔ̀, kè Aksà gbe yì àsuxue kpòa, e zĩ èsrɔ̃a Ɔtnìɛl ji ne bèa biɔ àgblè nyigbã ètɔa Kàlɛb. E va ɖì lè èsɔ àkɛtɛa ji eye Kàlɛb gblɔ̃ na ɛ̀ be: “Nukɛ wò le ji ò?”

¹⁹Eye e ɖo e ŋuti be: “Lɔ̃ ne wòa tu sì ɖo ènu kè mù la biɔ wòa ji. Kè e nyi be wò na mù Nègev be ànyigbã xoxo vɔ̀a, na mù èsìdoawo cã.” Nène a ye e sɔ èsìdo kèwo lè èto ji ku kèwo lè bàlìa mèa, na ɛ̀.

²⁰Ekèa ye nyi Yudà be kɔ̀ta be viwo be ècrɔ̃ zɔ̃ ɖo woabe hɛ̃nuwo ji.

²¹Èdù kèwo ye lè Yudà be viwo be kɔ̀ta be ànyigbã be vɔ̀vɔnu lè Edɔ̀m be lipòa gbɔ, lè Nègev-to nyigbã jia, wo nyi: Kabsɛ̀l, Edɛ̀r, Yàgur,

²²Kinà, Dìmɔnà, Àdeadà,

²³Kedɛ̀s, Hasɔ̀r, Yitenàm

²⁴Zif, Telɛ̀m, Bealɔ̀t

²⁵Hasɔ̀r-Hadatà, Kerìɔt-Hesrɔ̀n kè gbà nyi Hasɔ̀r,

²⁶Amàn, Cemà, Mɔladà,

²⁷Hasàr-Gadà, Hɛsmɔ̀n, Bɛt-Pelɛ̀t

²⁸Hasàr-Suàl, Bɛr-Cedà, Bìyoteyà[13],

²⁹Balà, Iyìm, Esɛ̀m,

³⁰ɛltolàd, Kèzil, Hɔrmà,

³¹Siklag, Màgmanà, Sànsanà,

³²Lèvàɔt, Sìlehìm, Ayìn, Rimɔ̀n: woa kpata lè èdù wìvɔ àsiɖèkɛ, ku kɔpe kèwo bɔ̀ ɖo woa ŋutia.

³³Èdù kèwo lè ètokɔ̃ɛa jia nyi: Estàɔl, Soreà, Asnà,

³⁴Zànɔa, Eìn-Gànim, Tapùa, Einàm,

³⁵Yàrmut, Adulàm, Sokò, àzekà,

³⁶Sàraìm, Adìtaìm, Gederà, Gèderòtaìm: woa kpata le nyi èdù woènè ku woabe kɔpewo.

³⁷Èdù buwo cã nyi Senàm, Hadasa, Migdà-Gad

³⁸Dìleàn, Mispɛ̀, Yɔktɛ̀l,

³⁹Làkis, Bɔskàt, Eglɔ̀n,

⁴⁰Kabɔ̀n, Lahmàs, kìtilìs,

⁴¹Gèderɔ̀t, Bɛt-Dagɔ̀n, Namà, Màkedà: woa kpata lè èdù woeàdɛ̃ ku woabe kɔpewo.

⁴²Èɖewo cã nyi: Libnà[14], Etɛ̀r, Asàn,

⁴³Yiftà, Asnà, Nesìv,

⁴⁴Keilà, Àkzib, Màresà: woa kpata lè èdù àsiɖèkɛ ku woabe kɔpewo.

⁴⁵Ekrɔ̀n ku èdù kèwo lè gɔ̃mè na ɛ̀a ku woabe kɔpewo;

⁴⁶so Ekrɔ̀n va yì èwèɖoxɔ̀pea, èdù kèwo gogo Asdɔ̀d ku woabe kɔpewo;

⁴⁷Asdɔ̀d ku èdù kèwo lè gɔ̃mè na ɛ̀a kudo woabe kɔpewo, Gazà ku èdù kèwo lè gɔ̃mè na ɛ̀a kudo woabe kɔpewo kaka yì Ejiptè be ètɔ̀ sàsra to, yì àpù gã kudo yebe àgowo ji.

⁴⁸Èdù kèwo lè ètoa jia nyi: Samìr, Yatìr, Sokò,

⁴⁹Dànà, Kirìat-Sanà, kè gbà nyi Devìr,

⁵⁰Anàv, Ɛstemò, Anìm,

⁵¹Gosɛ̀n, Holɔ̀n, Gilò, wo lè èdù woeɖèka ku woabe kɔpewo.

⁵²Aràv, Dumà, Ɛseàn,

⁵³Yanùm, Bɛt-tapùa, Àfɛk,

⁵⁴Hùmetà, Kirìat-Arbà, kè gbà nyi Hebrɔ̀n, Siɔ̀r; wo lè èdù àsiɖèkɛ ku woabe kɔpewo.

⁵⁵Maɔ̀n, Karmèl, Zif, Yutà,

⁵⁶Yìzrɛl, Yɔ̀kdeàm, Zànɔa,

⁵⁷Kaɛ̃, Giveà, Timnà; wo lè èdù èwo ku woabe kɔpewo.

⁵⁸Halhùl, Bɛt-Sùr, Gedɔ̀r,

⁵⁹Maràt, Bɛt-Anɔ̀t, Ɛltekɔ̀n; wo lè èdù àdɛ̃ ku woabe kɔpewo.

⁶⁰Kirìat-Baal, kè gɔ̃mè ye nyi Kirìat-Yearìm, Rabà; wo lè èdù èvè ku woabe kɔpewo.

⁶¹Èdù kèwo lè zògbè jiawo nyi: Bɛt-Àrabà, Midìn, Sèkakà,

⁶²Nivsàn, Ir-Mɛlà, Eìn-Gɛ̀di; wo lè èdù àdɛ̃ ku woabe kɔpewo.

⁶³Yudà be jìjimèviwo mu teŋu nyà Yebusìtɔ [15] kèwo lè Yèruzàlɛm-a ò. Ekèa ye wɔ̀ be Yudà be jìjimèviwo ku Yebusìtɔwo lè èdu lè Yèruzàlɛm kaka va na egbè.