Read gen Yosùa 16 Bible Online

Yosùa 16 - gen bible

Yosùa 16

¹Yosɛ̀f be viwo [16] be ànyigbã so Yɔrdàn be ètɔ̀a to lè Yerikò be èdùa gbɔ, zɔ̃ yì Yerikò [17] be èsìawo to lè èwèzɛ̃pe; eye e nyi zògbè ɖèɖe so Yerikò yì Betɛ̀l be ètoa ji.

²E jo lè Betɛ̀l va ɖo Luz[18], yì to Arkìtɔwo be lipòa gbɔ lè Àtarɔ̀t,

³trɔ ɖiɖi va èwèɖoxɔ̀pe lè Yafletìtɔwo be lipò gbɔ yì kaka Bɛt-Horɔ̀n-vi, gbà yì Gezɛ̀r va yì kɔ̀ ɖo àpù mè.

⁴Ekèawo ye nyi ànyigbã kèwo ye Yosɛ̀f be vi Manasè [19] ku Efràyim, wo xɔ̀a.

⁵Ekèa ye nyi Efràyim be viwo be lipò sɔ zɔ̃ ɖo woabe hɛ̃nuwo ji: lè èwèzɛ̃pea, lipòa so Atrɔ̀t-Adàr va kaka Bɛt-Horɔ̀n-gã.

⁶Lipòa zɔ̃ to èwèɖoxɔ̀pe yì Mìkmetàt lè èvègo eye e trɔ ɖo ta Ta-Nàt-Silò lè èwèzɛ̃pe, eye e to e ŋuti yì Yanɔhà lɔ̀ge.

⁷E yomè a, e trɔ so Yanɔhà va Àtarɔ̀t ku Nàratà, yì Yerikò pò e mè kɔ̀ ɖo Yɔrdàn be ètɔ̀a to.

⁸So Tapùa, lipòa yì èwèɖoxɔ̀pe lɔ̀ge lè Kanàn be ètɔ̀ sàsra sɛ̃ŋu to yì vɔ̀ ɖo àpù mè. Ekèa ye nyi Efràyim be viwo be kɔ̀ta be ècrɔ̃-nyigbã zɔ̃ ɖo woabe hɛ̃nu ji,

⁹wàlɛbɛ ke wo mu hlɛ̃ èdù kèwo wo ɖè ɖovò ne Efràyim be viwo lè Manasè be viwo be crɔ̃-nyigbã ji òa, èdù kèawo ku woabe kɔpewo.

¹⁰Vɔ̀a, wo mu xɔ̀ ànyigbã lè Kanàntɔ kèwo lè Gezɛ̀r [20] be èdùa si ò; nènea ye wo kpɔ̀tɔ̀ lè Efràyim be jìjimè viwo dòmè kaka va na egbè, ɖe kpò wo zĩ kluvi nyinyi be èdɔwo ɖo woa ji.