Read gen Yosùa 17 Bible Online

Yosùa 17 - gen bible

Yosùa 17

¹Manasè kè nyi Yosɛ̀f be vi ŋusù cucugbãa be jìjimè viwo cã xɔ̀ woabe crɔ̃-nyigbã. Wo sɔ Gilead ku Basàn sɔ na Màkirò, kè nyi Manasè be vi ŋusù àmègãxotɔa eye be gbà jì Gilead, ɖo e nyi ŋusù àhùawɔ̀tɔ.

²Wo na ànyigbã Manasè be vi ŋusù kpɔ̀tɛawo sɔ zɔ̃ ɖo woabe hɛ̃nu kèawo ji: Abiezɛr be viwo, Helɛ̀k be viwo, Asrìɛl be viwo, Sikɛ̀m be viwo, Hefɛ̀r ku Semidà be viwo kpoeɖea, Manasè be vi ŋusùwo ke gbà nyi Yosɛ̀f be vi ŋusùwo sɔ zɔ̃ ɖo woabe hɛ̃nuwo ji.

³Selofehàd kè nyi Hefɛ̀r be vi ŋusù, Gilead be vi ŋusù, Màkirò be vi ŋusù Manasè be vi ŋusùa, mu jì èvi ŋusù ɖekpe ò, vɔ̀ jo jì nyɔ̃nùviwo sɔ̃ŋu. Woawo ye nyi: Mahlà, Nɔxà, Hoglà, Milkà ku Tirsà.

⁴Wo bɔ̀ yì Hũbonɔ Eleazàr, ku Nun be vi ŋusù Yosùa ku àgbònùglawo gbɔ eye wo gblɔ̃ be: “Tɔhonɔ̀ do ègbè àsi na Mosè be, ne sɔ crɔ̃-nyigbã na mi lè mia nɔ̀vi [21] ŋusùwo dòmè!” Wo sɔ ɛ̀ na wo, sìgbè àlekè Tɔhonɔ̀ ɖo è ɖɛa nène. Wo xɔ̀ crɔ̃-nyigbã lè woa tɔ be vi ŋusùwo dòmè.

⁵Nène a ye Manasè be kɔ̀ta xɔ̀ ànyigbã àkpa èwo buwo to vò lè Gilead ku Basàn nyigbã kèwo lè Yɔrdàn be àgo ɖe a jiawo ŋuti.

⁶Nyàwo, Manasè be vi nyɔ̃nùwo xɔ̀ crɔ̃-nyigbã lè woa tɔ be viwo dòmè, vɔ̀ Gilead nyigbã nyi Manasè be vi ŋusù kpɔ̀tɛawo tɔ̀.

⁷Manasè be ànyigbã be lipò so Àsɛr lè Mikèmetà kè jè ŋùkɔ̀ Sikɛ̀m, e yì Yamìn ku Yàsivè lɔ̀ge lè In-Tàpuatɔwo gbɔ.

⁸Tapùa be àgowo kpata nyi Manasè tɔ̀, vɔ̀ Tapùa be èdùa ŋutɔ nyi Efràyim be viwo tɔ̀.

⁹Lipòa yì Kanàn be ètɔ̀ sàsraa to lè àpùgo. Èdù ŋuawo nyi Efràyim tɔ̀ lè Manasè be èdùwo dòmè. Manasè be lipòa so ètɔ̀a be èvègo [22] yì kɔ̀ ɖo àpùata.

¹⁰Lè àpùgoa, Efràyim be ànyigbã eye lè èvègoa, Manasè be ànyigbã; àpùgã do lipò na wo. Eye wo do lipò ku Àsɛr lè èvègo, gbàkudo Isakàr lè èwèzɛ̃pe.

¹¹Lè Isakàr ku Àsɛr be ànyigbãwo jia, Manasè xɔ̀ Bɛt-Seàn, Yìblèam ku woabe kɔpewo, Dɔr, In-Dɔr, Tanàk, Mègidò be dùkɔ̃wo ku woabe kɔpe, èdù [23] ètɔ̃gɔ̃a lè Dɔr be ànyigbã gbàjàa ji.

¹²Vɔ̀a, Manasè be viwo mu teŋu va xɔ̀ èdù ŋuawo ò, eye Kanàntɔ ɖewo kpɔ̀tɔ̀ ci ànyigbã a ji.

¹³Wàlɛbɛ kè ye Izràɛlviwo va ɖo ŋusɛ̃a, wo sɔ Kanàntɔ ŋuawo ɖo kluvi be mɔnu vɔ̀ wo mu teŋu xɔ̀ ànyigbã ya lè woa si ò.

¹⁴Yosɛ̀f be viwo va gblɔ̃ na Yosùa be: “Tɔhonɔ̀ tu sì na mi eye mi sùgbɔ ŋutɔ vɔ̀ nukɛ ŋuti ye wò sɔ crɔ̃ nyigbã be àkpa ɖèka kpò na mi ò?”

¹⁵Yosùa ɖo e ŋuti na wo be: “Ne Efràyim be ètoa ma teŋu sù mì ò, ɖo miabe gbɔsùsu ŋutia, mì ɖota àvea mè ne mìa yì ji tèpe lè Perizì ku Refàyitè tɔwo be ànyigbã ji.”

¹⁶Yosɛ̀f be viwo ɖo e ŋuti na ɛ̀ be: “Nyàwo be nyi be èto-nyigbã mu la sù mi ò, vɔ̀ Kanàntɔ kèwo keŋu lè Bɛt-Sèan ku yebe èdùwo mè, yì kɔ̀ ɖo Yìzrɛl-nyigbã jia, wo ɖo gàkpo be àhùa-kèkeviwo[24].”

¹⁷Eye Yosùa gblɔ̃ na Yosɛ̀f be àxuedo, Efràyim [25] be viwo ku Manasè be viwo be: “Wò sùgbɔ ŋutɔ eye wò ɖo ŋusɛ̃; wò mu ɖo la xɔ̀ ànyigbã be àkpa ɖèka kpò ò.

¹⁸Vɔ̀ wò la xɔ̀ èto-nyigbã. Togbɔ be e nyi àve ŋutɔ cãa, wò la pò è eye wò la ji tèpe kaka yì kɔ̀ ɖo yebe lipòwo nu. Nène a ye wò la nyà Kanàntɔwo, la xɔ̀ ànyigbã a, togbɔ be wo ɖo ègà-hùa-kèkewo gbà ɖo ŋusɛ̃ ŋutɔ cãa.”