Read gen Yosùa 2 Bible Online

Yosùa 2 - gen bible

Yosùa 2

¹Yosùa, Nun be vi ŋusùa, dɔ̃ ŋusù èvè so Sitìm be àsàɖa mè lè bèbe mè gblɔ̃ be: “Mì yì sã ŋùku lè ànyigbã a ji ku Yerikò.” Ekè wo yì Yerikòa, wo yì zɛ̃ àhasìtɔ ɖe, kè wo yɔna be Ràhab gbɔ eye wo ci funua dɔ̃.

²Wo yì sà sàkplɛ na Yerikò be èfìɔa gblɔ̃ be: “Nène ye Izràɛl be ŋusù èvèwo va gɛ̃ ɖo èdùa mè egbè zã mè, ne woa sã ŋùku kpɔ tèpeawo.”

³Nène a, Yerikò be èfìɔa dɔ̃ àmè ɖoɖa Ràhab gbɔ gblɔ̃ be: “Ɖè ŋusù èvè kèwo va gbɔ wòa to, àmè kèwo va zɛ̃ àpo àxo mèa, ɖo ne woa va sã ŋùku gòdòa ŋuti ye wo zɛ̃ gbɔ wò ɖo.”

⁴Vɔ̀a, nyɔ̃nùa sɔ ŋusù èvèawo wla. E yomè a, e gblɔ̃ be: “Ɛ̃ɛ, nyàwo ye ŋusù èvè kèawo va gbɔ nyè, vɔ̀a nyè mu nya fikè wo to ò.

⁵Ekè e nyi be vìvìti mè ye wo tuna èdùa be àgbowo lèa, ŋusù kèawo to jo. Eye nyè mu nya àfi kè wo yìa cã ò. Mì jè woa yo mè kaba ne mìa teŋu kè ɖo woa ŋuti.”

⁶Lè nyàwo toto mèa, e sɔ wo wla ɖo àlɛ̃ŋudàti kèwo e sia ɖo yebe èxɔ̀ ta gbàjàa mè.

⁷Àmèdɔ̃dɔ̃awo jè woa yomè àfɔsi-àfɔsi yì Yɔrdàn be àgo ji, tùtà àfi kè wo la sò ètɔ̀a lè ku àfɔ̀a, eye wo tu èdù-gboa ekè àmèdɔ̃dɔ̃awo to jo kpòa.

⁸Keŋu gbɔ̀xue ŋusù èvèawo la mlɔ̃ ànyi a, Ràhab yì woa gbɔ lè èjia,

⁹eye e gblɔ̃ na wo be: “Mù nya be Tɔhonɔ̀ sɔ ànyigbã kèa na mì, e ye na be vɔ̃vɔ̃ gã ɖe jè mia ji kaka be dùkɔ̃a kpata hũhũ lè mìabe ŋùkɔ̀,

¹⁰ɖo, mi sè be Tɔhonɔ̀ na keti be àpùa pu lè ŋùkɔ̀ na mì wàlɛbɛ kè mì to jo lè Ejiptè a, gbà wua, ènu kè mì wɔ̀ ku Àmorì be èfìɔ èvèawo Sihɔ̀n ku Ɔg lè Yɔrdàn godo, eye mì gũ woabe ènu nɔ̀ àmèsiwoa.

¹¹Mi sè ekèa eye miabe jìdoa jo bu keŋu-keŋu; àgbɔ̃ ciji na mi àmètɔ̀ àmètɔ̀ lè mìabe ŋùkɔ̀, ɖo Tɔhonɔ̀ mìabe Mawu a nyi Mawu kè lè èjihũi gbà lè èdò lè ànyigbã ji.

¹²Eye fifìa, mì kã àtãŋu na mù to Tɔhonɔ̀ ji be sìgbè àlekè mù hlùɛ̃ mìabe àgbè gãa, mìa cã mì la hlùɛ̃ àpe xòmèa be àgbè gã. Mì na mù jèsìdo ɖe

¹³be mì la hlùɛ̃ ètɔ nyè, ènɔ̀ nyè, nɔ̀vi nyè ŋusùwo, nɔ̀vi nyè nyɔ̃nùwo, ènu ɖekpe kè nyi woa tɔ̀awo gã eye mì mu la crɔ̃ mi ò.”

¹⁴Ŋusù èvèawo gblɔ̃ na ɛ̀ be: “Ne mì mu gbe ɖè miabe susua sia ò kpòa, miabe àgbèa la nyi ɖoŋuti na xòmè wòa be àgbè. Ne Tɔhonɔ̀ ɖè èdùa do àsi na mia, eŋuã mi la wɔ̀ ɛ̀ sìgbè àlekè mi kã àtãŋua nène eye mi la kɔ̀ àdɔ̀mè ɖo ŋuti wò.”

¹⁵E yomè a, Ràhab na wo to flɛsɛ̀, ɖiɖi to èkà ŋuti, fla èdùa be kpaa jo yì, ɖo yebe àxuea tɛ ɖo èdù-kpaa ŋuti eye funu ye e nɔ̀nà.

¹⁶E gblɔ̃ na wo be: “Mì si yì ètoa ji ne mìabe yomètĩtɔwo mu gbà va kè ɖo mìa ŋuti ò; mì yì bè ɖo funu ŋùkèkè ètɔ̃ ne mìabe yo mètĩtɔwo woa trɔ gbɔ̀. E yomè a, mì la teŋu le mìabe èmɔ̃a fàfa ɖe.”

¹⁷Ŋusùawo gblɔ̃ na Ràhab be: “Kpɔ àlekè mi la wɔ̀ ɖo àjɔ̀gbè kè mi fìã na wòa ji ɖoa ye nyi ekèa:

¹⁸Wàlɛbɛ kè mi la gɛ̃ ɖo ànyigbã a jia, wò la sã èkà jɛ̃ kèa ɖo flɛsɛ̀ kè nu wò na mi ɖì toa; wò la bɔ̀ ètɔ wò, ènɔ̀ wò, nɔ̀vi wòwo ku àpo xòmèa kpata ɖodu.

¹⁹Ne àmè ɖe do àta àgbo wòa jè àgboa godoa, yebe èhũa la kɔ̀ ɖo ye ŋutɔ be èta ji, eye mu kã mi ò, vɔ̀ ne àmè ɖe ku lè àmè kèwo la nɔ̀ gbɔ wò lè àpo àxomèa dòmèa, yebe èhũ la kɔ̀ ɖo mia ji.

²⁰Vɔ̀a, ne wò va yì gbã miabe ɖoɖo a, eŋuã ènu ɖekpe mu la gbà bla mi ɖo àtãŋu kè wò na mi kã ŋuti ò.”

²¹E gblɔ̃ be: “Ne nyi sìgbè àlekè mì gblɔ̃a nène!” Eŋuã yomè a, e ɖo wo eye wo jo yì. Eye e sã èkà jɛ̃a ɖo flɛsɛ̀a ŋuti.

²²Wo jo yì ètoa ji, yì nɔ̀ funua ŋùkèkè ètɔ̃ kaka na gà kè mè àmè kèwo jè woa yomè a trɔ gbɔ̀a. Co woabe yomètĩtɔwo ji wo lè èmɔ̃a ji kaka wo mu kè ɖo woa ŋuti ò.

²³Nène a, ŋusù èvèawo trɔ ɖì so ètoa ji, va le èmɔ̃ jo yì Nun be vi ŋusù Yosùa gbɔ eye wo yì ɖè ènu kèwo keŋu wo kpɔa na ɛ̀.

²⁴Wo gblɔ̃ na Yosùa be: “Nyàwo ye nyi be Tɔhonɔ̀ ɖè ànyigbã kèa kpata do àsi na mi eye dùkɔ̃a hũhũ lè miabe ŋùkɔ̀.”