Read gen Yosùa 20 Bible Online

Yosùa 20 - gen bible

Yosùa 20

¹[36] Lè ekèa yomè a, Tɔhonɔ̀ pò nupo na Izràɛl be dùkɔ̃a to Yosùa ji gblɔ̃ be:

²“Gàmè sù ne mìa cã ètocɔ̃ànyipe be èdù kèwo be nyà mù gblɔ̃ na mì sã to Mosè jia.”

³Èdù kèwo mè èhlɔ̃dãtɔa la si yì nɔ̀ ne e tɔ̀ be mu jro àlo nya gbɔ̀xue wù nɔ̀via òa. E kèa la nyi mɔnu ne bèa si lè àmè kè le ji la biɔhlɔ̃a be ŋùkɔ̀.

⁴Ne hlɔ̃dãtɔa si yì èdù kèawo dòmètɔ ɖe mèa, e la yì nɔ̀tè lè èdùgbonu, la ɖè ènu kè jɔ̀ ɖo e jia na dùmèmègãwo. Dùmèmègãwo la xɔ̀ ɛ̀, la na ɛ̀ tèpe lè woa dòmè.

⁵Ne àmè kè le ji la biɔhlɔ̃a tĩ hlɔ̃dãtɔa yomè a, wo mu la ɖè e do àsi na ɛ̀ ò. Ɖo mu jro gbɔ̀xue do nɔ̀via èku ò, eŋuã ŋuti ye wo ɖo la xɔ̀ ènyà ɖo e ta ɖo.

⁶Hlɔ̃dãtɔa la nɔ̀ èdù ŋua mè kaka va na gà kè mè wo la ɖokòjo na ɛ̀ lè àgũtòpò. E la gbà nɔ̀ funu kaka va na gà kè mè hũbonɔ gã kè be hùenu ye ènyà jɔ̀ lèa, la ku. E yomè a, e la teŋu trɔ yì yebe àxomè lè èdù kè mè be si lè sã.

⁷Nène a ye Izràɛlviwo cã èdù ètɔ̃ lè Yɔrdàn-tɔ̀ sàsra be èwèɖoxɔ̀pe; woawo ye nyi: Kedɛ̀s lè Neftalì be kɔ̀ta be to-nyigbã ji lè Galilea, Sikɛ̀m lè Efràyim be kɔ̀ta be to-nyigbã ji ku Kirìat-Àrabà, kè wo gbà yɔna be Hebrɔ̀n lè Yudà be toa ji.

⁸Lè Yɔrdàn-tɔ̀ sàsra godo lè èwèzɛ̃pe lè Yerikò be kpotaa, Izràɛlviwo cã Besɛ̀r lè Rubɛ̀n be kɔ̀ta be zògbè ji, lè èkpota. Ramɔ̀t lè Gilead kè nyi Gad be kɔ̀taa tɔ̀a mè, ku Golàn lè Bocàm kè nyi Manasè be kɔ̀taa tɔ̀a mè.

⁹Èdù kèawo kpata le nyi ètocɔ̃ànyipe àlo wawlape na Izràɛlvi àlo àmèjro ɖekpekpe kè lè woa dòmèa. Nène a ye ne àmè ɖe wù àmè wàlɛbɛ kè mu nya àlo jro òa, e la si yì nɔ̀ funu ne hlɔ̃biɔtɔa mu gbà wù ì gbɔ̀xue ne dùkɔ̃a bèa ɖokòjo na ɛ̀ ò.