Read gen Yosùa 21 Bible Online

Yosùa 21 - gen bible

Yosùa 21

¹Kè Izràɛl be dùkɔ̃a sò kɔpe ɖo Silò kè lè Kanàn nyigbã jia gbɔa, Levì be kɔ̀ta be xòmègawo yì kpɔ hũbonɔ Eleazàr ku Nun be èvi Yosùa gbàkudo Izràɛl be kɔ̀ta kpɔ̀tɛawo be xòmègawo, gblɔ̃ na wo be:

²“Tɔhonɔ̀ do ègbè àsi na Mosè be woa na mi èdù kèwo mè mi nɔ̀ [37] ku àfi kèwo miabe èlãwo la nɔ̀a.”

³Eye Izràɛlviwo wɔ̀ ɖo Tɔhonɔ̀ be ègbè do àsia ji, sɔ woabe èdù be dòmètɔ ɖewo ku woabe èlãnyìpewo na Levìviwo.

⁴Kehàt [38] kè nyi Levì be èvi be jìjimèviwo ye xɔ̀ cucugbã to cãcã mè. Eye hũbonɔ Arɔ̀n kè nyi Kehàt be èvia be jìjimèviwo xɔ̀ èdù woètɔ̃ lè Yudà, Simeɔ̀n ku Bɛnyamìn be ècrɔ̃ nyigbãwo mè.

⁵Eye Kehàt be jìjimèvi kpɔ̀tɛawo xɔ̀ èdù èwo lè Efràyim, Dàn ku Manasè be kɔ̀ta be mamã mè be ècrɔ̃ nyigbãwo mè to cãcã mè.

⁶Levì be èvi Gɛrsɔ̀n be jìjimèviwo xɔ̀ èdù woètɔ̃ lè Isakàr, Àsɛr, Neftalì ku Manasè be kɔ̀ta be mamã mè èvègɔ̃a be ècrɔ̃ nyigbãwo mè to cãcã mè.

⁷Sɔ kù ɖo yebe xòmèwo ŋutia, Levì be èvi Merarì be jìjimè viwo xɔ̀ èdù woèvè lè Rubɛ̀n, Gad ku Zabulɔ̀n be kɔ̀ta be crɔ̃ nyigbãwo mè to cãcã mè.

⁸Izràɛlviwo sɔ èdù ŋuawo ku woabe èlãnyìpewo na Levìwo sɔ zɔ̃ ɖo Tɔhonɔ̀ be ègbè kè be do àsi na Mosè a ji.

⁹Lè Yudà be kɔ̀ta ku Simeɔ̀n be kɔ̀ta, wo sɔ èdù kèawo na

¹⁰Arɔ̀n be jìjimèvi kèwo to so Kehàt be hɛ̃nu mèa. Woawo ye wo na cucugbã.

¹¹Wo sɔ Kirìat-Àrabà[39], kè wo gbà yɔna fifì be Hebrɔ̀n lè Yudà be èto-nyigbã ji kudo woabe èlãnyìpewo na wo.

¹²Vɔ̀, wo sɔ àgblè ku kɔpe kèwo tɛ ɖo èdùa ŋutia na Kàlɛb kè nyi Yefunè be èvia.

¹³Sɔ kpe ɖo Hebrɔ̀n kè nyi ètocɔ̃ànyipe be èdùa ŋutia, Arɔ̀n be jìjimèviwo xɔ̀ èdù kèawo: Libnà

¹⁴Yatirò, Ɛstemɔ̀a,

¹⁵Holɔ̀n, Debirò,

¹⁶Ayìn[40], Yutà ku Bɛt-Semès. Èdù kèawo nyi èdù àsiɖèkɛ ku àfi kè woabe èlãwo yì ɖùnà ènu lèa. Èdù kèawo kpata lè Yutà ku Simeɔ̀n be crɔ̃-nyigbãwo ji.

¹⁷Wo na wo èdù ènè lè Bɛnyamìn be ànyigbã ji, woawo ye nyi: Gibeɔ̀n Gebà,

¹⁸Ànatɔt ku Almɔ̀n kudo àfi kè èlãwo yì ɖùnà ènu lèa.

¹⁹Ekèa kpata wɔ̀ èdù woètɔ̃ lè àkpa èvèa ku àfi kè woabe èlãwo yì ɖùnà ènu lèa.

²⁰Kehàt be hɛ̃nu kpɔ̀tɛawo xɔ̀ èdù ènè lè Efràyim be crɔ̃-nyigbã ji:

²¹èdùawo nyi Sikɛ̀m lè èto-nyigbã ji; Sikɛ̀m kè gbà nyi ètocɔ̃ànyi be èdùa, Gezɛ̀r,

²²Kìbsaìm ku Bɛt-Horɔ̀n kudo woabe àfi kè èlãwo yì ɖùnà ènu lèa.

²³Wo na wo èdù ènè lè Dàn be crɔ̃-nyigbã ji. Woawo ye nyi: Ɛltekɛ̀, Gìbetɔ̀n,

²⁴Ayalɔ̀n ku Gàtrimɔ̀n kudo fikè woabe èlãwo la yì ɖù ènu lèa.

²⁵Lè Manasè be èwèɖoxɔ̀pe be crɔ̃-nyigbã jia, wo xɔ̀ èdù èvè kèwo nyi Tanàk ku Yìblèam [41] ku fikè woabe èlãwo la yì ɖù ènu lèa.

²⁶Ekèa kpata wɔ̀ èdù èwo ku fikè woabe èlãwo la yì ɖù ènu lèa na Kehàt be hɛ̃nuviwo.

²⁷Levì be vi Gɛrsɔ̀n be hɛ̃nuviwo xɔ̀ èdù èvè lè Manasè be èwèzɛ̃pe nyigbã ji: Golàn kè nyi ètocɔ̃ànyipe lè Basàn ku Bɛ̀sterà ku fikè woabe èlãwo la yì ɖù ènu lèa.

²⁸Lè Isakàr be crɔ̃ nyigbã jia, wo xɔ̀ èdù ènè: Kisiɔ̀n, Dàveràt,

²⁹Yàrmut, In-Ganìm ku fikè woabe èlãwo la yì ɖù ènu lèa.

³⁰Lè Àsɛr be crɔ̃-nyigbã jia, wo xɔ̀ èdù ènè: Misàl, Abdɔ̀n,

³¹Hɛlkàt ku Rehɔ̀b ku fikè woabe èlãwo la yì ɖù ènu lèa.

³²Lè Neftalì be crɔ̃-nyigbã jia, wo xɔ̀ èdù ètɔ̃: Kedɛ̀s kè nyi ètocɔ̃ànyipe lè Galilea, Hamɔ̀t-Dɔr ku Kartàn ku fikè woabe èlãwo la yì ɖù ènu lèa.

³³Ekèa kpata wɔ̀ èdù woètɔ̃ ku fikè woabe èlãwo la yì ɖù ènu lèa na Gɛrsɔ̀n be hɛ̃nuviwo.

³⁴Levì be èvi Merarì be hɛ̃nuviwo xɔ̀ èdù ènè lè Zabulɔ̀n be crɔ̃-nyigbã ji, woawo nyi: Yokneàm, Kartà,

³⁵Dimnàh [42] ku Hàhalàl ku fikè woabe èlãwo la yì ɖù ènu lèa.

³⁶Lè Rubɛ̀n be crɔ̃-nyigbã ji, lè Yɔrdàn-tɔ̀ sàsra godo, jè ŋùkɔ̀ Yerikò be èdùa, wo xɔ̀ èdù ènè: Besɛ̀r kè nyi ètocɔ̃ànyipe lè ègbegbàjia ku Yàhaz,

³⁷Kedemɔ̀t ku Mefàt kudo fikè woabe èlãwo la yì ɖù ènu lèa.

³⁸Lè Gad be crɔ̃-nyigbã jia, wo xɔ̀ èdù ènè: Ramɔ̀t kè nyi ètocrɔ̃ànyipe lè Gilead ku Màhanàim,

³⁹Hɛsbɔ̀n ku Yazɛ̀r kudo fikè woabe èlãwo la yì ɖù ènu lèa.

⁴⁰Ekèa kpata wɔ̀ èdù woèvè ku fikè woabe èlãwo la yì ɖù ènu lèa, na Merarì be hɛ̃nuviwo.

⁴¹Levì be jìjimèviwo xɔ̀ èdù èkà-ci-ènyi ku fikè woabe èlãwo la yì ɖù ènu lèa lè Izràɛlviwo be crɔ̃ nyigbãwo ji.

⁴²Èdùawo dòmètɔ ɖe sia ɖe ɖo fikè èlãwo la yì ɖù ènu lèa.

⁴³Tɔhonɔ̀ fìã àjɔ̀gbè xoxo na Izràɛlviwo be tɔgbewo be: “Mù la xɔ̀ ànyigbã kèa na mì.” Eye egbèa, Tɔhonɔ̀ wɔ̀ ɖo yebe àjɔ̀gbefìãfiã ji.

⁴⁴Tɔhonɔ̀ fìã na woa tɔgbewo be: “Mì la ɖù mìabe kɛ̃tɔwo kpata ji eye mì la nɔ̀ ànyigbã kèa ji lè ŋuti fàfa mè.”

⁴⁵Tɔhonɔ̀ fìã àjɔ̀gbè sùgbɔ na Izràɛlviwo, eye e ɖe mu lè kè mu kpɔ e mè vava ò.