Read gen Yosùa 22 Bible Online

Yosùa 22 - gen bible

Yosùa 22

¹Ekè ye Izràɛl be kɔ̀tawo yì xɔ̀ ànyigbã kèwo lè Yɔrdàn-tɔ̀ sàsra be èwèɖoxɔ̀pe vɔ̀a, Yosùa yɔ Rubɛ̀n ku Gad be kɔ̀tawo ku Manasè be kɔ̀ta kè lè èwèzɛ̃pea be ŋusùwo ɖèɖe kpò bɔ̀.

²E gblɔ̃ na wo be: “Mosè sumɔ Tɔhonɔ̀. Eye mì wɔ̀ ɖo ègbè do àsi kè be xɔ̀ so Tɔhonɔ̀ gbɔ na mìa ji. Lè Mosè be èku yomè a, mì gbà wɔ̀ ɖo ègbè do àsi kè mù xɔ̀ so Tɔhonɔ̀ gbɔ na mìa cã ji.

³Mì mu dokpò wɔ̀wɔ ɖo Tɔhonɔ̀ mìabe Mawu a be ègbè do àsi ɖe ji kpɔ ò, eye ne mìa nɔ̀vi Izràɛlviwo hiã mìabe àlɔ̀do lè hùe ɖekpekpe nua, mì va kpena ɖo woa ŋuti.

⁴Tɔhonɔ̀ miabe Mawu a, fìã ŋuti fàfa be àjɔ̀gbè na mìa nɔ̀vi Izràɛlvi kpɔ̀tɛawo. Eye fifìa e wɔ̀ ɖo àjɔ̀gbè kèa ji. Mosè na mì crɔ̃-nyigbã lè Yɔrdàn-tɔ̀ sàsra be àgo ɖe a ji, eye mì sɔ wɔ̀ mìa tɔ̀. Fifìa mì trɔ yì ànyigbã kèa ji.

⁵Mì kã ɖo e ji be yèwo ma ŋlɔ̀, ènu kè be ègbè, Mawu be sumɔ̃vi, Mosè ɖè na mìa, be gbèɖe ò. E gblɔ̃ be: “Wò la lɔ̃ Tɔhonɔ̀ miabe Mawu a eye wò la wɔ̀ ɖo yebe ègbè do àsiawo ji. Wò la sumɔ ɛ̀ ku àpo èjì keŋu kudo àpo èkla keŋu.”

⁶Gbɔ̀xue ne woa trɔ yì woabe ànyigbã jia, Yosùa tu sì na wo

⁷gblɔ̃ be: “Mì trɔ le yì mìa de ku àdɔ̀kùnɔ̀ kèwo keŋu mì va xɔ̀a: èlãhawo, klòsalò, sìka, gàjɛ̃, gàyìbɔ, kudo àwùwo lè gbɔsùsu mè. Mì ma ènu kèwo mì xɔ̀ lè kɛ̃tɔawo sia ku mìa nɔ̀vi Izràɛlvi kpɔ̀tɛawo.” E yomè a, wo trɔ tùtà woa de. Mosè na ànyigbã Manasè be kɔ̀ta be àkpa mamã mè ɖèka lè Yɔrdàn-tɔ̀ sàsra be èwèzɛ̃pe, vɔ̀ na àkpa mamã mè èvègɔ̃a, Yosùa ye na wo ànyigbã lè Yɔrdàn-tɔ̀ sàsra be èwèɖoxɔ̀pe sìgbè àlekè be na kɔ̀ta kpɔ̀tɛawo nène.

⁹Nène a ye Rubɛ̀n ku Gad be kɔ̀tawo ku Manasè be kɔ̀ta èwèzɛ̃pe tɔ̀a, wo tàsi Izràɛlvi kpɔ̀tɛawo ɖo Silò lè Kanàn nyigbã ji, eye wo trɔ yì woa de. Woabe ànyigbã lè Yɔrdàn-tɔ̀ sàsra be èwèzɛ̃pe. So xoxo ye Mosè sɔ ɛ̀ na wo gblɔ̃ be: “Ekèa ye nyi ànyigbã kè Tɔhonɔ̀ jro la sɔ na mìa.”

¹⁰Lè woabe èmɔ̃ zɔ̃zɔ̃ mè trɔ yì àxuea, Rubɛ̀n ku Gad be kɔ̀tawo kudo Manasè be kɔ̀ta èwèzɛ̃pe tɔ̀a, wo yì ɖo Gèlilɔ̀t nyigbã kè mu dìdì lè Yɔrdàn-tɔ̀ sàsra gbɔ òa. Funu ye wo li vɔsakpe gãaɖe ɖo, gbɔ̀xue wo sò ètɔ̀a.

¹¹Izràɛlvi kpɔ̀tɛawo sè be Rubɛ̀n ku Gad be kɔ̀tawo kudo Manasè be kɔ̀ta èwèzɛ̃pe tɔ̀a, wo li vɔsakpe ɖo Gèlilɔ̀t lè Yɔrdàn-tɔ̀a gbɔ.

¹²Kè wo sèa, èwèɖoxɔ̀pe be kɔ̀tawo kpata bɔ̀ woabe ŋusùwo lè Silò ne woa yì wɔ̀ àhùa ku èwèzɛ̃pe be kɔ̀tawo.

¹³Wo dɔ̃ hũbonɔ Eleazàr be vi ŋusù Pinehà ɖoɖa èwèzɛ̃pe be kɔ̀tawo lè Gilead.

¹⁴Dùkɔ̃a be ŋùkɔ̀nɔ̀tɔwo nɔ̀ àmèdɔ̃dɔ̃awo dòmè. Eye kɔ̀ta sia kɔ̀ta na àmè ɖèka eye woa kpata wo nyi Izràɛl be kɔ̀ta èwoawo be xòmègawo.

¹⁵Wo yì Gilead nyigbã ji lè èwèzɛ̃pe be kɔ̀tawo gbɔ eye wo pò nupo na wo lè

¹⁶Izràɛlvi kpɔ̀tɛawo be nyikɔ mè gblɔ̃ be: “Nukɛ ŋuti mì wɔ̀ ènu dàda kèa ɖo Tɔhonɔ̀ ŋuti eye mì yì li vɔsakpe kèa na mìa ɖokoewo ɖo? Nukɛ ŋuti mì gbe ètonusèse na Mawu fifì eye mì wɔ̀ ènu bàɖà kèa ɖo?

¹⁷Mì ɖo ŋùku ènu kè jɔ̀ lè Peɔ̀r wàlɛbɛ kè Tɔhonɔ̀ dɔ̃to na ye ŋutɔ be èdù ku èdɔ vuɛ̃ a? Ètodɔ̃ kè be èfɛ̃ mi mu kpɔ tu hàɖe òa! Mu sù nènea?

¹⁸Mì le gbe fifì be yèwo mu la gbà kplɔ̀ ɛ̀ do òa? Ne mì sitè ɖo Tɔhonɔ̀ ŋuti egbèa, yebe èjìbibi be àdã, la fɔ̃ ɖo Izràɛlviwo kpata ŋuti èsɔ̀.

¹⁹Vɔ̀ fifìa, ne mì susu be mìabe ànyigbã mu gbà jè ne mìa nɔ̀ òa, mì trɔ va ne mìa va ji tèpe na mìa ɖokoe lè fikè Tɔhonɔ̀ ŋutɔ be nɔ̀pe lèa. Vɔ̀ mì mu gbà sitè ɖo mia ku Tɔhonɔ̀ ŋuti ne mìa yì li vɔsakpe bu tovò lè Tɔhonɔ̀ miabe Mawu tɔ̀a ŋuti ò.

²⁰Mì mu gbà ŋlɔ̀be ènu kè jɔ̀ ɖo Zerà be jìjimèvi Àkã ji ò! Tɔhonɔ̀ ɖè ègbè na mi be: “mia crɔ̃ ènu sia ènu lè Yerikò be èdùa mè.” Vɔ̀ Àkã ya mu wɔ̀ ɖo Tɔhonɔ̀ be ègbè ɖèɖe kèa ji ò, eye Tɔhonɔ̀ dɔ̃to na mia kpata. Àkã ku, ɖo ènu kè be wɔ̀a ŋuti eye Izràɛlvi sùgbɔ cã ku, ɖo Àkã be àgɔ̀jèjea ŋuti.”

²¹Rubɛ̀n ku Gad be kɔ̀ta ku Manasè be kɔ̀ta èwèzɛ̃pe tɔ̀a be dùkɔ̃awo ɖo e ŋuti na èwèɖoxɔ̀pe kɔ̀tawo be ŋùkɔ̀nɔ̀tɔwo be:

²²“Mi sɔ Tɔhonɔ̀, Mawu ŋusɛ̃ kpatatɔa sìgbè miabe ènutèpekpɔtɔ nène. E nya ènu kè ŋuti mi wɔ̀ nènea, eye mì ji be mìa cã mìa nya ɛ̀. Ne mi sitè ɖo Tɔhonɔ̀ ŋuti eye mi mu wɔ̀ ɖo ènu kè mi gblɔ̃a ji òa, eŋuã ne crɔ̃ mia kpata.

²³Ne mi mu sètonu na Tɔhonɔ̀ eye mi li vɔsakpe na vɔsa ɖekpekpe [43] xòmèvia, Tɔhonɔ̀ ŋutɔ ne dɔ̃to na mi.

²⁴Ɖo mu lè nène ò. Mi wɔ̀ ekèa ɖo mi le vɔ̃ be miabe [44] jìjimèviwo la va gblɔ̃ be: “mì mu ɖo kàdodo ɖekpe ku Tɔhonɔ̀, Izràɛl be Mawu a ò.

²⁵Tɔhonɔ̀ ŋutɔ sɔ Yɔrdàn-tɔ̀ sàsra sɔ do lipò mia ku mìa dòmè. Mì mu ɖo mamã ɖekpe ku Tɔhonɔ̀ ò.” Nène a, mìabe jìjimèviwo teŋu na be miabe jìjimèviwo la gbe Tɔhonɔ̀ sɛ̃sɛ̃.

²⁶Mi li vɔsakpe nyàwo, vɔ̀ mi mu li ì ne vɔ̀sawo be wɔ̀wɔ ò.

²⁷Vɔ̀ mi li ì sìgbè jèsìdo nène na mi ku mìabe dùkɔ̃a gbàkudo miabe jìjimèviwo be mia cã mi sumɔna Tɔhonɔ̀ kudo miabe vɔsa vòvòawo. Lè yebe gòxɔ kɔ̀kɔ̀ɛa be ŋùkɔ̀ xoxo. Ne mìabe jìjimèviwo mu gbà va gblɔ̃ na miabe jìjimèviwo be: “mì mu lè Tɔhonɔ̀ be dùkɔ̃a dòmè ò.”

²⁸Mi li vɔsakpe kèa be ne mìabe jìjimèviwo va gblɔ̃ ènyà kèa gbè ɖèka na miabe jìjimèviwoa, woa teŋu ɖo e ŋuti na wo be: “mì kpɔ, mia tɔgbewo ye li vɔsakpe kèa sìgbè Tɔhonɔ̀ be vɔsakpe kè lè Silòa nène. Wo mu li ì na vɔsa wɔ̀wɔ ò, vɔ̀, wo li ì ne bèa ze be mia cã, mi ɖo mamã ku Tɔhonɔ̀.

²⁹Mi mu sitè ɖo Tɔhonɔ̀ ŋuti sɔ li vɔsakpe bu kè ji mi la nɔ wɔ̀ vɔ̀sawo lè na Tɔhonɔ̀ ò. Mi mu li vɔsakpe bu kè la ɖɔ̀lì Tɔhonɔ̀ be vɔsakpea ò.

³⁰Kè Hũbonɔ Pinehà kè nyi hũbonɔ Eleazàr be vi ŋusù ku ŋùkɔ̀nɔ̀tɔ kèwo kplɔ̀ ɛ̀ do so èwèɖoxɔ̀pe be kɔ̀tawo mèa, wo ɖoto sè ènu gɔ̃mè ɖèɖe kè èwèzɛ̃pe be kɔ̀tawo wɔ̀ na woa, woabe èjì jè e mè.

³¹Hũbonɔ Pinehà gblɔ̃ na wo be: “Mu nyi be mì sitè ɖo Tɔhonɔ̀ ŋuti ò. Eŋuã fifìa mia kpata mi nya be Tɔhonɔ̀ lè ku mi, eye mu la gbà dɔ̃to na yebe dùkɔ̃a ò.”

³²E yomè a Pinehà ku ŋùkɔ̀nɔ̀tɔawo jo lè èwèzɛ̃pe be kɔ̀tawo gbɔ trɔ yì Kanàn nyigbã ji lè Silò àfi kè wo yì gblɔ̃ ènu kèwo keŋu jɔ̀awo na dùkɔ̃a.

³³Kè Izràɛlviwo sè ènyà kèa, woabe èjì jè e mè eye wo gblɔ̃ be: “Mì na mia kafu Mawu”. Eye wo mu gbà gblɔ̃ gbèɖe kpɔ be yèwo la yì wɔ̀ àhùa ku èwèzɛ̃pe be kɔ̀tawo la xɔ̀ ànyigbã lè woa si ò.

³⁴Eye èwèzɛ̃pe be kɔ̀tawo ɖo nyikɔ na vɔsakpea. Wo ɖè e mè be: “Vɔsakpe kèa la nyi ŋùkuɖojinu na mia dòmètɔ ɖe sia ɖe be miabe Mawu a nyi Tɔhonɔ̀.”