Read gen Yosùa 23 Bible Online

Yosùa 23 - gen bible

Yosùa 23

¹So wàlɛbɛ kè Tɔhonɔ̀ na Izràɛlviwo ŋuti fàfa eye wo vò lè woabe kɛ̃tɔwo si mèa, àzã fuu va yì. Eye Yosùa cã sĩ va ku tɔgbe keŋu-keŋu.

²Funua, Yosùa na wo bɔ̀ Izràɛl be kɔ̀tawo be ènutèpènɔ̀tɔwo kpata. E na wo bɔ̀ woabe àmègãwo, àmèsĩsĩwo, kòjoɖotɔwo ku àhùa-ŋùkɔ̀nɔ̀tɔwo. Eye e gblɔ̃ na wo be: “Mù sĩ fifìa ŋutɔ eye àzã sùgbɔ mu gbà lè ŋùkɔ̀ na mù ò.

³Mì kpɔ àlekè Tɔhonɔ̀ miabe Mawu a nyà mìabe kɛ̃tɔwo lè ŋùkɔ̀ na mia ku ènu kèwo keŋu be wɔ̀ na mia.

⁴Kpɔɖa, mù ma crɔ̃-nyigbã kpata kè so Yɔrdàn-tɔ̀ lè èwèɖoxɔ̀pe yì kɔ̀ ɖo àpù gã to lè èwèɖoxɔ̀pea na mìabe kɔ̀tawo. Mù gbà sɔ dùkɔ̃ kèwo mi crɔ̃ keŋu-keŋuã be ànyigbãwo na mì ku dùkɔ̃ kèwo mi mu teŋu crɔ̃ keŋu-keŋu òa be ànyigbãwo.

⁵Tɔhonɔ̀ mìabe Mawu a fìã na mì be yè la na mìabe kɛ̃tɔwo la jè ànyi lè ŋùkɔ̀ na mì, la nyàwo eye mì la xɔ̀ woabe ànyigbã. Tɔhonɔ̀ miabe Mawu a wɔ̀ ɖo yebe fìãfiã ji. E nyà wo eye èɖewo kpɔ̀tɔ̀ ci ànyigbã ji.

⁶Yeŋutia, mì bla ègo ji ne mì mu gbà gbe ènu kè Mosè ŋlɔ̀ ɖo èse xoma mè ò,

⁷eye mì mu gbà do èha ku dùkɔ̃ kèa ò, mi mu gbà pòmlã woabe vòduwo be nyikɔ àlo la sɔ wo sɔ ta ènu ò; mì mu gbà bɔ̀bɔ̀ na wo kaka la sumɔ wo ò.

⁸Vɔ̀, mì tɛ ɖo Tɔhonɔ̀ miabe Mawu a ŋuti sìgbè àlekè mì wɔ̀ ɛ̀ kaka va na fifìa nène.

⁹Tɔhonɔ̀ na dùkɔ̃ gbogbo ɖewo si lè ŋùkɔ̀ na mì eye woa dòmètɔ ɖe mu teŋu nɔ̀tè lè ŋùkɔ̀ na mì ì,

¹⁰ɖo Tɔhonɔ̀ miabe Mawu fìã be: “mù la wɔ̀ àhùa na mì”. Ekèa ŋuti ye mìa dòmètɔ ɖèka pɛ teŋu nyà kɛ̃tɔ àkpe ɖèka.

¹¹Eŋuã lè ènuwo kpata mèa, mì lɔ̃ Tɔhonɔ̀ mìabe Mawu a kpò.

¹²Mì nɔ̀ ègbè ji na Tɔhonɔ̀. Mì mu gbà jèxlɔ̃ dùkɔ̃ kèwo kpɔ̀tɔ̀ lè mìa dòmèawo be dòmètɔ ɖe kaka la va ca ku wo ò.

¹³Vɔ̀a ne mì wɔ̀ ɛ̀a, mì kã ɖo e ji be Tɔhonɔ̀ mìabe Mawu a mu la kpɔ̀tɔ̀ nɔ nyà dùkɔ̃wo lè ŋùkɔ̀ na mì sìgbè sã nène ò. Eye wo la trɔ zũ àfɔ̀klɛ̃nu na mì sìgbè èmɔ̃ àlo èɖɔ kèwo mè mì la jè eye mì la sè vève sìgbè èlãba ye wo le do ɖo èkpo mè na mì àlo sìgbè àŋùja ye ŋɔ ŋùkuviwo na mì nène. Nène a, mì la va vɔ̀ lè ànyigbã nyuɛ̃ kè Tɔhonɔ̀ miabe Mawu na mìa ji.

¹⁴Nyè mu gbà ɖo àzã sùgbɔ la sɔ nɔ̀ àgbè ò. Mì nɔ ɖoŋùku eji gbè sia gbè be Tɔhonɔ̀ mìabe Mawu na mì ènu nyuɛ̃ kèwo be fìãwo. Tɔhonɔ̀ wɔ̀ ɖo yebe àjɔ̀gbè fìãfiãwo kpata ji, ɖekpe mu hùe ò.

¹⁵Vɔ̀, sìgbè àlekè Tɔhonɔ̀ wɔ̀ ɖo yebe fìãfiãwo jia, nènea ke be la na yebe èjìbi be àdãa la jè mìa ji. Nène a ye mì la crɔ̃ lè ànyigbã nyuɛ̃ kè be na mìa ji.

¹⁶Tɔhonɔ̀ mìabe Mawu wɔ̀ zòɖùɖu ku mì, eye e biɔ so mìa si be mìa nɔ̀ ègbèji na yè. Ne mì trɔ lè ɖoɖo kèa yomè, eye mì yì le sumɔ vòduwo, e la bijì do mì eye e la dɔ̃to na mì. Yebe jìbi be àdãa la fɔ̃ ɖo mìa ji kaka be mì la crɔ̃ lè ànyigbã nyuɛ̃ kè be na mìa ji.”