Read gen Yosùa 3 Bible Online

Yosùa 3 - gen bible

Yosùa 3

¹Ŋùdekɛ̃nyɛ fùtù ye Yosùa ku Izràɛl-viwo jo lè Sitìm tùtà Yɔrdàn be ètɔ̀a to; funu ye wo ci dɔ̃ gbɔ̀xue la va sò ètɔ̀a.

²Lè ŋùkèkè ètɔ̃ yomè a, dùkɔ̃a be àgbònùglawo ɖìsà to àsàɖa kpata mè

³eye wo sɔ ègbè kèa do àsi na dùkɔ̃a be: “Ne mì kpɔ Hũbonɔwo kɔkɔ mìabe Mawu, Tɔhonɔ̀ be zòɖùɖu ɖakà a le yìa, mìa cã mì jo lè fikè mì lèa ne mìa jè e yomè.

⁴Vɔ̀a, mì mu gbà gogo wo ò, mì nɔ zɔ̃ lè àzɔ̀ge na wo sìgbè èkpeti ɖèka nène, nènea ye mì la teŋu nya èmɔ̃ kè mì la toa, ɖo mì mu to èmɔ̃ ŋua kpɔ ò.”

⁵E yomè a Yosùa gblɔ̃ na dùkɔ̃a be: “Mì nɔ̀ kɔ̀kɔ̀ɛ ɖe, ɖo èsɔ̀a Tɔhonɔ̀ le ja wɔ̀ ŋùdãnuwo lè mìa dòmè.”

⁶Ekè èŋù kèa Yosùa gblɔ̃ na hũbonɔawo be: “Mì kɔkɔ zòɖùɖu ɖakà a ne mìa jè ŋùkɔ̀ na dùkɔ̃a.” Eye wo kɔkɔ zòɖùɖu ɖakà a eye wo zɔ̃ jè ŋùkɔ̀ na dùkɔ̃a

⁷Tɔhonɔ̀ gblɔ̃ na Yosùa be: “Sɔ so egbèa, mù la na wò ŋusɛ̃ ɖo ŋusɛ̃ ji lè Izràɛl dùkɔ̃a be ŋùkɔ̀ ne woa nya ɛ̀ be mù la nɔ ku wò sìgbè àlekè mù nɔ̀ kudo Mosè a nène.

⁸Eye èwò ya, do ègbè kèa àsi na hũbonɔ kèwo kɔkɔ zòɖùɖu ɖakà a be: “Ne mì zɔ̃ yì ɖo Yɔrdàn be ètɔ̀a toa, mì zɔ̃ ɖo èsìa mè ne mìa tɔtè.”

⁹Yosùa gblɔ̃ na Izràɛlviwo be: “Mì tètè gogo fikèa ne mìa sè Tɔhonɔ̀, mìabe Mawu a be ègbè.”

¹⁰E yomè a, Yosùa gblɔ̃ be: “Ekèa la na mì la nya be Mawu àgbèagbèa lè mìa dòmè eye godoa, e la nyà Kanàn, Hititè, Hivitè, Perizì, Gigarsitè, Àmorì ku Yebusìtɔwo lè ŋùkɔ̀ na mì:

¹¹Kpɔɖa, ànyigbã kpata be Tɔhonɔ̀a be zòɖùɖu ɖakà a la to ŋùkɔ̀ na mì sò Yɔrdàn be ètɔ̀a.

¹²Eye fifìa mì cã ŋusù woèvè lè Izràɛl be kɔ̀tawo mè, ŋusù ɖèka lè kɔ̀ta ɖèka mè.

¹³Wàlɛbɛ kè Hũbonɔ kèwo kɔkɔ Tɔhonɔ̀, kè nyi ànyigbã kpata be Tɔhonɔ̀a, be zòɖùɖu ɖakà a, be àfɔ̀wo la ɖo Yɔrdàn be ètɔ̀a mèa, èsì kèwo sona ètɔ̀a be jɔ̀sopea la sò, eye wo la bɔ̀ ɖo tèpe ɖèka.”

¹⁴Eye ekè dùkɔ̃a to lè gòxɔawo mè la sò Yɔrdàn be ètɔ̀a, hũbonɔ kèwo kɔkɔ zòɖùɖu ɖakà a, lè ŋùkɔ̀ na dùkɔ̃a.

¹⁵Ekè àmè kèwo kɔkɔ àɖakàa wo va ɖo ètɔ̀a to, eye hũbonɔawo be àfɔ̀ tɔ èsìa mèa kpòa, nyàwo be nyi be Yɔrdàn be ètɔ̀a ɖɔna gbãnà ɖo àgowo kpata ji lè ènukuyàya be gàmè,

¹⁶troloa, èsì kèwo so ètɔ̀a be jɔ̀sopeawo sò, wo bɔ̀ ɖodu ɖaa lè Adàm, èdù kè lè Sartàn be àgo jia, eye èsì kèwo la sà yì Àrabà be àpù kè gbà nyi èjè be àpùa mèa, wo sò keŋu, eye dùkɔ̃a sò ètɔ̀a ànyigbã pupui lè Yerikò be ŋùkɔ̀ tututu.

¹⁷Hũbonɔ kèwo kɔkɔ Tɔhonɔ̀ be zòɖùɖu ɖakà a wo tɔtè ɖo ànyigbã pupuia ji lè Yɔrdàn be ètɔ̀a be dòdòmè tututu, wàlɛbɛ kè ye Izràɛl be èdùa kpata le sò ètɔ̀a àfɔ̀ pupui kaka va na gà kè mè dùkɔ̃a kpata sò Yɔrdàn be ètɔ̀a vɔ̀a.