Read gen Yosùa 4 Bible Online

Yosùa 4 - gen bible

Yosùa 4

¹Kè dùkɔ̃a kpata gbe sò Yɔrdàn be ètɔ̀a jè àgo ɖe a kpòa, Tɔhonɔ̀ gblɔ̃ na Yosùa be:

²“Ɖè ŋusùti woèvè lè dùkɔ̃a mè, ŋusù ɖèka na kɔ̀ta ɖèka,

³eye ɖè ègbè na wo be: “Mì yì fɔ̀ èkpe woèvè lè Yɔrdàn be ètɔ̀a be dòdòmè lè àfi kè hũbonɔawo be àfɔ̀wo li ɖoa va; ne mìa sɔ wo jè ŋùkɔ̀ yì dà ɖo fikè mì la sò kɔpe ɖo èzã kèa mèa.”

⁴E yomè, Yosùa yɔ ŋusù woèvè kèwo e cã lè Izràɛlviwo dòmèa, ŋusù ɖèka na kɔ̀ta ɖèka

⁵eye Yosùa gblɔ̃ na wo be: “Mì zɔ̃ lè ŋùkɔ̀ na mìabe Mawu, Tɔhonɔ̀ be zòɖùɖu ɖakà a, yì Yɔrdàn be ètɔ̀a be dòdòmè ne àmè sia àmè ne sɔ èkpe ɖèka ɖo àbɔta ɖo Izràɛl bè kɔ̀tawo be hɛ̃hlɛ̃ mè nu,

⁶ne ekèa bèa nyi ŋùku ɖo ji nu lè mìa dòmè. Ne mìabe jìjimèviwo va biɔ mì be: “Gɔ̃mèsèse kɛ ye lè èkpe kèawo si na mì mà a?”

⁷Mì ɖo e ŋuti na wo be: “Ɖo Yɔrdàn be èsìawo mã ɖo èvè lè Tɔhonɔ̀ be zòɖùɖu ɖakà a be ŋùkɔ̀ wàlɛbɛ kè ye wo kɔkɔ ɛ̀ le sò Yɔrdàn be ètɔ̀a! Ɛ̃ɛ Yɔrdàn be èsìawo mã ɖo èvè eye èkpe kèawo la nyi ŋùkuɖojikpe na Izràɛlviwo tɛ̀gbɛ̀.”

⁸Izràɛl-viwo wɔ̀ ɖo ènyà kè Yosùa to na woa ji: wo yì fɔ̀ èkpe woèvè lè Yɔrdàn be ètɔ̀a mè sìgbè àlekè Tɔhonɔ̀ gblɔ̃ ɛ̀ na Yosùaa nène, ɖo Izràɛl-viwo be kɔ̀ta be hɛ̃hlɛ̃ mè nu eye wo sɔ èkpeawo yì dà ɖo àfi kè wo yì tɔtè ɖoa.

⁹Yosùa na wo li èkpe woèvè ɖo Yɔrdàn be dòdòmè àfi kè ye hũbonɔ kèwo kɔkɔ zòɖùɖu ɖakà a be àfɔ̀wo tɔtè ɖo kaka ye Izràɛlviwo sò ètɔ̀a vɔ̀a, eye èkpe kèawo gbà kpɔ̀tɔ̀ lè funua kaka va na egbè.

¹⁰Eye hũbonɔ kèwo kɔkɔ zòɖùɖu ɖakà a, tɔtè ɖo Yɔrdàn be ètɔ̀a be dòdòmè kaka ye ènyà kè Tɔhonɔ̀ gblɔ̃ na Yosùa be ne gblɔ̃ na dùkɔ̃a, sɔ zɔ̃ ɖo Mosè be ègbè do àsi na Yosùaa jia, va e mè keŋu-keŋu, eye dùkɔ̃a sò ètɔ̀a kaba.

¹¹Kè ye dùkɔ̃a kpata sò ètɔ̀a vɔ̀a, Tɔhonɔ̀ be zòɖùɖu ɖakà a ku hũbonɔ kèwo kɔkɔ ɛ̀a wo zɔ̃ jèŋùkɔ na dùkɔ̃a.

¹²Eye Rubɛ̀n be kɔ̀ta, Gad be kɔ̀ta ku Manasè be kɔ̀ta be àhùakɔ̃awo bla àhùakpa sɔ zɔ̃ ɖo Mosè be ènyà ji be:

¹³Sìgbè àhùakɔ̃ àkpe èkà kè lè àlɔ̀ji, na àhùa wɔ̀wɔ, jè ŋùkɔ̀ na Tɔhonɔ̀, tùtà Yerikò be gbàjà jia nène.

¹⁴Gbè ŋua gbèa, Tɔhonɔ̀ lòlò Yosùa lè Izràɛl-viwo be ŋùkɔ̀ eye wo gbà vɔ̃ ɛ̀ sìgbè àlekè wo vɔ̃ Mosè lè yebe àgbè nɔ̀-zã keŋu-keŋu mèa nène.

¹⁵Eye Tɔhonɔ̀ gblɔ̃ na Yosùa be:

¹⁶“Ɖè ègbè na hũbonɔ kèwo kɔkɔ àɖakàa kè mè zòɖùɖu be ènuawo lèa be ne woa to lè Yɔrdàn be ètɔ̀a mè.”

¹⁷Eye Yosùa ɖè ègbè na hũbonɔawo be: “Mì to lè Yɔrdàn be ètɔ̀a mè.”

¹⁸Vɔ̀ ekè ye hũbonɔ kèwo kɔkɔ Tɔhonɔ̀ be zòɖùɖu ɖakà a to lè Yɔrdàn be èsìa be dòdòmè kpòa, kaka kè ye hũbonɔawo be àfɔ̀kpoji gbe tɔ ànyigbã pupuia kpòa, Yɔrdàn be èsìawo trɔ gbɔ̀ va woa tèpe eye wo gbà le srà sìgbè sã nène, le yì àgowo kpata ji.

¹⁹Izràɛl dùkɔ̃a sò Yɔrdàn be ètɔ̀a lè wètri cucugbãa be ŋùkèkè èwogɔ̃a gbè eye wo yì sò kɔpe ɖo Gilgàl lè Yerikò be èdùa be èwèzɛ̃pe.

²⁰Yosùa na wo li ètɔ̀mèkpe woèvè kèwo wo fɔ̀ lè Yɔrdàn be ètɔ̀a mèa ɖo Gilgàl.

²¹E yomè a e gblɔ̃ na Izràɛlviwo be: “Ne èsɔ̀ mìabe jìjimèviwo biɔ mìa woa tɔwo sè be: “Gɔ̃mèsèse kɛ ye lè èkpe kèawo si mà a?”

²²Mì la ɖè e mè na mìabe jìjimèviawo be: “Fikèa ye Izràɛl be dùkɔ̃a sò Yɔrdàn be ètɔ̀a lè àfɔ̀ mà-tɔ èsì mè;

²³mìabe Mawu, Tɔhonɔ̀a na Yɔrdàn be èsìa pu lè ŋùkɔ̀ na mì kaka va na wàlɛbɛ kè ye àmè sia àmè sò ètɔ̀a sìgbè àlekè Tɔhonɔ̀ mìabe Mawu a wɔ̀ lè plãŋùpòfɛ̃ be àpùa to na mi wàlɛbɛ kè ye e pu ì lè ŋùkɔ̀ na mi kaka ye mia kpata mi sò èa nène. E wɔ̀ nène,

²⁴ne ànyigbã be dùkɔ̃wo kpata woa nya àlekè Tɔhonɔ̀ be àlɔ̀a sɛ̃ŋu ɖo, ne mìa vɔ̃ Tɔhonɔ̀ mìabe Mawu a tɛ̀gbɛ̀dò.”