Read gen Yosùa 6 Bible Online

Yosùa 6 - gen bible

Yosùa 6

¹Wo tu Yerikò, gbà tu èdùa be àgbowo kpikpikpi ɖo Izràɛlviwo ŋuti: àmè ɖekpe mu teŋu to kaka ne àmè ɖe ne ɖo èdùa mè ò.

²Tɔhonɔ̀ gblɔ̃ na Yosùa be: “Kpɔɖa mù ɖè Yerikò ku yebe èfìɔa do àsi na wò kudo yebe ŋusùtiwo.

³Eye mìa ya, mìa ŋusùti wɔ̀ahùawo kpata, mì la zɔ̃ trɔ do èdùa, la trɔ do è zè ɖèka kpò; nènea ye wò la wɔ̀ kaka na ŋùkèkè àdɛ̃.

⁴Hũbonɔ adrɛ̃ la sɔ èzè [3] adrɛ̃ kèwo wo sɔ àgbò be àzò sɔ wɔ̀a, la nɔ̀ ŋùkɔ̀ na zòɖùɖu ɖakà a ŋùkèkè adrɛ̃gɔ̃ a gbèa, mì la zɔ̃ trɔ do èdùa zè adrɛ̃ eye hũbonɔawo la ku woabe èzèawo.

⁵Wàlɛbɛ kè ye èlã zòawo be ègbè la ɖì hòoa, ne mì sè èzèawo be ègbè ɖì hòoa, dùkɔ̃a kpata la do àpa gãaɖe funu funua ke ye èkpa kè wo tɔ̃ trɔ do Yerikò be èdùa la mù eye àmè sia àmè la zɔ̃ ɖo ènu kè lè ŋùkɔ̀ na ɛ̀a ji.”

⁶Yosùa, Nun be via yɔ hũbonɔawo va eye e gblɔ̃ na wo be: “Mì kɔkɔ zòɖùɖu ɖakà a eye hũbonɔ adrɛ̃ ne jè ŋùkɔ̀ na Tɔhonɔ̀ be àɖakàa ku àgbò be àzò be èkpɛ̃ adrɛ̃.”

⁷E gblɔ̃ e yomè na dùkɔ̃a be: “Mì so ne mìa zɔ̃ trɔ do èdùa, vɔ̀a, ŋusùti-bla-àkpàwo ne jè ŋùkɔ̀ na Tɔhonɔ̀ be àɖakàa.”

⁸Ènu sia ènu zɔ̃ sùu sìgbè àlekè Yosùa gblɔ̃ ɛ̀ na dùkɔ̃a nène: Hũbonɔ adrɛ̃ kèwo sɔ èzè adrɛ̃awo lè Tɔhonɔ̀ be àɖakàa be ŋùkɔ̀a, wo jè ŋùkɔ̀ le ku woabe èzèawo. Eye zòɖùɖu ɖakà a kplɔ̀ wo do.

⁹Ŋusùti kèwo bla àhùakpa ɖewo jè ŋùkɔ̀ na hũbonɔawo eye kpɔ̀tɛawo kplɔ̀ hũbonɔawo do; wo le zɔ̃ le ku èzèawo.

¹⁰Yosùa do ègbè kèa àsi na dùkɔ̃a be: “Mì mu ɖo la do àpa, mìabe ègbè mu ɖo la ɖì ò, eye ènyà ɖekpe mu la to so mìabe ènumè kaka va na gà kè mè mù la gblɔ̃ na mì be: “Mì do àpa lelele ò”, eye mì la do àpa lelele.”

¹¹Tɔhonɔ̀ be zòɖùɖu ɖakà a trɔ do èdùa gòdò zè ɖèka, e yomè a Izràɛlviwo trɔ yì woabe kɔpe kè mè wo soa mè eye wo yì ci dɔ̃ èŋù kè.

¹²Yosùa fɔ̃ ŋùdekɛ̃nyɛ fùtù eye hũbonɔawo gbà kɔkɔ Tɔhonɔ̀ be àɖakàa;

¹³hũbonɔ adrɛ̃ kèwo hɛ̃ èzè adrɛ̃awo gbà jè woabe àzɔ̃lìa ji eye wo le ku woabe èzèawo. Ŋusùti bla àhùakpa ɖewo jè ŋùkɔ̀ na wo eye àmè kpɔ̀tɛawo jè zòɖùɖu ɖakà a yo mè: wo le ku èzèawo lè woabe àzɔ̃lìa mè.

¹⁴Wo gbà trɔ do èdùa zè ɖèka lè ŋùkèkè èvègɔ̃a gbè; e yomè a, wo trɔ va woabe àsàɖa mè. Nène a ye wo wɔ̀ ŋùkèkè adrɛ̃ sɔ̃ŋu.

¹⁵Vɔ̀ lè ŋùkèkè adrɛ̃gɔ̃ a gbèa, wo fɔ̃ èzã eye wo gbà zɔ̃ trɔ do èdùa zè adrɛ̃ lè ɖoɖo ŋua ke mè; gbè ŋua gbè ɖèka kpò ye wo zɔ̃ trɔ do èdùa zè adrɛ̃.

¹⁶Zè adrɛ̃gɔ̃ a, hũbonɔawo ku woabe èzèawo eye Yosùa gblɔ̃ na dùkɔ̃a be: “Mì do àpa lelele, ɖo Tɔhonɔ̀ ɖe èdùa do àsi na mì.

¹⁷Wo la crɔ̃ èdù kèa ku ènu kèwo lè e mèa, ɖo wo ɖè è ɖovò na Tɔhonɔ̀. Àhasìtɔ Ràhab ɖèka kpò ye la ci àgbè, ye ku yebe àxuedo a, ɖo e ye wla àmè kèwo mi dɔ̃ ɖoɖa Yerikòa.

¹⁸Mìawo ya, mì kpɔ nyuɛ̃ ɖe lè bùsunuawo ŋuti, ne wo mu gbà jro mì kaka mìa va tɔ àsi woa ŋuti ò, àlekea be bùsu mu gbà va Izràɛl be àsàɖa mè ne mì mu gbà hɛ̃ gbledo va e ji ò.

¹⁹Klòsalò, sìka, gàjɛ̃ ku ègà yìbɔ be ènuwo kpata la nyi Tɔhonɔ̀ tɔ̀ eye wo la lɔ wo kɔ̀ ɖo Tɔhonɔ̀ be àdɔ̀kùnuwo mè.”

²⁰Dùkɔ̃a do àpa lelele, ekè wo ku èzè a. Wàlɛbɛ kè dùkɔ̃ a sè èzèawo be ègbè a, e do àpa gãa ɖe eye èdù a be ègliawo mù trolo; Izràɛlviwo zɔ̃ àhùatɔ̀ ɖo èdù a mè; àmè sia àmè zɔ̃ ɖo ènu kè lè ŋùkɔ̀ na ɛ̀ a ji, eye wo ɖè èdùa àbòyo.

²¹Wo ɖè ènu kèwo kpata lè èdùa mèa àbòyo, lè ŋusù mè, lè nyɔ̃nù mè, ɖèkajɛvi ku àmè sĩsĩwo, ènyì, ègbɔ kudo èsɔàkɛtɛ, wo wù woa kpata lè èwui nu.

²²Yosùa gblɔ̃ na Izràɛlvi èvè kèwo ye yì sã ŋùku lè Yerikò be èdùa mèa be: “Mì yì nyɔ̃nù àhasìtɔa be àxomè ne mìa ɖè nyɔ̃nù kèa ku ènu kèwo kpata nyi e tɔ̀awo to, ɖo àjɔ̀gbè kèa ye mì fìã na ɛ̀.”

²³Ɖèkajɛvi kèwo yì sã ŋùku lè èdùa mè sã, wo yì Ràhab be àxomè eye wo ɖè Ràhab, ètɔa, ènɔa, nɔ̀viawo ku ènu kè nyi e tɔ̀a kpata to; wo ɖè yebe hɛ̃numewo kpata to eye wo yì sò kɔpe na wo ɖo Izràɛl be àsàɖaa godo.

²⁴Wo tɔzò èdùa ku ènu kèwo keŋu lè e mèa, vɔ̀ klòsalò, sìka, gàjɛ̃ be ènuwo kudo ègàyìbo be ènuwo ya, wo lɔ wo kɔ̀ ɖo Tɔhonɔ̀ be àxuea be àdɔ̀kùnuwo mè.

²⁵Yosùa gble àgbèa ɖɛ na àhasìtɔ Ràhab ku yebe xòmèa kudo ènu kèwo nyi e tɔ̀a; Ràhab be xòmèa nɔ̀ Izràɛlviwo dòmè kaka na egbè, ɖo e ye wla àmèdɔ̃dɔ̃ kèwo Yosùa dɔ̃ ɖoɖa ne woa yì sã ŋùku lè Yerikòa.

²⁶Lè gà ŋua mèa, Yosùa na wo kã àtãŋu kèa be: “Bàbà na ŋusù kè la so, la gbìgbɔ̀ tù Yerikò be èdù kèa lè Tɔhonɔ̀ be ŋùkɔ̀a. Ɖo yebe ŋùkɔ̀gbevi ŋusù la crɔ̃ lè èdùa be tùtù mè eye yebe ŋusùvi èvègɔ̃a la crɔ̃ lè èdù-gboawo be ɖoɖo mè.”

²⁷Tɔhonɔ̀ nɔ̀ ku Yosùa eye yebe nyikɔ gbã kpe ànyigbã kpata.