Read gen Yosùa 7 Bible Online

Yosùa 7 - gen bible

Yosùa 7

¹Izràɛlviwo mu wɔ̀ ànùkua lè àmɔ̀nyɔ̀nuawo ŋuti ò; ɖo Àkã kè nyi Karmì be vi ŋusù, Zabdì be vi ŋusù, Zerà be vi ŋusù, kè so Yudà be kɔ̀taa, sɔ lè ènu kè wo hlàa mè, eye Tɔhonɔ̀ do àdɔ̀mèze ɖo Izràɛlviwo ŋuti.

²Yosùa dɔ̃ ŋusùtiwo ɖoɖa Ayì be èdù kè lè Betɛ̀l be èwèzɛ̃pea, gogo Bɛt-avɛ̃n gbɔa ku ègbè do àsi be: “Mì yì sã ŋùku lè èdùa mè.” Ŋusùawo yì sã ŋùku lè Ayì be èdùa mè,

³eye wo trɔ gbɔ̀ va Yosùa gbɔ, gblɔ̃ na ɛ̀ be: “Mu lè veveɖe be dùkɔ̃a kpata ne yì wɔ̀ àhùa lè Ayì be ànyigbã ji ò! Àmè àkpe èvè àlo àkpe ètɔ̃ kpò ne yì. Mù gbà do eŋuã be nupo na dùkɔ̃a kpata ò, ɖo Ayì be ŋusùtiwo mu sùgbɔ klua ò.”

⁴Nène a ye wo dɔ̃ àmè àkpe ètɔ̃ ne woa yì hɔ̀ Ayì be èdùa, vɔ̀a, wo mu teŋu nɔ̀tè lè ŋùkɔ̀ na Ayì be dùkɔ̃ ò, eye wo si gbɔ̀.

⁵Ayì be ŋusùwo wù Izràɛlvi ègbã vɔ àdɛ̃ nène eye wo nyà àmè kpɔ̀tɛawo to lè èdùa mè kaka va ɖo Sèvarìm be èdùa mè lè bàlìa mè eye wo jo kã ètɔ-bu ènɔ̀-bu. Nène a ye Izràɛl be dùkɔ̃a gbɔjɔ blibo eye jìdo ku ŋùɖo bu na ɛ̀.

⁶Yosùa zɛ̃ yebe àwùwo eye be sɔ ŋùku mè cɔ̃ ànyi lè Tɔhonɔ̀ be zòɖùɖu ɖakà a be ŋùkɔ̀ kaka na wètrɔ mè, Izràɛl be àmè sĩsĩwo cã wɔ̀ nènea ke eye wo blìbɔ̀ àfi mè.

⁷Yosùa gblɔ̃ be: “Aò! Tɔhonɔ̀ Mawu, nukɛ ŋuti ye wò na dùkɔ̃ kèa sò Yɔrdàn be ètɔ̀a ɖo ò? Wò wɔ̀ ɛ̀ be ye à ɖè mi do àsi na Àmorìtɔwo ne woa crɔ̃ mi vɔ̀a. Ne mi kè ci ètɔ̀a be àgo ɖèa jia, mu nyɔ wua!

⁸Mù le àfɔ̀ na wò jro Tɔhonɔ̀, nukɛ mù la gblɔ̃ fifì ò, be Izràɛl si lè yebe kɛ̃tɔwo be ŋùkɔ̀a?

⁹Kanàntɔwo ku dùkɔ̃ kpɔ̀tɛawo la sè ènyà kèa eye wo la trɔ do mi, la ɖè miabe nyikɔ lè ànyigbã ji. Nukɛ ye wò la teŋu wɔ̀ fifì ku àpo nyikɔ xɔ̀ àsìa ò?”

¹⁰Tɔhonɔ̀ gblɔ̃ na Yosùa be: “Sitè! Nukɛ ŋuti wò so ŋùku mè cɔ̃ ànyi ɖo ò?

¹¹Izràɛlviwo jè àgɔ̀; ɛ̃ɛ wo dà lè zòɖùɖu nyèa ji, ènu kè be èse mù do na woa; ɛ̃ɛ wo sɔ ènu kè wo mu ɖo la sɔ òa, wo fĩ ènuwo, wla wo ɖo woabe àgbãwo mè;

¹²nènea Izràɛlviwo mu gbà la teŋu tɔtè lè woabe kɛ̃tɔwo be ŋùkɔ̀ ò, wo la si lè ŋùkɔ̀ na woabe kɛ̃tɔwo, ɖo cɔ̃crɔ̃ be èse jè woa ji. Nyè mu gbà la nɔ ku mì kaka kè ye mì mu ɖè cɔ̃crɔ̃-nua jo lè mìa dòmè ò.

¹³Sitè ne wòa kɔ̀ dùkɔ̃a ŋuti. Gblɔ̃ na wo be: “mì jrà mìa ɖokoewo ɖo na èsɔ̀, nènea ye Tɔhonɔ̀ Izràɛl be Mawu a gblɔ̃ yeŋu, ɖo cɔ̃crɔ̃-nu ɖe lè mìa dòmè. Nène a, Izràɛl, wò mu la teŋu kpe àhùa ku kɛ̃tɔ wò kaka kè ye mì mu ɖè cɔ̃crɔ̃-nua jo lè mìa dòmè ò.”

¹⁴Ŋùdekɛ̃nyɛ xoxo ye mì la zɔ̃ kɔ̀ta kɔ̀ta la va Tɔhonɔ̀ be ŋùkɔ̀. Kɔ̀ta kè ji Tɔhonɔ̀ la dà àsi ɖoa, la zɔ̃ va Tɔhonɔ̀ be ŋùkɔ̀ hɛ̃nu hɛ̃nu eye hɛ̃nu kè ji Tɔhonɔ̀ la dà àsi ɖoa, la zɔ̃ va Tɔhonɔ̀ be ŋùkɔ̀ àxuedo àxuedo, eye àxuedo kè jì ye Tɔhonɔ̀ la dà àsi ɖoa, la zɔ̃ va Tɔhonɔ̀ be ŋùkɔ̀ lè ŋusù gomè àmètɔ̀ àmètɔ̀.

¹⁵Wo la tɔzò àmè kè ji Tɔhonɔ̀ la dà àsi ɖo sìgbè àmè kè sɔ cɔ̃crɔ̃-nua nène, e ye ku ènu kè nyi e tɔ̀a keŋu, ɖo e dà lè Tɔhonɔ̀ be zòɖùɖua ji eye e wɔ̀ ènu nyɔŋu lè Izràɛl.”

¹⁶Yosùa fɔ̃ ŋùdekɛ̃nyɛ fùtù eye e na Izràɛlviwo zɔ̃ va Tɔhonɔ̀ be ŋùkɔ̀ kɔ̀ta kɔ̀ta; Tɔhonɔ̀ dà àsi ɖo Yudà be kɔ̀taa ji;

¹⁷e na Yudà be kɔ̀taa zɔ̃ va Tɔhonɔ̀ be ŋùkɔ̀ eye Tɔhonɔ̀ tɔ àsi Zàritè be hɛ̃nua; e na Zàritè be hɛ̃nua va àxuedo àxuedo eye Tɔhonɔ̀ tɔ àsi Zabdì be àxuedo a.

¹⁸E yomè a e na Zabdì be àxuedo a va lè ŋusù gomè àmètɔ̀ àmètɔ̀ eye Tɔhonɔ̀ tɔ àsi Karmì be vi ŋusù, kè nyi Zavdì be vi ŋusù kè gbà nyi Zerà be vi ŋusù so Yudà be kɔ̀ta, Àkã ji.

¹⁹Yosùa gblɔ̃ na Àkã be: “Èvi nyè, na gogo Tɔhonɔ̀ Izràɛl be Mawu a eye wòa lolo è; ɖè ènu kè wò wɔ̀a, gblɔ̃ na mù, mù gbà wla èɖe lè e ŋuti ò.”

²⁰Àkã ɖo e ŋuti na Yosùa gblɔ̃ be: “Lè nyàwo toto mèa, ènyè ye wɔ̀ nuvuɛ̃ do Tɔhonɔ̀ Izràɛl be Mawu a eye ènu kè mù wɔ̀a ye kè:

²¹Lè àmɔ̀nyɔ̀nuawo mèa, mù kpɔ èji be àwù gã[4], nya kpɔ ɖe, klòsalò-ga èkà àtɔ̃ ku sìka kɔ̃ ɖèka; wo bìaŋù na mù eye mù lɔ wo yì wla ɖo gòxɔ nyèa be dòdòmè lè èdo mè. Ègàa lè gɔ̃mè na ènuawo.”

²²Yosùa dɔ̃ àmèwo pu dù yì Àkã be gòxɔa mè: ènuawo lè nènea pɛpɛpɛ eye ègàa lè gɔ̃mè na wo.

²³Àmèdɔ̃dɔ̃awo lɔ ènuawo lè gòxɔa mè va Yosùa ku Izràɛlviwo kpata be ŋùkumè: wo lɔ wo ɖo Tɔhonɔ̀ be ŋùkɔ̀.

²⁴Yosùa kplɔ̀ Zerà be vi ŋusù Àkã ku Klòsalò gàa, àwù-gãa ku sìka kɔ̃a, èviawo kpata, yebe ènyì sua, yebe èsɔàkɛtɛ, yebe àlɛ̃awo, yebe gòxɔa ku ènu kè nyi e tɔ̀a. Izràɛl be dùkɔ̃a kpata bɔ̀ ɖo Yosùa ŋuti eye wo kplɔ̀ Àkã ku yebe ènuawo yì Akɔ̀r be bàlìa mè.

²⁵Eye Yosùa gblɔ̃ be: “Nukɛ ŋuti wò hɛ̃ gbledo va mia ji ɖo ò? Tɔhonɔ̀ ne trɔ gbledo kèa ɖo ji wò egbè!” Eye Izràɛlviwo kpata pòkpe Àkã; eye wo wù wo ku èkpe, tɔzò woabe ènu nɔ̀amèsiwo.

²⁶E yomè a wo bɔ̀ èkpe kèwo gbà lè kaka va na egbèa, ɖo tèpe kèa. Nène a ye Tɔhonɔ̀ trɔ lè yebe àdɔ̀mèze kaɖi kaɖia mè ɖo Izràɛl ŋuti yeŋu. Ènu kè ŋuti ye wo na nyikɔ tèpe kèa be: “Akɔ̀r be bàlì” kaka va na egbè.