Read gen Yosùa 8 Bible Online

Yosùa 8 - gen bible

Yosùa 8

¹Tɔhonɔ̀ gblɔ̃ na Yosùa be: “Mù gbà vɔ̃ ò eye mù gbà gbɔjɔ ò. Kplɔ̀ ŋusùti kèwo lè àlɔ̀ji ne àhùa ɖo ŋuti; sitè ne wòa yì kpe àhùa ku Ayì be dùkɔ̃a. Kpɔɖa mù ɖè Ayì be dùkɔ̃a, yebe èdù gãa, yebe ànyigbã ku yebe èfìɔa do àsi na wò.

²Wò la wɔ̀ ku Ayì be èdùa ku yebe èfìɔa sìgbè àlekè wò wɔ̀ kudo Yerikò ku yebe èfìɔa nène; lè eŋuã mèa, mì la teŋu sɔ woabe èlãwo ku woabe ènuzãzãwo lè àmɔ̀nyɔ̀nuawo mè. Mì la doxa na wo lè èdùa be ŋùgbedòmè sɔ wɔ̀ àhùa ku wo lè àvòmè.”

³Yosùa ku dùkɔ̃a, wo jè èmɔ̃ ne woa yì wɔ̀ àhùa ku Ayì be èdùa. Yosùa cã ŋusù àkpe ègbã, ŋusùti sɛ̃sɛ̃wo eye be ɖo wo ɖoɖa lè èzã mè.

⁴E do ègbè kèa àsi na wo be: “Kpɔɖa, mì yì doxa ɖo èdùa be ŋùgbedòmè; mì mu gbà dìdì lè èdùa gbɔ ò, àleke be mìa teŋu xa wo kaba.

⁵Eye mia ya, mì la zɔ̃ ɖo èdùa ji. Wàlɛbɛ kè wo la gbà to va kpe àhùa ku mi sìgbè sã nènea, mi la si lè ŋùkɔ̀ na wo,

⁶eye wo la kplɔ̀ mia do kaka to lè èdùa mè boo, ɖo wo la gblɔ̃ be: “Wo gbà le si lè miabe ŋùkɔ̀, sìgbè sã nène” eye mi la si lè ŋùkɔ̀ na wo.

⁷Funua ye mì la to lè, la xa èdùa, la xɔ̀ ɛ̀; Tɔhonɔ̀ mìabe Mawu a ye ɖè è do àsi na mì.

⁸Ne mì xɔ̀ èdùa, mì ɖèzò do e mè; mì la wɔ̀ ɖo Tɔhonɔ̀ be ègbè ɖèɖea ji. Ekèa ye nyi ègbè kè mù le do àsi na mìa.”

⁹Yosùa ɖo wo ɖoɖa eye wo yì do èxa na Ayì be èdùa; wo yì wla ɖo Ayì ku Betɛ̀l be dòdòmè, lè Ayì be èwèɖoxɔ̀pe. Eye Yosùa ci àmèha kpɔ̀tɛawo dòmè dɔ̃ lè èzã ŋua mè.

¹⁰Ŋùdekɛ̃nyɛ fùtù ye Yosùa fɔ̃, kpɔ yebe àhùakɔ̃a, e yomè a, e ye ku Izràɛl be àgbònùglawo lè ŋùkɔ̀ na dùkɔ̃a eye wo yì kpe àhùa kudo Ayì be èdùa.

¹¹Dùkɔ̃ kè lè àlɔ̀ji na àhùawɔ̀wɔa zɔ̃ ku Yosùa kaka va yì èdùa be ŋùkɔ̀ eye wo yì sò àsàɖa ɖo Ayì be èvègo, ègbè wɛwlɛ ɖewo kpò ye sò woa dòmè.

¹²Yosùa cã ŋusùti àkpe àtɔ̃ nène eye be na wo do èxa lè Betɛ̀l ku Ayì be dòdòmè lè Ayì be èwèɖoxɔ̀pe.

¹³Izràɛlviwo sò àsàɖa ɖo Ayì be èdùa be èvègo eye wo gbà do èxa ɖo èdùa be èwèɖoxɔ̀pe; lè èzã ŋua mèa, Yosùa yì bàlìa mè.

¹⁴Vɔ̀, kè ye Ayì be èfìɔa kpɔ ekèa, e ye ku yebe dùkɔ̃a, èdùa be ŋusùtiwo kpata so kplà eye wo to yì àhùa wɔ̀ gbe lè tèpe kè ji ye wo dà àsi ɖo lè Àrabà[5], co èfìɔa mu nya be wo do èxa na yè lè èdùa be ŋùgbedòmè ò.

¹⁵Yosùa ku Izràɛlvi kèwo lè e ŋutia, wo si tùtà zògbèa ji.

¹⁶Ayì be dùkɔ̃a kpata sitè, jè woa yomè. Wo nyà Yosùa ɖo nu eye be kplɔ̀ wo yì boo lè èdùa gbɔ.

¹⁷Lè Ayì ku Betɛ̀l be èdùawo mèa, ŋusùti ɖe mu kpɔ̀tɔ̀, kè ye mu nyà Izràɛlviwo ò; nènea ye wo tàsi èdùa ɖo nùvò gbàa ɖo woa keŋu ye nyà Izràɛlviwo ɖo nu.

¹⁸Tɔhonɔ̀ gblɔ̃ na Yosùa be: “Drɛ̃ èhuã kè lè àsi mè na wòa ɖoɖa Ayì be èdùa, ɖo mù la ɖè è do àsi na wò.” Yosùa drɛ̃ èhuã kè lè àsi mè na ɛ̀a ɖoɖa èdùa gbɔ.

¹⁹Wàlɛbɛ kè bè drɛ̃ yebe àlɔ̀a, Izràɛlvi kèwo do èxa na èdùa, wo to zè ɖèka, ɖo èdùa mè ye wo xɔ̀ èdùa kpata; e yomè a wo ɖè èzò ɖo èdùa mè.

²⁰Ayì be ŋusùtiwo trɔ kpɔ ŋùgbe eye kpɔɖa àzìzɔ le tù lìlìlì lè woabe èdùa ta yì jiŋùkusi; àmè ɖekpe mu gbà ɖo ŋusɛ̃ la si yì ɖùsi àlo èmìɔ̃ mè ò, eye dùkɔ̃ kè le si yì zògbèa ji sãa, trɔ zɔ̃ ɖo àmè kèwo le nyà woa ji.

²¹E kè Yosùa ku Izràɛlvi kèwo lè kudo èawo kpɔ be yèwo tɔ̀ kèwo do èxa xɔ̀ èdùa eye àzìzɔ le tù ɖoɖaa, wo trɔ ɖo Ayì be àhùakɔ̃a ji wù wo.

²²Izràɛlvi kèwo xɔ̀ èdùa, wo to va dogò wo eye Ayì be àhùakɔ̃a ci dòdòmè na Izràɛlviwo eye wo pò wo wù kaka be ɖekpe mu ci àgbè ò.

²³Wo le Ayì be èfìɔa àgbèagbè va na Yosùa.

²⁴Vɔ̀ ekè ye Izràɛl be àhùakɔ̃a wù Ayì be ŋusùtiawo lè zògbèa ji, lè fikè wo tĩ woa yomè yìa vɔ̀a, wo trɔ va Ayì be èdùa mè va crɔ̃ dùkɔ̃ kpɔ̀tɛa lè èwui nu.

²⁵Àmè kèwo kpata jè ànyi lè àzã ŋua gbè lè ŋusù mè, lè nyɔ̃nù mèa be hɛ̃hlɛ̃ mè le nyi àkpe woèvè, woa kpata wo le nyi Ayì be dùkɔ̃a.

²⁶Eye Yosùa mu ɖiɖi yebe àsi kè mè èhuã lè eye be drɛ̃a kaka va na gà kè mè be crɔ̃ Ayìtɔwo vɔ̀ keŋu-keŋu ò.

²⁷Zɔ̃ ɖo Tɔhonɔ̀ be ègbè ɖèɖè na Yosùa jia, Izràɛlviwo sɔ èlãwo ku ènu zãzãwo lè àmɔ̀nyɔ̀nuawo dòmè.

²⁸Yosùa ɖèzò do Ayì be èdùa mè eye be trɔ ɛ̀ wɔ̀ èglìkpowo fikè àgbètɔwo be àfɔ̀ sò lè kaka va na egbè egbèa.

²⁹Wo do èkà ève na Ayì be èfìɔa sɔ kù àti ŋuti kaka na wètrɔ mè, eye ekè èwèa ɖo èxɔ̀a, Yosùa va ɖègbè be woa ɖè yebe ŋutilã kukua lè àtia ŋuti. Wo sɔ ɛ̀ yì dãŋùgbe ɖo èdùa be àgboa nu eye wo bɔ̀ èkpe gãgã kèwo gbà lè kaka va na egbèa ɖo e ji.

³⁰Yosùa tù vɔsakpe na Tɔhonɔ̀, Izràɛl be Mawu a lè Ebàl be ètoa ji,

³¹zɔ̃ ɖo ègbè kè Tɔhonɔ̀ be sumɔ̃vi Mosè do àsi na Izràɛlviwo sìgbè àlekè wo ŋlɔ̀ ɛ̀ lè Mosè be èse xoma mè nène be: vɔsakpe yeye kè ji gàyìbɔ be ènu ɖekpe mu tɔ kpɔ òa. Wo wɔ̀ numème be vɔsa na Tɔhonɔ̀ eye wo gbà wɔ̀ vɔsa na ŋuti fàfa.

³²Funua ye Yosùa ŋlɔ̀ èse kè ye Mosè ŋlɔ̀ lè Izràɛlviwo be ŋùkɔ̀a ɖo èkpeawo ji lè.

³³Izràɛlviwo kpata, ku woabe àmè sĩsĩwo, woabe èdɔwɔ̀tɔwo, kudo woabe kòjoɖotɔwo lètè lè àxà ji àxà ji na zòɖùɖu ɖakà a, lè hũbonɔ kèwo lè Tɔhonɔ̀ be zòɖùɖu ɖakà a be ŋùkɔ̀. Woa dòmètɔ ɖewo tɔtè ɖo Gàrizìm be ètoa gbɔ lɔ̀ge eye àmè kpɔ̀tɛawo lè Ebàl be ètoa gbɔ sìgbè àlekè Tɔhonɔ̀ be sumɔ̃vi Mosè ɖo è ɖɛa nène be woa tu sì na Izràɛl be dùkɔ̃a jè ŋùkɔ̀.

³⁴Lè eŋuã yomè a, Yosùa hlɛ̃ èsea be ènyàtiwo kpata, sìtu nyàwo ku kpɛ̃sɛ̃ nyàwo, lè ènu kè wo ŋlɔ̀ ɖo èsea mèa lè ɖoɖo nu.

³⁵Ènyàti ɖe mu hùedo lè Mosè be ègbè do àsiawo mè ye Yosùa mu gblɔ̃ lè Izràɛl be àmèha kpata be ŋùmè ò, kaka jè nyɔ̃nùwo, ɖèviwo ji ku àmèjro kèwo lè woa dòmèa ji.