Read gen 2Tɛsalonikà 3 Bible Online

2Tɛsalonikà 3 - gen bible

2Tɛsalonikà 3

¹Mɛmlɛ̃a, nɔ̀viwo, mì nɔ fãkue ɖo mia ta, ne Tɔhonɔ̀ be ènyàa ne yì ŋùkɔ̀, eye bèa kpɔ gogo, sìgbè lekè e lè mìa cã mìa dòmèa nène,

²eye ne woa hlùɛ̃ mi lè àglajètɔwo kudo àmènyrãhũwo si; ɖo mu nyi àmèwo keŋu ye ɖo xɔ̀sè ò.

³Tɔhonɔ̀ nyi ànùkuare; e la do mì ŋusɛ̃, la kpɔ mìa ji lè àmè nyràhũa si.

⁴Mi ɖo jìdo ɖo mìa ŋuti lè Tɔhonɔ̀ mè be, mì le wɔ̀, la gbà nɔ wɔ̀ ɖo *èse kèwo mi do na mìa ji.

⁵Tɔhonɔ̀ ne na mìa lɔ̃ Mawu, eye mìa ɖo jìdo kè so Kristò gbɔa.

⁶Mi le do *èse na mì, nɔ̀viwo, lè Tɔhonɔ̀ Yesù Kristò be nyikɔ mè be, mìa na àsà nɔ̀vi sia nɔ̀vi kè zɔ̃nà àzɔ̃lì màye-màye, eye mu zɔ̃nà ɖo ɖoɖo kè mì xɔ̀ so mia gbɔa ji òa.

⁷Đo mìa ŋutɔwo mì nya lekè e jè be, mìa srɔ̃ mi ɖoa, ɖo mi mu zɔ̃ àzɔ̃lì màye-màye lè mìa dòmè ò,

⁸eye mi mu ɖù àmè ɖe be ènu gbalo ò, vɔ̀a mia ŋutɔwo ye jènà àgbàgba kudo ènutìkɔ̀ wɔ̀nà èdɔ, èzã kudo kedè, ne mi mu gbà nyi àgbã lè èkɔ̀ ji na mìa dòmètɔ ɖe ò.

⁹Mu nyi be, mi mu ɖo hɔ̃hlɔ̃ ye ò, vɔ̀a ne mia sɔ mia ɖokoewo wɔ̀ kpɔwɔɛ na mì, ne mìa ɖì mi.

¹⁰Đo wàlɛbɛ kè mi nɔ̀ mìa gbɔ ŋutɔ cã a, èse kè mi do na mìa ye nyi be: “Àmè kè gbe be yè mu la wɔ̀ èdɔ òa, mu gbà ɖù ènu cã ò.”

¹¹Đo mi le sè be, àmè ɖewo lè mìa dòmè le zɔ̃ àzɔ̃lì màye-màye, wo gbe èdɔwɔ̀wɔ, vɔ̀a jo dona ènu àmè bu be ènyà mè.

¹²Mi le biɔ so woa si, eye mi le pò ètoɖo na nènemeawo lè Tɔhonɔ̀ Yesù Kristò mè be, woa nɔ wɔ̀ èdɔ gà sia gà mè, ne woa sù na woa ɖokoewo.

¹³Vɔ̀a mìawo yaa, nɔ̀viwo, ènu mu gbà tìkɔ̀ na mì lè ènyuɛ̃ wɔ̀wɔ mè ò.

¹⁴Ne àmè ɖe mu ɖo èto miabe ènyà kè lè xoma kèa mè òa, mì do jèsìdo è, eye mì mu gbà do èha kudo è ò, ne èŋù ne kpɛ̃ ɛ̀.

¹⁵Gãkea, mì mu gbà sɔ ɛ̀ sìgbè kɛ̃tɔ nène ò, vɔ̀a mì pò fiɔ ɛ̀ sìgbè nɔ̀vi nène.

¹⁶Fàfa be Mawu ŋutɔ ne na mì ŋuti fàfa wè sia wè, lè èmɔwo keŋu nu. Tɔhonɔ̀ ne nɔ̀ ku mìa kpata.

¹⁷Ènyè Paolò, nyè ŋutɔ àlɔ̀ nyè ye le ŋlɔ̀ ègbè dodo kèa ɖoɖa mì. — Nène a ye mù dona àsi àpe xoma sia xoma mè. Ekèa ye nyi àpe àlɔ̀nuŋɔ̀ŋlɔ̃. —

¹⁸Mia Tɔhonɔ̀ Yesù Kristò be màje ne nɔ̀ ku mìa kpata.