Read gen 1Timòteo 2 Bible Online

1Timòteo 2 - gen bible

1Timòteo 2

¹Ye ŋutia, mù le biɔ so mìa gbɔ be, lè ènuwo keŋu mè, jè ŋùkɔ̀a, mìa nɔ ɖè kuku, mìa nɔ fãkue, mìa nɔ blìbɔ̀, mìa nɔ do àkpe na Mawu ɖo àmèwo keŋu ta;

²ɖo èfìɔwo kudo àmè kèwo nyi jiɖùɖuawo ta, ne mìa nɔ̀ kpoo lè fàfa kudo Mawu sisi, gbàkudo ènu kèwo jè na bùbuawo mè.

³Ekèa ye nyɔ, eye be sɔ̀gbè lè Mawu, miabe Hlùɛ̃tɔa be ŋùmè,

⁴àmè kè jro be, àmèwo keŋu ne gãa, eye woa va jèsi nyàwo a be nyanyaa.

⁵Đo Mawu ɖèka ye lè, àmèdòmèɖotɔ ɖèka ye lè Mawu ku àgbètɔwo dòmè: Kristò Yesù,

⁶àmè kè sɔ ye ɖokoe na hlɔ̃si ɖo àmèwo keŋu ta, ekè nyi ɖase lè wàlɛbɛ kè ye ŋutɔ ɖoa.

⁷Ekèa ŋuti Mawu ɖo mù àŋɛ̀dotɔ kudo *àmèdɔ̃dɔ̃. Nyàwo ye mù le to, nyè mu le ɖà àjè ò. E ɖo mù be ma fiɔ àmè kèwo mu nyi Yudàvi òa, ènu kè wo la xɔ̀sè kudo ènu kè nyi nyàwo a.

⁸Ye ŋutia mù jro be ŋusùwo ne nɔ fãkue lè àfi sia àfi, woa nɔ kɔ àlɔ̀ kɔ̀kɔ̀ɛwo ɖoɖa èji, àdɔ̀mèze mà do kudo ènyà mà dɔ̃.

⁹Nène a ke nyɔ̃nùwo cã ne nɔ do àwù nyuɛ̃ ɖe sìgbè lekè e jè a, eye woa jrà woa ɖokoewo ɖo lè bùbu ku ɖokoe ji ɖùɖu mè; mu nyi lè èɖà pòpo, sìka kudo jònu, àlo àwù xɔ̀ci dodo mè ò.

¹⁰Vɔ̀a, woa sɔ èdɔ nyuɛ̃wo ɖo àcɔ na woa ɖokoewo sìgbè àlekè e jè nyɔ̃nù kèwo hũnà Mawu be sɛ̃sɛ̃ mèawo nène.

¹¹E jè be nyɔ̃nùwo ne bɔ̀bɔ̀ woa ɖokoewo sɔ sè mawunya lè bùbu keŋu mè.

¹²Nyè mu na èmɔ nyɔ̃nù be, ne fiɔ ènu, àlo ne kpà àcɛ̀ na ŋusù ò, vɔ̀a ne le ye ɖokoe kpoo.

¹³Đo Adàm ye wo ɖo cucugbã, e yomè a wo ɖo Evà.

¹⁴Mu nyi Adàm ye wo flù ò, vɔ̀a nyɔ̃nù ye wo flù eye e jè àgɔ̀ lè Mawu ji.

¹⁵Gãkea, wo la hlùɛ̃ ɛ̀ gã lè èvijìji mè, ne e kpɔ̀tɔ̀ lè xɔ̀sè ku lɔ̃lɔ̃ kudo àɖèsãnyinyi gbàkudo ɖokoe bɔ̀bɔ mèa.