Read gen 1Timòteo 3 Bible Online

1Timòteo 3 - gen bible

1Timòteo 3

¹Ekèa ye nyi ènyà àdodoe: ne àmè ɖe jro la nyi èhajikpɔtɔa, e jro èdɔ nyuɛ̃.

²Ye ŋutia, e jè be èhajikpɔtɔ ne nyi àmè kè ŋuti ŋùmèkãkã ɖekpe mù lè ò. E jè be èsrɔ̃ ɖèka kpò ne nɔ̀ e si, bèa nyi ŋùsànɔ̀tɔ, ètamèbùtɔ, àmè ɖù ye ɖokoe ji. E ɖo la nyi àmèjroxɔ̀tɔ, la nyi àmè kè nya ènufiɔfiɔa.

³Mu ɖo la nyi àhàsunùtɔ àlo àjrèwɔ̀tɔ ò, vɔ̀a ne nyi hòmèfànɔ̀, mu nyi ègejitɔ ò, mu nyi ègàlɔ̃tɔ ò;

⁴E ɖo la nyi àmè kè ɖù ye ŋutɔ be àxuedo ji nyuɛ̃ ɖe, eye èviawo bùnà ɛ̀, eye wo sènà ètonu na ɛ̀.

⁵Ne àmè ɖe mu nya àlekè e la ɖù ye ŋutɔ be àxuedo ji ò a, àleke be la wɔ̀ la teŋu kpɔ Mawu be èhabɔ̀bɔa ji ò?

⁶Mu gbà nyi àmè kè trɔ èjì mè, ye tèpe mu dìdì ò, ne jajra mu gbà ɖo lãmè na ɛ̀, eye bèa jè Àbòsam be hùɛgbledo mè ò.

⁷Sɔ kpe èa, e jè be, ne ɖo nyikɔ nyuɛ̃ lè àmè kèwo mu nyi Kristòtɔ̀ òa gbɔ, ne mu gbà jè zũzũ ku Àbòsam be èmɔ̀tetrewo mè ò.

⁸Nène a ke e jè be, èhamè-lɔ̀dotɔwo cã ne nyi bùbume ku nyàwototɔwo. Wo mu gbà nɔ nù àhà su ò. Àlè pòɖi mu gbà bìaŋù na wo ò.

⁹Vɔ̀a wo ne le xɔ̀sè be àmlìmànua ɖo àsi lè *jìjigbè mà ɖo èɖi mè.

¹⁰Woa do àmè kèawo kpɔ cucugbã, ne ŋùmè kãkã ɖekpe mu lè woa ŋuti òa, eŋuã woa wɔ̀ woabe èdɔa.

¹¹Nène a ke, e jè be nyɔ̃nù-àlɔ̀dotɔwo cã ɖo la nyi bùbumewo. Wo mu gbà nyi àmègɔ̃mèɖùtɔwo ò. Woa nyi ŋùsànɔ̀tɔwo. Woa nɔ wɔ̀ ànùkua lè ènuwo keŋu mè.

¹²Èhamè-lɔ̀dotɔ ɖo la nyi nyɔ̃nù ɖèka be èsrɔ̃, eye e la ɖù èviawo ku yebe àxuedoa ji nyuɛ̃ ɖe.

¹³Èhamè-lɔ̀dotɔ kèwo la wɔ̀ woabe èdɔ nyuɛ̃ ɖe a, àmè sia àmè la ɖo bùbu na wo, eye wo la teŋu pò nupo ku kãkã ɖo e ji blibo, so xɔ̀sè kè na mi lè èdu ku Kristò Yesùa ŋuti.

¹⁴Mù le ŋlɔ̀ ènu kèawo ɖoɖa wò lè ŋùɖo mè be, mù la va gbɔ wò sɔ̀sɔɛɖe.

¹⁵Vɔ̀a, ne nyè mu va kaba òa, wòa nya àlekè e jè be, wòa zɔ̃ lè Mawu be àxue kè nyi Mawu àgbè-àgbè a be èhabɔ̀bɔ, nyàwo be sɔti kudo dodoea mè.

¹⁶Nyàwo, gã ye nyi mawume nyinyi be àmlìmànua: Mawu ɖè ye ɖokoe fiɔ lè ŋutilã mè, wo ɖè kunù na ɛ̀ lè gbɔ̃gbɔ̃ mè. Àtikplɔtɔwo kpɔ ɛ̀. E nyi àŋɛ̀ ye wo do na màxɔ̀sètɔwo. Wo xɔ̀ e ji sè lè xixea mè, wo kɔ ɛ̀ yì èji lè gogo mè.