Read gen 1Timòteo 4 Bible Online

1Timòteo 4 - gen bible

1Timòteo 4

¹Gbɔ̃gbɔ̃ a gblɔ̃ ɛ̀ peŋu be, lè àzã mlɛ̃awo jia, àmè ɖewo la jo àgɔ̀ lè xɔ̀sè mè, eye wo la tɛ ɖo gbɔ̃gbɔ̃ àmèflùtɔwo kudo gbɔ̃gbɔ̃ vuɛ̃wo be ènufiɔfiɔ ŋuti.

²Wo la bu, to àjè-nufiɔtɔwo be blamùtumùnu wɔ̀wɔ ji, àmè kèwo be *jìjigbèwo wo sɔ ègà zòzo do jèsìdoa.

³Àmè kèawo la nɔ gbe èsrɔ̃ ɖèɖe na àmè, wo la do èse be, àmèwo mu gbà ɖù ènu ɖùɖu kèwo Mawu ɖo, àleke be àmè kèwo xɔ̀sè eye wo jèsi nyàwo a, wo ne ɖù ku àkpe dodoa ò.

⁴Đo Mawu be ènuɖoɖo ɖekpekpe nyɔ, èɖe mu lè e mè kè wo la gbe ò. Vɔ̀a, mi ɖo la ɖù ì kudo àkpe dodo.

⁵Đo a, Mawu be ènyà kudo kuefã le kɔ̀ e ŋuti vɔ̀.

⁶Ne wò sɔ ènu kèawo ɖo nɔ̀viawo be ŋùmèa, wò la nyi Yesù Kristò be sumɔ̃vi àdodoe, kè wò nyi lè xɔ̀sè be nyàwo kudo fiɔfiɔ àdodoe kè do wò kpàsàa mè.

⁷Gbe èdrũ màkɔ̀ màkɔ kèwo nyagãwo tonaa. Zã ɖokoe wò na mawume nyinyi.

⁸Đo ŋutilã be zãzãa, àlè vi ɖe kpò be ɖè. Vɔ̀a mawume nyinyi ɖè àlè lè ènu sia ènu mè, ɖo e ɖo fìãfiã na àgbè kè lè fifìa kudo ekè la ɖɛ vaa.

⁹Ekèa ye nyi ànùkua-nya, kè e jè be àmè sia àmè ne xɔ̀a.

¹⁰Ne mi le jè àgbàgba, eye mi le drɛ̃ àvũa, mi ɖo ŋùɖo ɖo Mawu àgbè àgbè kè nyi àmèwo keŋu be Hlùɛ̃tɔa ŋuti, vevetɔa e nyi àmè kèwo xɔ̀sèa tɔ̀.

¹¹Kã ɖo ènyà kèawo ji eye wòa fiɔ wo.

¹²Mù gbà na àmè ɖe ne dovlo àpo ɖèkajɛ nyinyi ò, vɔ̀a nyi kpɔwɔɛ na xɔ̀sètɔwo lè ènyà mè, lè èdɛ̃ mè, lè lɔ̃lɔ̃ mè, lè xɔ̀sè mè, lè kɔ̀kɔ̀ɛ nyinyi mè.

¹³Jè àgbàgba ne wòa nɔ hlɛ̃ Ŋɔ̀ŋlɔ̃awo na Kristòtɔ̀wo, ne wo bɔ̀a. Nɔ pòfiɔ, nɔ fiɔ ènu wo kaka ne ma va.

¹⁴Mù gbà gbe màje kè lè mè wòa nana ò, màje kè wò xɔ̀ to ènyàgblɔ̃ɖɛ ji, wàlɛbɛ kè èhamèmègãwo ɖo àsi èta na wòa.

¹⁵Ènu kèawo ye wò ɖo la lebè na; woawo ye wò ɖo la le veve ɖe, ne àpo ŋùkɔ̀ yìyi ne ze lè ènuwo keŋu mè.

¹⁶Kpɔ ɖokoe wò ji nyuɛ̃ ɖe. Do veve ènufiɔfiɔ wòa. Do veve ènu lè ekèawo keŋu mè; ɖo, lè ekèa be wɔ̀wɔ mè ye wò la hlùɛ̃ ɖokoe wò ku àmè kèwo lè ɖo èto wòawo gã.