Read gen 1Timòteo 5 Bible Online

1Timòteo 5 - gen bible

1Timòteo 5

¹Mù gbà blù do àmègãxo ò, vɔ̀a pòfiɔ ɛ̀, sìgbè ètɔ wò nène. Pò èto ɖo na ɖèkajɛwo sìgbè nɔ̀vi wò ŋusùwo nène,

²nyɔ̃nù àmègãxowo sìgbè ènɔ̀ wòwo nène. Pò èto ɖo na tùgbɛ̀jɛwo sìgbè nɔ̀vi wò nyɔ̃nùwo nène, lè kɔ̀kɔ̀ɛ nyinyi keŋu mè.

³Lebè na àsukusi kèwo nyi àhòsìwo nyàwo a.

⁴Ne àsukusi ɖe ɖo èviwo, àlo màmayɔviwoa, woa ŋutɔwo ye la kpla hòmèfà wɔ̀wɔ na woa ŋutɔwo be àxue cucugbãa, eye woa na ènu woabe àjìtɔwo; ɖo ekèa jènà Mawu be ŋùmè.

⁵Nyɔ̃nù kè nyi àsukusi nyàwo, eye àmè ɖe mu lè e si òa, sɔna yebe ŋùɖo ɖona Mawu ji, eye e nɔ̀nà blìbɔ̀-blìbɔ̀ ku kuefã ji èzã kudo kedè.

⁶Vɔ̀ a àsukusi kè sɔ ye ɖokoe na àgbèɖùɖu a, e lè àgbè, co vɔ̀ e ku.

⁷Đoŋù ènu kèawo na wo, ne wo mu gbà ɖo ŋùmè kãkã ɖe ò.

⁸Ne àmè ɖe mu lebè na ye ŋutɔ tɔ̀wo ò, eye vevetɔ a na ye ŋutɔ be àxomètɔwo ò a, e gbe xɔ̀sè a, eye e nyrã wu mà-xɔ̀sètɔ.

⁹Mù gbà hlɛ̃ àsukusi ɖe ɖo àhòsìwo dòmè, ne mu ɖo èpè èkà takpo, eye be nyi àmè kè nɔ̀ ŋusù ɖèka kpò gbɔ ò.

¹⁰E ɖo la ɖo nyikɔ nyuɛ̃ lè èdɔ nyuɛ̃wo mè; e ɖo la hɛ̃ èviwo kpɔ, e ɖo la nyi àmèjroxɔ̀tɔ; e ɖo la nyi àmè kè klɔna àfɔ̀ na àɖèsãwoa; e ɖo la nyi àmè kè dona àlɔ̀ èfũmèwo; e ɖo la le èdɔ nyuɛ̃wo keŋu ɖo àsi.

¹¹Vɔ̀a, gbe àsukusi tùgbɛ̀jɛwo xɔ̀xɔ, ɖo ne èsrɔ̃ ɖèɖe le jro woa, wo trɔna lè Kristò yomè.

¹²Wo la gblehùɛ do wo, ɖo wo gbe woabe àjɔ̀gbè cucugbãtɔ̀ kè wo fìã na Kristò.

¹³Bɔ̀ ɖo ekèa ŋutia, kè wo mu ɖo ènu ɖe la wɔ̀ òa, wo ɖìnàsà pòxla, so àxue ɖe mè, yì èbu mè. Eye lè eŋuã wɔ̀wɔ mèa, wo va trɔna zũ kuviɔ̃tɔwo. Mu nyi kuviɔ̃tɔ ɖèɖe kpò ò, vɔ̀a àmè-nyagblɔ̃tɔwo, wo dona ènu àmè buwo be ènyà mè, eye wo gblɔ̃nà ènyà kèwo tɔna èto mèa.

¹⁴Ye ŋutia mù jro be àsukusi tùgbɛ̀jɛwo ne ɖè èsrɔ̃, woa jì èvi, woa kpɔ woabe àxuewo ji, eye wo mu gbà na èmɔ miabe kɛ̃tɔwo, ne woa zũ mi ò;

¹⁵Àsukusi ɖewo ŋutɔ cã trɔ jè Satana yomè vɔ̀.

¹⁶Ne nyɔ̃nù ɖe, kè xɔ̀sèa, ɖo àsukusiwo, lè yebe xòmè mèa, ne hɛ̃ wo, ne àgbã mu gbà ci èkɔ̀ ji na èhabɔ̀bɔa ò, àleke be, èhabɔ̀bɔa ne teŋu kpɔ èmɔ, la hɛ̃ àmè kèwo nyi àsukusi nyàwo a.

¹⁷Wo ne na bùbu kè jè a be tèpe èvè èhamèmègã kèwo kplɔ̀nà èhabɔ̀bɔa nyuɛ̃ ɖeawo, vevetɔa, àmè kèwo le jè àgbàgba lè àŋɛ̀ dodo kudo ènufiɔfiɔ mèa.

¹⁸Đo ŋɔ̀ŋlɔ̃ a gblɔ̃ be: “Mù gbà bla ènu na ènyì-su kè le tùkù *èlùa ò”, eye: “Èdɔwɔ̀tɔ jè na yebe fɛ̃tu.”

¹⁹Mù gbà xɔ̀ èhùɛdodo ɖe ɖo èhamèmègã ɖe ŋuti ò, ne mu nyi lè ɖàsèfo èvè àlo ètɔ̃ nu ò.

²⁰Àmè kèwo wɔ̀ èvuɛ̃a, kã ŋùmè na wo lè àmèwo keŋu be ŋùmè, ne àmè kpɔ̀tɛawo ne vɔ̃.

²¹Mù le pò nupo na wò lè Mawu ku Kristò Yesù gbàkudo àtikplɔtɔ cãcãwo be ŋùmè be, wòa kpɔ ènu kèawo ji, àmè ɖe be ŋùmè mà si, kunù mà wɔ lè ènu ɖe be wɔ̀wɔ mè ò.

²²Mù gbà ci ji, sɔ ɖo àsi èta na àmè ɖe ò, eye mù gbà ɖo mamã lè àmè buwo be èvuɛ̃wo mè ò. Đo ɖokoe wò kɔ̀kɔ̀ɛ ɖe.

²³Mù gbà nɔ nù èsì ɖèɖe kpò ò, vɔ̀a nɔ zã vɛ̃ vi ɖe, ɖo àpo àdɔ̀mè kudo àpo lãmè gbegble ŋuti.

²⁴Àmè ɖewo be èvuɛ̃wo zena àgbãŋùgbà, gbɔ̀xue woa ɖokòjo na wo; vɔ̀a, àmè buwo tɔ̀ yaa, wo va kènà ɖo woa ŋuti, e yomè.

²⁵Nène a ke ye be nyi kudo èdɔ nyuɛ̃wo cã; èɖewo lè àgbãŋùgbà, eye ekèwo mu ze ò a cã mu teŋu bè ò.