Read gen 1Timòteo 6 Bible Online

1Timòteo 6 - gen bible

1Timòteo 6

¹Àmè kèwo keŋu lè kluvi be kɔ̀ga gɔ̃mèwo ne kpɔ woa àpetɔwo be, wo jè na bùbu blibo, ne àmè ɖe mu gbà gblɔ̃ bùsu-nya ɖo Mawu be nyikɔ kudo miabe ènufiɔfiɔ ŋuti ò.

²Àmè kèwo ɖo àpetɔ xɔ̀sètɔwoa, wo mu gbà susu be yèwo nyi nɔ̀viwo lè Kristò mè, ne woa dokpò bùbu nana woabe àpetɔwo ò. Vɔ̀ bòhũa, wo ne sumɔ wo veve ɖe wu, ɖo àmè kèwo kpɔna woabe èdɔ nyuɛ̃wo be àlè xɔ̀a, wo nyi xɔ̀sètɔwo ku àmè ɖèvewo. Mawume nyinyi àdodoe a, ènu kèawo ye wò la nɔ fiɔ, la sɔ nɔ pòfiɔ àmèwo.

³Ne àmè ɖe fiɔ ènu bu, ne mu le mia Tɔhonɔ̀ Yesù Kristò be ènyà àdodoeawo ku fiɔfiɔ kè zɔ̃ ɖo mawume nyinyi ji, ɖo àsi òa,

⁴ègòyitɔ ye be nyi. Mu nya ènu ɖekpe ò; e le le ènyàbiɔsè kudo ènyàdɔɛ wɔ̀wɔ be èdɔ̀. Ènu kèawo hɛ̃nà ŋuhuã, àjrè, bùsu-nya gbɔ̃gblɔ̃, ènyà vuɛ̃ susu ɖo àmè ŋuti,

⁵ènyà dɔ̃dɔ̃ mà-ɖo lipò, va àmè kèwo be susu tro, eye wo dã nyàwoawo dòmè. Wo susuna be, Mawu sɛ̃sɛ̃a, àdɔ̀kù jèje be èmɔnu ye be nyi.

⁶Mawu sɛ̃sɛ̃a, àlè gã ɖe lè e mè na àmè kè ènu kè lè e sia, sùa.

⁷Đo mi mu hɛ̃ ènu ɖekpe va xixe kèa mè ò. Mi gbà nya nyuɛ̃ ɖe be, mi mu teŋu sɔ ènu ɖekpe jo lè e mè yì ò.

⁸Ye ŋutia, ne mi ɖo ènu ɖùɖu kudo ènu tàtaa, e jènà ŋùmè na mi.

⁹Àmè kèwo jina la nyi àdɔ̀kùnɔ̀wo a, jènà tètèkpɔ ku èmɔ̀tetre kudo jojro vuɛ̃, sùkunɔ̀ jɔ̀jɔ tɔ̀wo mè. Ènu kèawo dɔ̃nà àgbètɔwo yìnà èku kudo cɔ̃crɔ̃ mè.

¹⁰Ɛ̃ɛ lɔ̃lɔ̃ ɖoɖo na ègà ye nyi èvuɛ̃wo keŋu be èkè. Àmè ɖewo ji ì, ɖo e jiji ŋuti, kudo ŋùbia, eye wo trã èmɔ jo lè ènu kè wo xɔ̀sè sãa gbɔ. Nène a, wo sɔ veve sùgbɔ ŋɔ woa ɖokoewo.

¹¹Vɔ̀ èwò, Mawu be àmèa, si lè ènu kèawo nu. Ji jɔ̀jɔɛ nyinyi, wɔ̀ ànùkua na Mawu. Đo xɔ̀sè, lɔ̃lɔ̃, veve do ènu kudo hòmèfà.

¹²Wɔ̀ xɔ̀sè be àvũ nyuɛ̃a, àlɔ̀ wò ne sù àgbè màvɔa ji, àgbè màvɔ kè ŋuti ye wo yɔ wò ɖo, ekè mè wò hũ nyuɛ̃ ɖe lè ɖàsèfo sùgbɔ be ŋùmè a.

¹³Fifìa mù le do *èse na wò lè Mawu kè nana àgbè ènuwo keŋuã, be ŋùmè. Eye mù gbà le do è lè Kristò Yesù kè ɖù ɖase nyuɛ̃ lè Pɔ̃tìo Pilatò gbɔa, be ŋùmè.

¹⁴Lebè na èsedodo kèa, èɖi mà ɖo, ŋùmè kãkã mà nɔ̀ e mè, kaka na mia Tɔhonɔ̀ Yesù Kristò be ɖèɖèfiɔ.

¹⁵Mawu, àmè kè nyi sìtume, ŋusɛ̃kpatatɔ, èfìɔwo be Èfìɔ, Tɔhonɔ̀wo be Tɔhonɔ̀a, la ɖè Kristò fiɔ lè ye ŋutɔ be ŋùkèkè kè be ɖo ɖɛa ji.

¹⁶Ye ɖèka kpò ye mu kuna ò, eye e nɔ̀nà kɔ̀kɔ̀ɛ kè mè, àmè ɖekpe mu teŋu gogo òa mè, Àmè kè àmè ɖe mu kpɔ kpɔ, àlo mu teŋu kpɔ cã òa. Ye tɔ̀ ye nyi gogo kudo ŋusɛ̃ kòkòɖàbìa. * Àmèn.

¹⁷Pòfiɔ xixe kèa mè be àdɔ̀kùnɔ̀wo be, wo mu gbà kɔ woa ɖokoewo yì èji ò, eye wo mu gbà sɔ woabe ŋùɖo dà ɖo àdɔ̀kùnu kè mu ɖo kãkãɖoji òa ji ò, vɔ̀a woa sɔ woabe ŋùɖo dà ɖo Mawu kè na mi ènuwo keŋu gbɛ̀lu na miabe zãzãa ji.

¹⁸Wo ne nɔ wɔ̀ àdɔ̀mènyuɛ̃, eye woa jè àdɔ̀kù lè èdɔ nyuɛ̃wo mè, woa lɔ̃ ènu nana àmè kudo ènu màma.

¹⁹Nène a ye wo la bɔ̀ àdɔ̀kùnu na woa ɖokoewo, àdɔ̀kùnu kèa la nyi dodoe nyuɛ̃ na hùenu kè gbãnà a, ne woa ɖo àgbè àdodoe a.

²⁰Oò Timòteo, kpɔ ènu kè wo sɔ do àsi na wòa ji, na àsà, àseŋu kpòtoe, mà jè ètowo ku àjè-nunya be ènu dàda fiɔfiɔ.

²¹Ènu kèawo mè àmè ɖewo hũ, eye wo trã èmɔ jo lè xɔ̀sèa gbɔ. Mawu be màje ne nɔ̀ ku wò.