Read gen 2Timòteo 3 Bible Online

2Timòteo 3 - gen bible

2Timòteo 3

¹Nya ekèa nyuɛ̃ ɖe be, lè àzã mlɛ̃awo jia, hùenu sɛ̃sɛ̃wo la va.

²Đo àmèwo la nyi woa ɖokoe lɔ̃tɔwo, ègàlɔ̃tɔwo, ègòyitɔwo, hɛ̀wùtɔwo, bùsu nyàgblɔ̃tɔwo, àmèmàsètonu na àjìtɔwo, àkpemàdomewo, àmè màkɔ̀màkɔwo,

³àmè màɖo lɔ̃lɔ̃ na woabe èhaviwo, àdìgbãdotɔwo, àmègɔ̃mè ɖùtɔwo, àmè mà teŋu ɖù woa ɖokoe jiwo, àdãmewo, àmèmalɔ̃nyuɛ̃wo,

⁴èkplixɔ̀namètɔwo, ètamèmàbùtɔwo, jajratɔwo, wo la lɔ̃ vivi sèse wu Mawu.

⁵Wo la ɖo mawumewo be nɔ̀nɔmè, vɔ̀a wo la gbe hɔ̃hlɔ̃ kè lè mawume nyinyi mèa. Trɔ lè àmè kèawo hati yomè.

⁶Đo àmè kèawo dòmètɔ ɖewo lè, kèwo yìnà àxuewo mè, blènà nyɔ̃nù kèwo ɖɔ ku èvuɛ̃awo, kèwo mè jojro hamèhamèwo lè eye wo kplɔ̀nà wo.

⁷Nyɔ̃nù kèawo ye wo fiɔna ènu wè sia wè, vɔ̀a, wo mu teŋu nyana nyàwo a gbèɖe ò.

⁸Sìgbè àlekè Yanès ku Yambrɛ̀s sitè ɖo Mosè ŋutia, nènea ke ye woawo cã wo sitè ɖo nyàwo a ŋuti. Wo nyi àmè kèwo ètamè gble na a, wo mu likè lè xɔ̀sè mè ò.

⁹Vɔ̀a wo mu la yì ŋùkɔ̀ kpe è ò, ɖo woabe sùkunɔ̀ jɔ̀jɔ la ze na àmèwo keŋu, sìgbè àlekè àmè èvè kèawo tɔ̀ ze a nène.

¹⁰Vɔ̀a wò yaa, wò srɔ̃ mù le ènu sia ènu mè; wò ɖo èto àpe ènufiɔfiɔ, wò sɔ àpe àgbènɔ̀nɔ, wò jèsi àpe ɖoɖowo, àpe xɔ̀sè, àpe àdòdò, àpe lɔ̃lɔ̃, àpe jìdo.

¹¹Wò nya yomètĩtĩwo kudo èfũ kèwo mù kpe lè Ãtiokìa, Ikonìa kudo Listràa. Ɛ̃ɛ mù kpe èfũ sùgbɔ. Vɔ̀a, Tɔhonɔ̀ hlùɛ̃ mù gã lè woawo keŋu mè.

¹²Àmè kèwo keŋu jro la zã Mawu mè be àgbè lè ɖèka wɔ̀wɔ kudo Kristò Yesù mèa, wo la tĩ woa cã woa yomè.

¹³Vɔ̀a àmènyrãhũwo kudo àmèflùtɔwo la yì ŋùkɔ̀ lè èvuɛ̃ mè, wo la nɔ̀ flù àmèwo, eye wo la nɔ flù woa ɖokoewo.

¹⁴Gãkea wò yaa, nɔ̀ ènu kèwo wò kpla, eye wò xɔ̀ ku kãkã ɖo e jiawo mè. Wò nya àmè kè gbɔ wò kpla ènu kèawo soa.

¹⁵So àpo ɖèvi mè kea, wò nya Ŋɔ̀ŋlɔ̃ Kɔ̀kɔ̀ɛ kèwo teŋu na wò ènunya na hlùɛ̃gã, to xɔ̀sè kè lè Kristò Yesù mèa ji.

¹⁶Mawu ye nana be àmèwo ŋlɔ̀nà mawunya ɖekpekpe. Mawunyaa nyɔ, be woa sɔ fiɔ ènu àmè, woa sɔ kã ŋùmè na àmè; woa sɔ jɔ̀ àmè, eye woa sɔ kpla àmè na ènu jɔ̀jɔɛwɔ̀wɔ.

¹⁷Ne àmè kè sɛ̃nà Mawu a ne zɔ̃ sù, eye bèa sɔ̀gbè na èdɔ nyuɛ̃ siasìa.