Read gen Titò 1 Bible Online

Titò 1 - gen bible

Titò 1

¹Xoma kèa so ènyè Paolò, Mawu be sumɔ̃vi kudo Yesù Kristò be *àmèdɔ̃dɔ̃a gbɔ. Mawu dɔ̃ mù be ma do àlɔ̀ Mawu be àmè cãcãwo, ne woabe xɔ̀sè bèa sĩ ɖo e ji, eye ma fiɔ wo nyàwo kè lè miabe mawunyaa mèa.

²Ne woa nɔ̀ ŋùɖo mè na àgbè màvɔa. Mawu, àmè kè mu ɖànà àjè òa, fìã àgbè mà-vɔ kèa na mi so gɔ̃mèjèje a.

³Mawu, mia hlùɛ̃tɔa, ɖè yebe ègbèdoàsi fiɔ lè hùenu kè ye ŋutɔ ɖo ɖɛa ji, eye be sɔ ɛ̀ do àsi na mù be ma gblɔ̃ ènyà na àmè sia àmè.

⁴Mù le ŋlɔ̀ xoma kèa ɖoɖa wò Titò, èvi nyè ŋutɔ-ŋutɔ: èwò, àmè kè ɖo xɔ̀sè ɖèka ku mùa. Mawu Àta ku Kristò Yesù, mia hlùɛ̃tɔa ne na wò màje ku fàfa.

⁵Mù gble wò ɖo Kretà, ne wòa jrà ènu kèwo kpɔ̀tɔ̀awo ɖo. Mù ji be wòa ɖo èhamèmègãwo ɖo èdù sia èdù mè, sìgbè àlekè mù ɖo è na wòa nène.

⁶Àmè kè wò la ɖoa la nyi àmè kè ŋuti ŋùmèkãkã mu lè ò. Àmè kè ɖè nyɔ̃nù ɖèkaa, àmè kè be èviwo nyi xɔ̀sètɔwo, eye wo mu pònà nupo bàɖà so woa ŋuti, àlo gblɔ̃nà so woa ŋuti be wo mu sènà àmègbe ò.

⁷E jè be èhajikpɔtɔ, àmè kè le kpɔ Mawu be ènuwo jia ne nyi àmè kè ŋuti ŋùmèkãkã mu lè òa. Mu jè be bèa nyi àmè kè jènà ŋùmè na ye ɖokoe, àlo àmè kè dona àdɔ̀mèze kaba kaba ò. Mu ɖo la nyi àmè kè nùnà àhà muna, àlo àmè kè wɔ̀nà ènu àdòdò màhɛ̃tɔ̀, àlo àmè kè cina ji be yèa kpɔ àlè sùgbɔa ò.

⁸E ɖo la nyi àmè kè xɔ̀nà àmèjro, àmè kè lɔ̃nà ènu nyuɛ̃ wɔ̀wɔ, àmè kè teŋu lena ye ɖokoe, àmè kè wɔ̀nà ènu jɔ̀jɔɛ, àmè kè lè kɔ̀kɔ̀ɛ ɖe kudo àmè kè ɖùnà ye ɖokoe jia.

⁹Wu ekèa, e jè be bèa nyi àmè kè le ànùkua-nya kè mi xɔ̀sè, eye be sɔ̀ kudo ènu kè mi le fiɔa mè ɖo àsi sɛ̃sɛ̃ ɖe. Nène a, e la teŋu fiɔ ènu, la do ŋusɛ̃ àmèwo, eye be la teŋu sɔ ènufiɔfiɔ àdodoe a pò fiɔ ènyàjinyàtotɔwo.

¹⁰Ètotrìtɔwo, ènyà gbalo gblɔ̃tɔwo ku àmèflùtɔ sùgbɔ lè Yudàvi kèwo trɔ kristòtɔ̀awo dòmè.

¹¹E jè be woa ci ènyà lè àmè kèawo nu, ɖo wo le titɔ susu na xòmè blibowo, eye wo le fiɔ ènu kè mu jè òa, ɖo àlè pòɖi kè wo la kpɔa ŋuti.

¹²Woa dòmètɔ ɖèka kè nyi Mawu be gblɔ̃ɖɛtɔa gblɔ̃ be, “Kretàtɔwoa, àjèɖàtɔwo kpò ye wo nyi, ègbemèlã vuɛ̃wo, ènusuɖùtɔwo, kuviɔ̃tɔwo ye wo nyi.”

¹³Ènyà kèa nyi nyàwo. Đo ekèa ŋutia, kã ŋùmè na wo veveɖe, ne woa teŋu likè lè xɔ̀sè mè,

¹⁴àleke be wo mu gbà tɛ ɖo Yudàviwo be èdrũwo, àlo *èse kè àmè kèwo gbe nyàwo a, wo dona na woa ŋuti ò.

¹⁵Ènu sia ènu nɔ̀nà kɔ̀kɔ̀ɛɖe na àmè kèwo kɔ̀a. Vɔ̀ àmè kèwo mu kɔ̀ ò, eye wo mu xɔ̀ sè òa, ènu ɖekpekpe mu nɔ̀nà kɔ̀kɔ̀ɛɖe lè woa gbɔ ò. Woabe susuwo kudo *jìjigbè keŋu mu kɔ̀ ò.

¹⁶Àmè kèawo gblɔ̃nà be yèwo jèsi Mawu, vɔ̀a woabe ènuwɔ̀nàawo ɖènà fiɔ be wo gbe è bòhũ. Wo mu nyi àmè na èdɔ nyuɛ̃ ɖekpe wɔ̀wɔ klua ò.