Read gen Hebrùwo 10 Bible Online

Hebrùwo 10 - gen bible

Hebrùwo 10

¹Ekè Yudàviawo be èsea nyi vɔ̃vɔ̃lì na ènunyuɛ̃ kèwo gbãnà a, eye mu nyi ènu ŋutɔ-ŋutɔ òa, mu la teŋu kù ɖo èpè sia èpè be vɔsa ɖèka ŋùku mèa ŋuti, kè la na be àmè kèwo le dɔ̃ va Mawu gbɔa, woa kɔ̀ zè ɖèka ò.

²Ne mu nyi nène òa, wo kè nɔ̀tè vɔsa ŋua wɔ̀wɔ. Đo ne wo lè mawusɛ̃tɔwo ɖì, zè ɖèka kpòa, èvuɛ̃ nyanya mu teŋu gbà nɔ̀ woa mè ò.

³Vɔsa ŋuawo nana be àmèwo ɖonaŋù woabe èvuɛ̃wo èpè sia èpè.

⁴Đo ènyì-suwo ku gbɔgbɔɛwo be èhũ mu teŋu ɖè èvuɛ̃ jo gbèɖe ò.

⁵Ekèa ŋuti ye, ekè Kristò va xixea mèa, e gblɔ̃ be: “Wò mu ji vɔsa kudo ènu nanawo ò, vɔ̀a ŋutilã ye wò jràɖo na mù.

⁶Vɔsa mème kudo ènu nanawo sɔ ɖè èvuɛ̃ jo, mu jènà ŋùmè na wò ò.

⁷Eye mù gblɔ̃ be: 'Kpɔɖa, ènyè ye nyi ekèa, mù va, Mawu, be ma wɔ̀ èjro wò, sìgbè àlekè wo ŋlɔ̀ ɛ̀ ɖo Èse Xoma a mè so ŋuti nyèa nène.'”

⁸E gblɔ̃ cucugbã be: “Wò mu ji vɔsa, ènu nana, ènu mème, kudo vɔ̀sawo ɖo èvuɛ̃wo ta ò.” Vɔ̀ wo wɔ̀nà ekèawo, zɔ̃ ɖo èsea ji.

⁹E gbà gblɔ̃ be: “Kpɔɖa, mù va be ma wɔ̀ àpo èjro.” E ɖè sɛ̃sɛ̃ cucugbã tɔ̀a jo, eye be sɔ èvègɔ̃a ɖo e tèpe.

¹⁰Èjro kèa mè wo kɔ̀ mia ŋuti lè, to Yesù Kristò be ŋutilã sɔsɔ na, zè ɖèka, na hùenuwo keŋu.

¹¹Eye mawunɔ ɖe sia ɖe tɔnatè gbè sia gbè lè Mawu sɛ̃pe, sanavɔ ɖèka ŋùkumè, eji-eji, vɔ̀a vɔsa ŋuawo mu teŋu ɖè èvuɛ̃ jo gbèɖe ò.

¹²Vɔ̀ ekè Kristò ya savɔ, zè ɖèka, ɖo ènuvuɛ̃wo taa, e nɔ̀ ànyi lè Mawu be ɖùsi mè kaka sɔ yì.

¹³So wàlɛbɛ ŋuaa, e le tɔtè kpɔ gà kè mè wo la sɔ yebe kɛ̃tɔwo wɔ̀ yebe àfɔ̀ɖojinua.

¹⁴Vɔsa ɖèka kpò ye be sɔ kɔ̀ àmèwo ŋuti, zè ɖèka na hùenuwo keŋu.

¹⁵Eye Gbɔ̃gbɔ̃ Kɔ̀kɔ̀ɛ a cã ɖù ɖase so e ŋuti na mi ekè be gblɔ̃ be:

¹⁶“Ekèa ye nyi èzò kè mù la ɖù kudo wo, lè ŋùkèkè ŋuawo yomè; Tɔhonɔ̀ gblɔ̃ be: 'Mù la sɔ àpe èseawo do woabe èjìwo mè, mù la ŋlɔ̀ wo ɖo woabe susuwo mè.'”

¹⁷E gbà yì e ji be: “Nyè mu la gbà ɖoŋù woabe èvuɛ̃wo kudo woabe dàdawo ò.”

¹⁸Vɔ̀ àfi kè ye èvuɛ̃ sɔ kè àmè lèa, vɔsa na àgɔ̀ mu gbà lè ke ò.

¹⁹Nène a, nɔ̀viwo, ekè èmɔnu lè na mi be mia ɖo Tèpe Kɔ̀kɔ̀ɛa, to Yesù be èhũ jia,

²⁰e sɔ yebe ŋùtilã ɖè èmɔ yeye àgbè àgbè na mi, to xɔ̀mèsòvɔa ji.

²¹Ekè ye mi ɖo *mawunɔ gã kè lè Mawu be àxuea nua,

²²mì na mia dɔ̃ va Mawu gbɔ ku èjì àdodoe, lè xɔ̀sè be kãkãɖoji blibo mè, èjì kèwo be jìjigbè wo klɔ lè èvuɛ̃ si, eye wo lè miabe àmètiwo ɖì ku èsì kɔ̀kɔ̀ɛ.

²³Mì na mia le ènu kè mè mi hũnàa be ŋùɖo ɖo àsi veve ɖe, ɖo àmè kè fìã ɛ̀a nyi ànùkuame.

²⁴Mì na mia lebè na mia nɔ̀nɔwo kudo nɔ̀vi lɔ̃lɔ̃, lè èdɔ nyuɛ̃ wɔ̀wɔ mè.

²⁵Mi mu gbà gbe miabe bɔ̀bɔ̀pewo yìyi, sìgbè àlekè àmè ɖewo wɔ̀nàa nène ò, vɔ̀a mia pòfiɔ mia nɔ̀nɔwo, mia wɔ̀ ekèa wu, kaka kè mì kpɔ be Tɔhonɔ̀ be kòjo ɖo zãa le gogoa.

²⁶Đo ne mi nya gãke, gbà kpɔ̀tɔ̀ le wɔ̀ èvuɛ̃, wàlɛbɛ kè mi xɔ̀ nyàwo be ènunya vɔ̀a, vɔsa na èvuɛ̃ kèke ɖe mu gbà lè ò,

²⁷sɔ wu vɔ̃vɔ̃ ŋɔjitɔ̀ kudo èzò be kòjoɖoɖo kè la crɔ̃ àmè jè àglawoa.

²⁸Ne àmè ɖe dà Mosè be èsea ji, eye àmè èvè àlo ètɔ̃ gbe ɖù ɖase so e ŋuti kpòa, wo wùnà ɛ̀, ŋuzĩzĩ mà ku.

²⁹Èto dɔ̃dɔ̃ bàɖà kɛ ye mì bù be e jè na àmè kè sɔ Mawu be Èvia wɔ̀ ènu gbalo, eye be pòɖi *zòɖùɖu be èhũ kè kɔ̀ e ŋutia, eye e dovlo Gbɔ̃gbɔ̃ Kɔ̀kɔ̀ɛ a ò?

³⁰Đo mi nya àmè kè gblɔ̃ be: “Tɔ̀ nyè ye nyi èhlɔ̃ biɔ biɔ; ènyè ye la ɖo e tèpe.” E gbà gblɔ̃ be: “Tɔhonɔ̀ la ɖo kòjo ku yebe dùkɔ̃a.”

³¹Bàbà na àmè kè la gɛ̃ jè Mawu àgbè-àgbè a be àsi mèa.

³²Mì ɖoŋù ŋùkèkè kèwo va yìawo, ekè mì xɔ̀ Mawu be kɛ̃klɛ̃a vɔ̀, zè ɖèkaa, mì dojì wɔ̀ àvũ fuu, lè àyàɖùɖuwo mè.

³³Gà ɖewo mèa, wo zũ mì lè àmè dòmè, ku àyà do na àmè. Gà ɖewo mèa, mì nyi àmè kèwo kpɔ èmɔnu, nɔ̀ èdu ku àmè kèwo wo le do àyà na nèneawo.

³⁴Đo mì ku ŋuzĩzĩ na gàmènɔ̀tɔwo, eye mì dojì ku jìjɔɛ, wàlɛbɛ kè wo xlà mìabe ènuwoa, ɖo mì kã ɖo e ji be àdɔ̀kùnu kè nyɔ wu, eye be nɔ̀nà ànyi tɛ̀gbɛ̀a, lè na mì.

³⁵Nène a, mì mu gbà bu kãkã ɖo e ji kè lè mìa sia ò, ɖo, èfɛ̃tu gã ɖe lè na ɛ̀.

³⁶Đo a mì hiã vevedonu ne mìa teŋu sɔ wɔ̀ Mawu be èjro, la sɔ xɔ̀ ènu kè be fìãa.

³⁷“E kpɔ̀tɔ̀ vi ɖe, vi ɖe kpò ne àmè kè gbãnà a bèa va ɖo. Mu la dìdì gbɔ̀xue be la va ò.

³⁸Àpe àmè jɔ̀jɔɛa, la nɔ̀ àgbè, to xɔ̀sè ji. Vɔ̀ ne e gbìgbɔ̀ yì ŋùgbea, nyè mu la kpɔ jìjɔɛ ɖo e ŋuti ò.”

³⁹Mi mu lè àmè kèwo gbìgbɔ̀ yìnà ŋùgbedòmè na woabe cɔ̃crɔ̃awo dòmè ò, vɔ̀ mi lè àmè kèwo xɔ̀sèawo dòmè na miabe èklawo be hlùɛ̃gã.