Read gen Hebrùwo 11 Bible Online

Hebrùwo 11 - gen bible

Hebrùwo 11

¹Xɔ̀sè ye le nyi jìdo ɖo ènu kèwo ŋuti wo le ɖoŋù ɖoa, kãkã ɖo ènu kèwo wo mu le kpɔ ò a ji.

²Đo xɔ̀sè mè ye àmè kèwo nɔ̀ ànyi sãawo, ɖù ɖase nyuɛ̃ so Mawu ŋuti lè.

³Lè xɔ̀sè mèa, mi sè e gɔ̃mè be Mawu sɔ yebe ènyàa ɖo xixea, àleke be ènu kè wo mu le kpɔ òa, ye ɖo ènu kè wo le kpɔa.

⁴Lè xɔ̀sè mè ye Abɛ̀l savɔ na Mawu, eye yebe vɔsa jè ŋùmè na Mawu, wu Kaɛ̃ tɔ̀. Eye kè Mawu kpɔ be e nyi ènujɔ̀jɔɛwɔ̀tɔa, e xɔ̀ yebe vɔsaa, eye wo ɖù ɖase nyuɛ̃ so e ŋuti. E ku vɔ̀ gãkea, e gbà kpɔ̀tɔ̀ le pò nupo lè xɔ̀sè mè.

⁵Lè xɔ̀sè mè ye wo sɔ Enɔ̀k yì Mawu gbɔ lè jiŋùkusi, ekè mu ku òa. Àmè ɖe mu gbà kpɔ ɛ̀ gbèɖe ò, ɖo Mawu ɖè è jo. Gbɔ̀xue wo la sɔ ɛ̀ joa, wo ɖù ɖase so e ŋuti be, e jè ŋùmè na Mawu.

⁶Vɔ̀ ne àmè ɖe mu ɖo xɔ̀sè òa, àmèa mu la teŋu jè Mawu be ŋùmè ò. Àmè kè gogo Mawu a, ɖo la xɔ̀sè be Mawu lè, be e nana àjɔ̀ àmè kèwo le ji ì veve ɖe a.

⁷Nɔa xɔ̀ Mawu ji sè. Mawu ɖè ènu kèwo àmèwo mu le kpɔ hàɖe ò, vɔ̀, wo la va jɔ̀awo fìɔ ɛ̀. Ekèa na be Nɔa sɔ Mawu be ènyàa veve ɖe. E kpà àɖakàhũ ɖe ne bèa teŋu sɔ hlùɛ̃ yebe xòmèa gã. Lè ekèa wɔ̀wɔ mèa, Nɔa gblehùɛ do xixea. Eye Mawu bù ì na ɛ̀ jɔ̀jɔɛ to yebe xɔ̀sè ji.

⁸Lè xɔ̀sè mè ye Abràham sè ètonu, wàlɛbɛ kè Mawu yɔ ɛ̀a, ne bèa hũ yì tèpe kè la va nyi ècrɔ̃nu na ɛ̀. E so, tùtà àfi kè mu nya òa.

⁹Lè xɔ̀sè mè ye e yì nɔ̀ ànyigbã kè Mawu fìã na ɛ̀a ji, sìgbè àmèjro nène. E nɔ̀ gòxɔ mè, sìgbè Izàk kudo Yakɔb, kèwo xɔ̀ fìãfìã ŋua kea nène.

¹⁰Đo Abràham le tɔtè kpɔ èdù ɖe kè ɖo dodoe sɛ̃ŋua, èdù kè be àɖàŋùɖotɔ kudo èxɔ̀tùtɔ Mawu ŋutɔ nyia.

¹¹Lè xɔ̀sè mè ye Sarà cã kpɔ ŋusɛ̃, sɔ fɔ èfu kè e sĩ vɔ̀ ŋutɔ cã a, ɖo e xɔ̀sè be àmè kè fìãa àjɔ̀gbèa nyi ànùkuame.

¹²Eŋuã ŋuti àgbètɔ sùgbɔ to so àmè ɖèka kè be ŋutilã ku vɔ̀a mè. Wo sùgbɔ sìgbè wètriviwo lè jiŋùkusi nène, sìgbè àpùta be èkɔ nène, àleke be wo mu teŋu hlɛ̃ wo ò.

¹³Xɔ̀sè mè ye àmè kèawo kpata ku lè. Wo mu kpɔ ènu kè Mawu fìãa xɔ̀ ò, vɔ̀ wo kpɔ ɛ̀, eye wo do ɖàxue na ɛ̀ ɖoɖa lè àzɔ̀ge, ɖo wo nya, eye wo gblɔ̃ ɛ̀ be àmèjrowo kudo èmɔzɔ̃tɔwo yèwo nyi lè ànyigbã ji.

¹⁴Àmè kèwo pònà nupo nèneawo, ɖè è fiɔ be yèwo le ji dènyigbã ɖe.

¹⁵Ne ɖe ye wo le bù ànyigbã ŋua, kè ji wo jo lèa ŋuti kpɔa, wo kè gbà kpɔ èmɔnu la trɔ yì e ji.

¹⁶Ekè be lè nènea, èdù kè nyɔ wu, kè nyi jiŋùkusia le jro wo. Ye ŋutia, mu wɔ̀ ŋùkpɛ̃ na Mawu be woa yɔ Yè be yèwo be Mawu ò, ɖo e jrà èdù ɖe ɖɛ na wo.

¹⁷Lè xɔ̀sè mè ye Abràham, wàlɛbɛ kè Mawu do e kpɔa, e sɔ èvia Izàk na, e ye àmè kè xɔ̀ fìãfìãa, sɔ èvia àkòŋùgòa na.

¹⁸Àmè kè wo fìã na be: “Izàk mè wo la yɔ àpo jìjimèviwo lè.”

¹⁹E bù ì be Mawu sù la fɔ̃ àmè so èku ŋutɔ cã, ye ŋuti e gbà gbìgbɔ̀ xɔ̀ ɛ̀ sìgbè àmè kè fɔ̃ so èkua nène.

²⁰Lè xɔ̀sè mè ye Izàk tusì na Yakɔb ku Esau, *sìtu kè be èdɔwɔ̀wɔ la ɖɛ vaa.

²¹Lè xɔ̀sè mè ye Yakɔb, wàlɛbɛ kè be la kua, e tusì na Yosɛ̀f be èviawo, ɖèka ɖèka, nɔ̀ gòzomè ku yebe èkpòa, le sumɔ Mawu.

²²Lè xɔ̀sè mè ye Yosɛ̀f, wàlɛbɛ kè yebe àgbè ɖo vɔ̀vɔnua, e ɖoŋù Izràɛlviwo be toto lè Ejiptè, be na ègbè so àlekè wo la ɖì ì ɖoa ŋuti.

²³Lè xɔ̀sè mè ye, Mosè, wàlɛbɛ kè wo jì ìa, yebe àjìtɔwo sɔ ɛ̀ wla, wètri ètɔ̃, ɖo, wo kpɔ be e jè ɖèkajɛ, eye wo mu vɔ̃ èfìɔ be èsea ò.

²⁴Lè xɔ̀sè mè ye Mosè, wàlɛbɛ kè be sĩa, e gbe be wo mu gbà yɔ yè be Faraɔ̀n be èvi-nyɔ̃nù be èvi ò.

²⁵E lɔ̃ be yèa ɖù àyà kudo Mawu be dùkɔ̃a, wu be yèa sè èvuɛ̃ be vivi na hùenu vi ɖe kpò.

²⁶E susu be, woa crì yè sìgbè àleke wo crì Mɛ̀sia nènea, xɔ̀ àsi wu Ejiptè be àdɔ̀kùnuwo kpata, ɖo e le kpɔ àjɔ̀ kè la so e mèa ɖaa.

²⁷Lè xɔ̀sè mè ye Mosè jo lè Ejiptè, mu vɔ̃ èfìɔa be àdɔ̀mèzea ò, ɖo, e lè na ɛ̀ sìgbè e le kpɔ Mawu màkpɔmàkpɔa nène.

²⁸Lè xɔ̀sè mè ye e ɖù Toŋutivayì be àzãa, eye Mosè hlɛ̃ èhũa ne àmècrɔ̃tɔa mu gbà tɔ àsi Izràɛlviwo be ŋùkɔ̀gbeviwo ŋuti ò.

²⁹Lè xɔ̀sè mè ye Izràɛlviwo sò plãŋùpòfɛ̃ be àpùa, sìgbè ànyigbã pupu ji wo le to nène. Ekè Ejiptètɔwo tè è kpɔa, wo ku ci àpùa mè.

³⁰Lè xɔ̀sè mè ye Yerikò be èglìwo mù, ekè wo zɔ̃ trɔ ɖo èdùa ŋùkèkè adrɛ̃ a.

³¹Lè xɔ̀sè mè ye Ràhab, gbòlòwɔ̀tɔa mu crɔ̃ kudo ètonu màsètɔwo ò, ɖo e xɔ̀ bèkpɔɛawo ɖo àxomè.

³²Ènyà kɛ ye mù la gbà gblɔ̃ ò? Đo gàmè la yì ne ma pò nupo so Gideɔ̀n, Baràk, Samsɔ̀n, Jɛftè, David, Samuɛl ku gblɔ̃ɖɛtɔwo ŋuti.

³³Àmè kèwo, lè xɔ̀sè mèa, ɖù èfìɔduwo ji, wɔ̀ jɔ̀jɔɛ, xɔ̀ fiãfiãwo, miɔ̃ ènu na jãŋùtawo.

³⁴Àmè ɖewo ci èzò be ŋusɛ̃, wo si lè èwui be cɔ̃crɔ̃ nu, xɔ̀sèa do ŋusɛ̃ àmè kèwo gbɔjɔ sãawo, àmè ɖewo wɔ̀ kãlì lè àhùa mè, xɔ̀sè na, wo nyà àmèjro be àhùakɔ̃wo ɖo gbe.

³⁵Nyɔ̃nùwo be àmè kukuwo fɔ̃ so èku. Wo do lãmève na àmè ɖewo, wo gbe be wo mu gbà xɔ̀ na yèwo ò, ɖo wo lè tɔtè kpɔ fɔ̃fɔ̃ so èku, ekè nyɔ wua.

³⁶Wo ɖè àlɔmè so àmè ɖewo ŋuti, wo pò àmè ɖewo kudo àtãŋù, wo bla àmè ɖewo eye wo do wo ègàkpa mè.

³⁷Wo pò èkpe àmè ɖewo wù. Wo sò àmè ɖewo ku sakà, wo wù àmè ɖewo kudo èwui, àmè buwo dãgbã lè ègbe ji, le yì lè gbɔgbɔɛ kudo àlɛ̃ be àgbàzewo mè, so àfi ɖe yì àfi bu, wo nɔ̀ èhiã mè, wo tĩ woa yomè, do àyà na wo.

³⁸Woawo kè xixe kèa mè nɔ̀nɔ mu jè na òa, wo le dã lè zògbèwo kudo ètowo ji, lè ànyigbã be èdowo kudo àkpãdowo mè.

³⁹Àmè kèawo kpataa xɔ̀ Mawu ji sè, eye e ɖù ɖase nyuɛ̃ so woabe xɔ̀sè ŋuti, gãke wo mu kpɔ ènu kè Mawu fìãa xɔ̀ ò.

⁴⁰Mawu kpɔ ènu kè nyɔ wua ɖɛ na mi, be ne mi mu lè òa, wo mu la zɔ̃ sù ò.