Read gen Hebrùwo 12 Bible Online

Hebrùwo 12 - gen bible

Hebrùwo 12

¹Miawo yaa, ɖàsèfo sùgbɔ kèawo trɔ do mi. Ye ŋutia, mia ɖè ènu kpɛ̃kpɛ̃ kudo èvuɛ̃ kè dona gà àmè ɖo àsà mè, ne mia sɔ vevedonu sɔ pu dù kè lè ŋùkɔ̀ na mia.

²Ne mia sɔ miabe ŋùkuviwo ɖo Yesù kè nyi miabe xɔ̀sè be gɔ̃mèjèje kudo yebe ènuwuwua ji. Ekè be nya jìjɔɛ kè lè ŋùkɔ̀ na ɛ̀, e dojì ku lè àtisòga ŋuti, eye èŋù mu kpɛ̃ ɛ̀ ɖo èku kèa ŋuti ò. Fifìa, e nɔ̀ ànyi lè Mawu be èfìɔzìkpea be ɖùsi mè.

³Mì bù àmè kè dojì, xɔ̀ lekè èvuɛ̃wɔ̀tɔwo sitè ɖo ye ŋutɔ ŋutia kpɔ. E xɔ̀ ɛ̀, ne ènu mu gbà tìkɔ̀ na mì, ne mìa gbɔjɔ ò.

⁴Đo àvũ kè mì le wɔ̀ ku èvuɛ̃a, mì mu kpɔ wɔ̀ ɛ̀ kaka yì èku-do nu ò.

⁵Eye mì ŋlɔ̀be ètopòɖo-nya kèwo wo do àsi na mì, sìgbè èviwo nènea be: “Èvi nyè, mù gbà sɔ Tɔhonɔ̀ be ètodɔ̃a wɔ̀ ènu gbalo ò, eye mù gbà yɔ yebe ŋùmè kãkã na àmèa be ènu bàɖà ò.

⁶Đo àmè kè Tɔhonɔ̀ lɔ̃a ye be dɔ̃nà èto na. Èvi kèwo be xɔ̀ àtuawo ye be pònà.”

⁷Mìabe kpakpla ŋuti ye mì le ɖù àyà ɖo. Mawu le hɛ̃ mì sìgbè èviwo nène. Èvi kɛ ye lè, ekè ètɔa mu kplana ò?

⁸Ne mì tàsi ètodɔ̃dɔ̃, kè mè àmèwo keŋu kpɔ gomè lèa ɖɛa, eŋuã *àhasìviwo ye mì nyi; mì mu nyi yebe jìjimèviwo ò.

⁹Bɔ̀ ɖo ekèa ŋutia, mi ɖo ètɔwo lè ànyigbã ji kèwo kplana mi, eye mi bùnà wo. Mu jè be mia bɔ̀bɔ̀ mia ɖokoewo ɖo gbɔ̃gbɔ̃wo be Ètɔ gɔ̃mè wu, ne mia nɔ̀ àgbèa?

¹⁰Đo woawo yaa, wo kplana mi na hùenu vi ɖe, zɔ̃ ɖo woabe èjro ji. Vɔ̀a, e yaa, kplana mi na miabe ènyuɛ̃, ne mia teŋu ɖè yebe kɔ̀kɔ̀ɛnyinyi fiɔ.

¹¹Wàlɛbɛ kè wo le xɔ̀ kpakpla, eye ètodɔ̃dɔ̃ bɔ̀ ɖo e ŋutia, mu nyina jìjɔɛ be ènu ò; veve sèse bòhũ ye be nyina. E yomè a e hɛ̃nà fàfa ku jɔ̀jɔɛwɔ̀wɔ be èkusɛ̃sɛ̃, kèwo nyi àgbè àdodoe nɔ̀nɔa va na àmè kèwo wo kpla ku àlɔ̀ lè e mèa.

¹²Ye ŋutia mì do ŋusɛ̃ mìabe àlɔ̀ kèwo jè ègũa kudo èklò kèwo gbɔjɔa.

¹³Eye mì ɖè èmɔ jɔ̀jɔɛwo na mìabe àfɔ̀wo, ne àfɔ̀ kèwo le tɔ̃boawo mu gbà ɖɔ̀lì ò, vɔ̀a woa jètè.

¹⁴Mì ji ŋuti fàfa na àmè sia àmè, eye mì ɖo mìa ɖokoewo kɔ̀kɔ̀ɛ. Tovò lè ekèa ŋutia, àmè ɖe mu la kpɔ Tɔhonɔ̀ ò.

¹⁵Mì kpɔ nyuɛ̃ ɖe ne àmè ɖe mu gbà yì ŋùgbe lè Mawu be màjea gbɔ ò. Veve be èkè ɖekpe mu gbà miɔ̃, ne bèa ɖè èfũ na mì, la pòɖi àmè sùgbɔ ò.

¹⁶Lè mìa dòmèa, àmè ɖe mu gbà nyi àmè màkɔ̀ màkɔ, àlo àmè màvɔ̃ ènu ɖe sìgbè Esau nène ò. E sà yebe àmègãxo nyinyi na ènu ɖùɖu ɖèka kpò.

¹⁷Mì nya be ekèa yomè a, e jro be *sìtu be èmɔnua bèa gbà nyi yè tɔ̀, vɔ̀a wo gbe è na ɛ̀, gãke e ji ì veve ɖe kudo àɖàsì.

¹⁸E kè mì gogo Mawu a, mu nyi Sinaì To kè wo teŋu tɔ àsia gbɔ ye mì va ò, èzò kè le bì vlàvlà kudo lilia, vìvìti, àlo àya sɛ̃sɛ̃ ò.

¹⁹Mì mu sè èkpɛ̃ be ɖìɖi, àlo ègbè kè pò nupoa ò. Eye Izràɛlvi kèwo sèawo gbe be wo mu gbà pò nupo na yèwo ke ò.

²⁰Đo wo mu teŋu kpe *èse kèa ji be: “Àmè kɛ ye la tɔ àsi èto kèa ŋuti ò? Ne èlã ŋutɔ cã gba ɖo ètoa ŋutia, wo la pò èkpe è wù.”

²¹Eye ènu ɖè fiɔ kèa, ɖo vɔ̃vɔ̃, àleke be, Mosè gblɔ̃ be: “Mù le vɔ̃, eye mù le hũhũ.”

²²Gãkea, mìawo yaa, mì dɔ̃ gogo Ziɔ̀n be èto ku Mawu àgbè-àgbè a be èdù, Yèruzàlɛm kè lè jiŋùkusia. Mì dɔ̃ gogo Mawu be àtikplɔtɔ kèwo wo mu teŋu hlɛ̃ ò, ekèwo bɔ̀, le ɖù àzãawo.

²³Sɔ kpe èa, mì dɔ̃ gogo ŋùkɔ̀gbevi kèwo be nyikɔwo wo ŋlɔ̀ ɖo jiŋùkusiawo be èhabɔ̀bɔ, mì dɔ̃ gogo Mawu kè nyi àmèwo kpata be kòjoɖotɔa, eye mi dɔ̃ gogo àmè jɔ̀jɔɛ kèwo ɖù bliboawo be gbɔ̃gbɔ̃wo.

²⁴Mì dɔ̃ gogo Yesù, àmè kè nyi *zòɖùɖu yeyea be àmè dòmèɖotɔ kudo èhũ hɛ̃hlɛ̃ kè le pò nupo wu Abɛ̀l tɔ̀a.

²⁵Mì kpɔ nyuɛ̃ ɖe, ne mì mu gbà gbe àmè kè le pò nupo na mìa be ègbè ò. Đo ne àmè ŋuawo mu teŋu si lè àmè kè le pò nupo, na wo lè ànyigbã jia nu òa, àleke miawo ya mi la wɔ̀, la si, ne mi gbe àmè kè le pò nupo na mi so jiŋùkusia be ègbè ò?

²⁶Wàlɛbɛ ŋuaa, yebe ègbè hũhũ ànyigbãa, vɔ̀ fifìa, e gbà fìã be: “Mù la gbà na, mu nyi ànyigbãa ɖèɖe kpò ye la gbà hũhũ memlɛ̃nua ò, vɔ̀a, jiŋùkusi cã.”

²⁷Ènyà kèawo: “Mɛmlɛ̃nu” le fiɔ be wo la ɖè ènu kèwo keŋu lè na xixea be gbegbleawo jo, eye ènu kèwo lètè lè gbɔ̃gbɔ̃ mèawo la nɔ̀ ànyi.

²⁸Eŋuã, mì na mia do àkpe, ɖo mi xɔ̀ èfìɔdu kè mu teŋu hũa òa, eye mia sɛ̃ Mawu lekè be jè a, ku bùbu kudo vɔ̃vɔ̃.

²⁹Đo, miabe Mawu nyi èzò kè fiɔ̃na ènu keŋu-keŋuã.