Read gen Hebrùwo 13 Bible Online

Hebrùwo 13 - gen bible

Hebrùwo 13

¹Mì na, nɔ̀vi lɔ̃lɔ̃ ne nɔ̀ yì e ji lè mìa dòmè, wè sia wè.

²Mì mu gbà dokpò àmèjro xɔ̀xɔ ò, ɖo lè ekèa wɔ̀wɔ mèa, àmè ɖewo xɔ̀ Mawu be àtikplɔtɔwo, vɔ̀a, woa ŋutɔ wo mu nya ò.

³Mì ɖoŋù àmè kèwo lè ègàkpa mèa, sìgbè mì lè ègàkpa mè kudo wo nène. Mì ɖoŋù àmè kèwo wo le do àyà na a, sìgbè mìawo ye wo le do àyà na nène.

⁴Mì do bùbu èsrɔ̃ ɖèɖe ŋuti lè mìa dòmè. Èsrɔ̃ ɖètɔwo ne do bùbu woabe èsrɔ̃ ɖèba ŋuti, ɖo Mawu la ɖo kòjo na *àhasìwɔ̀tɔwo ku gbòlòmewo.

⁵Mì mu gbà na ègà be lɔ̃lɔ̃ ne xɔ̀ mìabe àgbè nɔ̀nɔ ò; ènu kè lè mìa sia ne jè ŋùmè na mì, ɖoa, e gblɔ̃ be: “Nyè mu la ɖè àsi lè ŋuti wò ò, nyè mu la gble wò ɖɛ ò.”

⁶Ye ŋuti mi teŋu gblɔ̃ ku èjìdodo be: “Tɔhonɔ̀ nyi àpe àlɔ̀dotɔ, nyè mu la vɔ̃ ò; nukɛ àgbètɔ la teŋu wɔ̀ na mù ò?”

⁷Mì ɖo ŋùku mìabe ŋùkɔ̀nɔ̀tɔwo ji, àmè kèwo gblɔ̃ Mawu be ènyà na mìa. Mì kpɔ woabe àgbènɔ̀nɔ be ènuwuwu, ne mìa kplɔ̀ woabe xɔ̀sè do.

⁸Yesù Kristò, ɖèka ŋua kpò be nyi, èsɔ̀ kè va yìa, egbè, kaka sɔ yì.

⁹Mì mu gbà na ènukpakpla hamèhamè buwo ne bu mì ò. E nyɔ be Mawu be màje ne do mi ŋusɛ̃ wu ɖoɖo so ènu ɖùɖu ŋuti. Đo àmè kèwo nyìnà èkɔ̀ kèawoa mu kpɔna àlè ɖekpe lè woa mè ò.

¹⁰Mi ɖo vɔsakpe kè ji, Yudàviwo be mawunɔ kèwo sumɔna lè gòxɔa mèawo, mu kpɔ èmɔ la ɖù ènu kè wo sɔ savɔ lè e ji ò.

¹¹Đo èlã kèwo wo sɔ savɔ, kèwo be èhũ ye * mawunɔ gãa sɔ yìnà Tèpe Kɔ̀kɔ̀ɛa, wo tɔnazò wo, lè àsàɖaa godo, sìgbè vɔsa ɖo èvuɛ̃ ta nène.

¹²Nène a ye Yesù cã ɖù àyà lè àgboa godo, ne bèa kɔ̀ dùkɔ̃a ŋuti kudo ye ŋutɔ be èhũ.

¹³Mì na mia to yì dogò è lè àsàɖaa godo, ne mia sɔ miabe ŋùkpɛ̃ sìgbè ye ŋutɔ ke nène.

¹⁴Đo, lè ànyigbã ji, fikèa, èdù didɔ̃ ɖe mu lè na mi ò, vɔ̀a, mi le ji èdù kè la ɖɛ vaa.

¹⁵Eŋuã ŋutia, mì na mia to Yesù ji, nɔ wɔ̀ kàfù kafu vɔsa na Mawu tɛ̀gbɛ̀. Kàfù kafu kèwo le ɖè è fìɔ be e ye nyi Tɔhonɔ̀a.

¹⁶Mì mu gbà ŋlɔ̀be ènyuɛ̃ wɔ̀wɔ kudo ènu nana ò, ɖo vɔsa kèawo jènà Mawu be ŋùmè.

¹⁷Mì sè ètonu na mìabe ŋùkɔ̀nɔ̀tɔwo eye mì bɔ̀bɔ̀ èta na wo, ɖo woawo ye le kpɔ mìabe èklawo ji, ne woa va na àkɔ̃ŋùta so e ŋuti, ne woa wɔ̀ ɛ̀ kudo jìjɔɛ, mu nyi lè veve sèse mè ò, ɖo ekèa mu la ɖè àlè na mì ò.

¹⁸Mì nɔ fãkue, ɖo mia ta. Đo mi kã ɖo e ji be miabe *jìjigbè kɔ̀, ekè mi le jro be miabe àgbè nɔ̀nɔ lè ènu sia ènu mè ne nyɔa.

¹⁹Vɔ̀ mù le biɔ so mìa gbɔ be mìa wɔ̀ ɛ̀ wu, ne woa ɖè àsi lè ŋuti nyè na mì sɔ̀sɔɛ ɖe.

²⁰Fàfa be Mawu kè kplɔ̀ mia Tɔhonɔ̀ Yesù kè nyi àlɛ̃wo be kplɔ̀tɔ gã so àmè kukuwo dòmè lè *zòɖùɖu màvɔ be èhũ mèa,

²¹ne jrà mì ɖo blibo lè èdɔ nyuɛ̃ wɔ̀wɔ mè, ne mìa wɔ̀ ɖo yebe èjro ji eye bèa wɔ̀ ènu kè jè ŋùmè na ɛ̀a lè mìa dòmè to Yesù Kristò ji kaka sɔ yì. * Àmèn.

²²Mù le biɔ mì, nɔ̀viwo, be mìa xɔ̀ àpe ètopòɖo-nya kèawo. Ènyà kpòe ɖe kpò mù le ŋlɔ̀ ɖoɖa mì.

²³Mù le na mìa nya be wo ɖè àsi lè mia nɔ̀vi Timòteo ŋuti, ne e nyi be e va kabaa, nyè kudo è, mi la va kpɔ mì.

²⁴Mì do ègbè na mìabe ŋùkɔ̀nɔ̀tɔwo kudo àɖèsãwo keŋu na mù. Àmè kèwo kpata so Italìaawo do ègbè ɖoɖa mì.

²⁵Màje ne nɔ̀ kudo mìa kpata!