Read gen Hebrùwo 2 Bible Online

Hebrùwo 2 - gen bible

Hebrùwo 2

¹Ye ŋutia, mi ɖo la le ènu kèwo mi le sèawo, ɖo àsi veve ɖe, ne mi mu gbà trã èmɔ yì cɔ̃crɔ̃ mè ò.

²Àŋɛ̃ kè Mawu be àtikplɔtɔwo hɛ̃ vaa, ɖè yebe àsìxɔ̀xɔ fiɔ, eye àmè ɖekpekpe kè mu kãmana na ɛ̀ ò, àlo mu ɖona èto è òa, xɔ̀nà ètodɔ̃ kè jè a.

³Àlekè mi la wɔ̀, la si lè ètodɔ̃ ŋua nu, ne mi gbe àmè hlùɛ̃gã gãa kèa ò? Tɔhonɔ̀ ŋutɔ ye hɛ̃ gãgãa va cucugbã, eye àmè kèwo jè ŋùkɔ̀, xɔ̀ ɛ̀awo kã ɖo yebe àsìxɔ̀xɔ ji na mi.

⁴Gà ŋua mè kea, Mawu ɖo èkpe woabe ɖasea ji, to jèsìdowo, ŋusɛ̃dɔwo kudo ŋùdãdɔwo mè. E gbà na Gbɔ̃gbɔ̃ Kɔ̀kɔ̀ɛ be ènunamèwo, sɔ zɔ̃ ɖo yebe èjro ji.

⁵Xixe kè gbãnàa be ènyà ye mi lè gblɔ̃. Mu nyi àtikplɔtɔwo be ŋusɛ̃ gɔ̃mè ye Mawu sɔ xixe kèa ɖo ò.

⁶Đo lè ènu ŋɔ̀ŋlɔ̃ a be àkpa ɖe a, àmè ɖe gblɔ̃ be: “Nukɛ àgbètɔ nyi, ne wòa ɖo ŋùkuvi e ji? Àlo àgbètɔ be èvi, ne wòa kãma na ɛ̀ ò?

⁷Wò wɔ̀ ɛ̀ be hùe vi ɖe wu Mawu be àtikplɔtɔwo, wò sɔ gogo cɔ̃ èta na ɛ̀, eye wò do bùbu e ŋuti,

⁸wò sɔ ènuwo keŋu ɖo yebe àfɔ̀wo gɔ̃mè.” Lè ènuwo keŋu sɔsɔ ɖo yebe gɔ̃mè mèa, mu gble ènu ɖekpe ɖɛ, kè mu sɔ ɖo e gɔ̃mè ò. Co gãke, mi mu kpɔ kpɔ be wo sɔ ènuwo keŋu ɖo e gɔ̃mè hàɖe ò.

⁹Vɔ̀ mi kpɔ ekèa be, wo sɔ Yesù do àtikplɔtɔwo be gɔ̃mè vi ɖe, ne, to Mawu be màje jia, bèa ku na àgbètɔwo kpata. Mi kpɔ fifì be wo cɔ̃ jègbà kè nyi bùbu kudo gogoa na ɛ̀, ɖo èfũ kè be kpe, sɔ kua ŋuti.

¹⁰E jè be Mawu, kè ɖo ènuwo keŋu, eye be le wo ɖotèa, bèa na Kristò ne ɖù blibo lè àyàɖùɖu mè, ne bèa kplɔ̀ èvi sùgbɔ yì yebe gogoa mè, ɖo Yesù ye nyi àmè kè le kplɔ̀ wo yì hlùɛ̃gã mè.

¹¹Đo a, àmè kè le kɔ̀ àmè ŋuti, kudo àmè kèwo ŋuti wo kɔ̀a, wo ɖo Ètɔ ɖèka. Ekèa ŋuti èŋù mu kpɛ̃ Yesù be ne yɔ wo be nɔ̀viwo ò.

¹²Eye e gblɔ̃ be: “Oò! Mawu, mù la pò nupo so ŋuti wò na nɔ̀vi nyèwo. Mù la kafu wò lè èhabɔ̀bɔa dòmè.”

¹³E gbà gblɔ̃ be: “Mù la dojì ɖo Mawu ŋuti.” E gbà yì eji be: “Ènyè kudo ɖèvi kèwo Mawu na mùawo ye nyi ekè.”

¹⁴Kè e nyi be ɖèvi kèawo nyi àgbètɔwo, eye wo ɖo ŋutilã kudo èhũa, Yesù cã trɔ zũ àgbètɔ, ɖo ŋutilã kudo èhũ, sìgbè woawo ke nène. Nène a ye, to yebe èku mèa, e crɔ̃ Àbòsam, kè si èku be ŋusɛ̃ lèa.

¹⁵Eye lè ekèa mèa, bèa hlùɛ̃ àmè kèwo, ɖo vɔ̃vɔ̃ na èku ŋutia, nyi kluviwo, woabe àgbèzãwo keŋuã.

¹⁶Đo, lè nyàwo toto mèa, mu nyi Mawu be àtikplɔtɔwo be va la hlùɛ̃ gã ò, vɔ̀a Abràham be jìjimèviwo.

¹⁷Ye ŋutia e la nɔ̀ sìgbè nɔ̀viawo nène, lè ènuwo keŋu mè, ne bèa nyi *mawunɔ gã, ŋuzĩzĩkutɔ ku ànùkuame, lè Mawu be ènuwo mè, ne bèa nyi àfla na dùkɔ̃a be ènuvuɛ̃wo.

¹⁸Đo ekè wo do ye ŋutɔ kpɔ, eye be ɖù àyàa, e teŋu do àlɔ̀ àmè kèwo wo le dokpɔawo.