Read gen Hebrùwo 3 Bible Online

Hebrùwo 3 - gen bible

Hebrùwo 3

¹Ye ŋutia, nɔ̀vi nyè àɖèsãmewo, mì, àmè kèwo Mawu yɔawo, mì kpɔ Yesù kè Mawu dɔ̃ ɖoɖa be ne nyi *mawunɔ gã na xɔ̀sè kè mè mi le hũa.

²E wɔ̀ ànùkua na Mawu, kè ɖo èdɔ kèa na ɛ̀a, sìgbè Mosè kè wɔ̀ ànùkua lè Mawu be àxuedo mèa nène.

³Àmè kè tù àxuea ɖo bùbu wu àxue kè be tùa, nènea ke ye bùbu jè na Yesù wu Mosè.

⁴Àxue sia àxue ɖo yebe tùtɔ. Àmè kè tù xixea, eye be wɔ̀ ènuwo keŋuã ye nyi Mawu.

⁵Sìgbè sumɔ̃vi nènea, Mosè wɔ̀ ànùkua lè Mawu be àxuedoa keŋu mè, sɔ ɖù ɖase so ènu kè Mawu la va gblɔ̃a ŋuti.

⁶Vɔ̀ Kristò yaa, sìgbè Èvi nènea, wɔ̀ ànùkua lè Mawu be àxuedoa nu. Ne mi le kãkã ɖo e ji kudo ŋùɖo kèwo mi sɔ le yigòawo ɖo àsi, kaka yì vɔ̀vɔnua, mi la nyi yebe àxuedoa.

⁷Ye ŋutia, sìgbè àlekè Gbɔ̃gbɔ̃ Kɔ̀kɔ̀ɛ gblɔ̃ nènea be: “Ne mì sè yebe ègbè egbèa,

⁸mì mu gbà trì èjì, sìgbè àlekè mìa tɔgbewo wɔ̀ ɛ̀, wàlɛbɛ kè wo sitè ɖo Mawu ŋuti, ekè wo do wo kpɔ, lè zògbèa ji nène ò.

⁹Ekè mìa tɔgbewo tè mù kpɔa, wo kpɔ èdɔ kèwo mù wɔ̀ èpè èkà sɔ̃ŋua.

¹⁰Ye ŋuti mù do àdɔ̀mèze ɖo àmè kèawo ŋuti, eye mù gblɔ̃ be: 'Woabe susuwo trãnà, wè sia wè, eye wo mu nya àpe èmɔwo ò.'

¹¹Eye mù kã àtãŋu, lè àpe àdɔ̀mèze mè be: 'Wo mu la ɖota àpe jɛ̃gbɔ̃pe gbèɖe ò.'”

¹²Nɔ̀viwo, mì kpɔ nyuɛ̃ ɖe, be, lè mìa dòmèa, àmè ɖe mu gbà ɖo èjì vuɛ̃ kè màxɔ̀sè trɔna lè Mawu àgbè-àgbè a yomè ò.

¹³Bòhũa, mì do ŋusɛ̃ mìa nɔ̀nɔwo gbè sia gbè, ne “Egbè” kè be ènyà, Ŋɔ̀ŋlɔ̃ a gblɔ̃a, ne kã mia cã, ne èvuɛ̃ be àmèfùflu mu gbà blè mìa dòmètɔ ɖe ò.

¹⁴Mi nyi Kristò be yomè jètɔwo, ne mi le èjìdodo kè mi ɖo ɖo e ŋuti, so gɔ̃mèjèje a, ɖo àsia.

¹⁵Ekèa ye nyi ènu kè Ŋɔ̀ŋlɔ̃ a le gblɔ̃ be: “Ne mì sè Mawu be ègbè egbèa, Mì mu gbà trì èjì ò, sìgbè àlekè wo wɔ̀ lè àglajèje mèa nène ò.”

¹⁶Àmè kɛwo ye sè Mawu be ègbè, eye wo jè àgla ɖo e ŋuti ò? Àmè kèwo keŋu Mosè kplɔ̀ to lè Ejiptè a ye.

¹⁷Àmè kɛwo ŋuti ye Mawu do àdɔ̀mèze ɖo, èpè èkà sɔ̃ŋu ò? Àmè kèwo ye wɔ̀ èvuɛ̃, wo jè ànyi eye wo ku, lè zògbèa jiawo ye.

¹⁸Wàlɛbɛ kè ye Mawu tà ènu be: “Wo mu la ɖota yèbe jɛ̃gbɔ̃gbɔ̃a mè ò a!” Àmè kɛwo ye be le gblɔ̃ ò? Mu nyi àmè kèwo jè àglaawo ye à?

¹⁹Mi kpɔ be wo mu ɖota jɛ̃gbɔ̃gbɔ̃ ŋua mè ò, ɖo wo mu xɔ̀sè ò.