Read gen Hebrùwo 4 Bible Online

Hebrùwo 4 - gen bible

Hebrùwo 4

¹Ye ŋutia, ekè èmɔnu gbà lè ne woa ɖo yebe jɛ̃gbɔ̃gbɔ̃ mèa, mì na mia kpɔ nyuɛ̃ ɖe, ne, lè mìa dòmèa, àmè ɖe mu gbà dokpò jɛ̃gbɔ̃gbɔ̃a mè ɖoɖo ò.

²Đo a, mi sè Àŋɛ̀nyuɛ̃ a sìgbè àmè kèwo nɔ̀ zògbèa jiawo nène. Wo sè àŋɛ̀a, vɔ̀a, mu wɔ̀ ènu ɖekpe na wo ò, ɖo wàlɛbɛ kè wo sè a, wo mu xɔ̀ ɛ̀ sè ò.

³Mi àmè kèwo xɔ̀sèawo, mi ɖo jɛ̃gbɔ̃gbɔ̃a mè, ènu kè ŋuti Mawu gblɔ̃ be: “Lè àpe àdɔ̀mèze mèa, mù kã àtãŋu be: 'Wo mu la ɖota àpe jɛ̃gbɔ̃pe gbèɖe ò.'” E gblɔ̃ ènyà kèawo, vɔ̀a, e wu yebe èdɔ nu so kaka wàlɛbɛ kè be ɖo xixea ke.

⁴Wo gblɔ̃ lè àfi ɖe lè Ŋɔ̀ŋlɔ̃awo mè, so ŋùkèkè adrɛ̃gɔ̃ a ŋuti be: “Eye Mawu gbɔ̃jɛ̃ ŋùkèkè adrɛ̃gɔ̃ a gbè lè yebe èdɔwɔ̀wɔa nu.”

⁵E gbà gblɔ̃ le àfi ɖe ke be: “Wo mu la ɖota àpe jɛ̃gbɔ̃gbɔ̃a mè ò.”

⁶Àmè kèwo ye sè Àŋɛ̀nyuɛ̃ a cucugbãawo mu ɖo jɛ̃gbɔ̃gbɔ̃a mè ò, ɖo wo mu xɔ̀sè ò. Vɔ̀a èmɔnu gbà lè ne àmè ɖewo be woa ɖo e mè.

⁷Ye ŋuti Mawu gbà ɖo ŋùkèkè yeye bu, kè le nyi “Egbè” E pò nupo so e ŋuti, e yomè, to David ji lè hɛ̃hlɛ̃ kè wo yɔ sãa mè be: “Ne mì sè Mawu be ègbè egbèa, mì mu gbà trì èjì ò.”

⁸Ne Yosùa na wo jɛ̃gbɔ̃gbɔ̃ kè Mawu fìãa, mu la gbà gbìgbɔ̀ pò nupo, e yomè so ŋùkèkè bu ŋuti ò.

⁹Nène a, jɛ̃gbɔ̃gbɔ̃ kè ɖì Mawu be jɛ̃gbɔ̃gbɔ̃ ŋùkèkè adrɛ̃gɔ̃ a tɔ̀a, lè na Mawu be dùkɔ̃a.

¹⁰Àmè kè ɖo jɛ̃gbɔ̃gbɔ̃ kè Mawu jràɖo a mèa, la gbɔ̃jɛ̃ sìgbè àlekè Mawu gbɔ̃jɛ̃ lè yebe èdɔ yomè a nène.

¹¹Ye ŋutia mia jè àgbàgba ne mia ɖo jɛ̃gbɔ̃gbɔ̃a mè, ne èto tìtri kèa hati mu gbà kplɔ̀ àmè ɖe yì ànyijèje mè ke ò.

¹²Mawu be ènyàa lè àgbè nyàwo, e ɖo ŋusɛ̃, e ɖa wu èwui ènu èvè, kaka teŋu mana èkla ku gbɔ̃gbɔ̃a dòmè, capecapewo kudo èpumèmiwo dòmè. E ɖona kòjo na èjìmè be susuwo kudo yebe èjrowo.

¹³Wo mu teŋu wla ènu ɖe do Mawu ò. Lè ènu ɖoɖowo kpata dòmèa, ènu sia ènu lè àma, lè nùvò lè yebe ŋùkɔ̀. E ye mi la na àkɔ̃ŋùta.

¹⁴Mì na mia le xɔ̀sè kè mè mi le hũa ɖo àsi veve ɖe, ɖo mi ɖo *mawunɔ gã kè ze lè Mawu ŋutɔ be ŋùkɔ̀a, be e ye nyi Yesù, Mawu be èvia.

¹⁵Mi mu ɖo *mawunɔ gã kè mu la teŋu ɖù àyà kudo mi lè miabe gbɔ̀jɔ̀gbɔjɔwo mè ò, bòhũa mi ɖo mawunɔ gã kè wo tèkpɔ lè ènuwo keŋu mè, sìgbè miawo ke nène, vɔ̀a mu wɔ̀ èvuɛ̃ ò.

¹⁶Ye ŋutia mì na mia va Mawu be màje-fìɔzìkpea gbɔ ku kãkã ɖo e ji, àfi kè wo la ku ŋuzĩzĩ na mi, la do mi àlɔ̀ lè, eye mi la xɔ̀ màje lè miabe wudo be gàmè.