Read gen Hebrùwo 5 Bible Online

Hebrùwo 5 - gen bible

Hebrùwo 5

¹*Mawunɔ gã ɖekpekpe kè wo cã lè àgbètɔwo dòmèa, wo ɖo è ɖo àgbètɔwo nu, ne bèa sumɔ Mawu lè woa dòmè. E sɔna ènu nanawo nana, sanavɔ ɖo èvuɛ̃ ta.

²Sìgbè àlekè ye ŋutɔ cã nyi àmè gbɔjɔ nènea, e teŋu kpɔ ɖo e mè na àmè mà-nyãɖewo ku ènu bàɖà wɔ̀tɔwo.

³Ekè a ŋuti a, e teŋu savɔ ɖo ye ŋutɔ be èvuɛ̃wo ku dùkɔ̃ a be èvuɛ̃wo ta.

⁴Àmè ɖe mu sɔna mawunɔ gã be bùbu nana ye ɖokoe lè àmèwo dòmè ò. Wo nyina mawunɔ to Mawu be àmè yɔyɔ ji, sìgbè Arɔ̀n nène.

⁵Nène a ke ye Kristò cã mu sɔ mawunɔ gã be bùbu na ye ɖokoe ò, vɔ̀ a e xɔ̀ ɛ̀ so Mawu kè gblɔ̃ na ɛ̀ be: “Wò nyi Èvi nyè; egbè a mù jì wò.”

⁶E gblɔ̃ lè àfi bu cã be: “Èwò ye nyi mawunɔ gã kaka sɔ yì, zɔ̃ ɖo Mɛlkisedɛk be ɖoɖo ji.”

⁷Lè yebe àgbè nɔ̀nɔ mè lè ànyigbã ji a, Yesù ye wɔ̀ kuefã, blìbɔ̀ ku àpa dodo sɛ̃sɛ̃ ɖe, ku àɖàsì, na Mawu kè teŋu hlùɛ̃ ɛ̀ lè èku si mè. Mawu ɖo èto è, ɖo, e bɔ̀bɔ̀ ye ɖokoe.

⁸Mawu be Èvi be nyi gãke a, e kpla ètonu sèse lè ènu kè kpe a mè.

⁹Ekè wo do bùbu e ŋuti a, e trɔ zũ àmè hlùɛ̃gã be dodoe na àmè kèwo kpata sènà ètonu na ɛ̀awo.

¹⁰Eye Mawu ɖo e mawunɔ gã, zɔ̃ ɖo Mɛlkisedɛk be ɖoɖo ji.

¹¹Đo ekèa ŋutia, mi ɖo ènyà sùgbɔ la gblɔ̃, eye ènyà kèawo gɔ̃mèɖèɖe sɛ̃ŋu, ɖo mì mu teŋu le sè ènu gɔ̃mè kaba ò.

¹²Fifìa, mì ɖo la nyi ènufiɔtɔwo xoxo, vɔ̀a mì gbà jo le hiã bòhũ be, woa fiɔ mì Mawu be àŋɛ̀a be gɔ̃mèjènyawo. Mì hiã ènu ɖùɖu sɛ̃ŋu, vɔ̀a mì kpɔ̀tɔ̀ le nù ànɔsi.

¹³Àmè ɖekpekpe kè kpɔ̀tɔ̀ le nɔ ànɔa, kpɔ̀tɔ̀ nyi vifɛ̃, ɖo mu nya ènu ɖekpe lè jɔ̀jɔɛnyinyi mè ò.

¹⁴Vɔ̀a ènu ɖùɖu sɛ̃ŋu lè na àmè sĩsĩwo, àmè kèwo nya vòvòtoto lè ènyuɛ̃ kudo èvuɛ̃ dòmè, to woabe susu zãzã ku wɔ̀nawo mè.