Read gen Hebrùwo 6 Bible Online

Hebrùwo 6 - gen bible

Hebrùwo 6

¹Nène a, mì na mia do veve ènu, ne mia yì ŋùkɔ̀, lè àmè sĩsĩ be ènukpakpla mè. Mia ɖè àsi lè xɔ̀sèa be kpakpla cucugbãa ŋuti. Mi mu la gbà kɔ àŋɛ̀a be gɔ̃mèjèje be ènyàa yìji ò. Vɔ̀a, e lè veve ɖe be mia trɔ lè èdɔ màɖè àlèwo yomè, ne mia xɔ̀ Mawu ji sè.

²Mi fiɔ mì ènu so mawusilèle ŋuti, àsi ɖo èta ji na àmè, fɔ̃fɔ̃ so èku ku kòjoɖoɖo kè gbãnà ŋuti.

³Ekèa ye mi la wɔ̀ ne Mawu ɖè èmɔa.

⁴E nyi ènuglonu nyàwo, be àmè kèwo xɔ̀ kɔ̀kɔ̀ɛa, wo ɖɔ jiŋùkusi be ènu nana a kpɔ, wo xɔ̀ Gbɔ̃gbɔ̃ Kɔ̀kɔ̀ɛ a,

⁵wo ɖɔ Mawu be àŋɛ̀nyuɛ̃ a kudo xixe kè la ɖɛ vaa kpɔ,

⁶Vɔ̀a, wo gbà gbìgbɔ̀ yì ŋùgbea, wo mu la gbà teŋu na woa ɖɔ̀lì èdɛ̃ ò, ɖoa, wo gbà le ka Mawu be Èvia ɖo àtisòga ŋuti ke, na woa ɖokoewo, eye wo gbà le do è ŋùkpɛ̃ àgbãŋùgbà na woa ɖokoewo.

⁷Đo a, ne ànyigbã ɖe le nù èjisi kè le jà, eji-eji ɖo e ji, eye be le na ènu ɖùɖu àmè kèwo le dè èawoa, Mawu tunasì na ɛ̀.

⁸Vɔ̀, ne àŋùja ku àklãti kpò ye mìɔ̃nà ɖo e jia, e ŋua, mu nyɔ na ènu ɖekpe, wu be woa sɛ̃kpɛ̃ na ɛ̀, eye vɔ̀vɔnua, woa tɔ ɛ̀ èzò ò.

⁹Vɔ̀, àmè ɖèvewo, ne mi pò nupo nènea, mi dojì ɖo mìa ŋuti be mì lè èmɔ nyuɛ̃a ji, hlùɛ̃gã be èmɔa ji.

¹⁰Mawu mu nyi àmè màjɔ̀ màjɔ ò. Mu la ŋlɔ̀be èdɔ kè mì le wɔ̀a ò. Mu la ŋlɔ̀be lɔ̃lɔ̃ kè mì ɖè fiɔ, ɖo yebe nyikɔ ŋuti cã ò. Mì kpe ɖo àɖèsãwo ŋuti, eye mì kpɔ̀tɔ̀ le kpe ɖo woa ŋuti kaka va na fifì.

¹¹Vɔ̀ Miabe èjro ye nyi be àmè sia àmè ne nɔ do veve ènu lè mìa dòmè nènea, àleke be ŋùɖo kè nyi mìa tɔ̀a, ne nɔ̀ blibo, kaka sɔ yì vɔ̀vɔnu.

¹²Mi mu jro be mìa nyi kuviɔ̃tɔwo ò, bòhũa, ne mìa kpàsà àmè kèwo nyi fìãfìã be ècrɔ̃ɖùtɔwo, to xɔ̀sè ku veve do ènu jiawo, do.

¹³Ekè Mawu fìã àjɔ̀gbè na Abràham a, e tà ye ɖokoe, ɖo àmè ɖe mu gbà lè, kè wu Ye ŋutɔ ò.

¹⁴E gblɔ̃ be: “Ɛ̃ɛ! Dodo, mù la tusì na wò, eye àpo jìjimè la sùgbɔ.”

¹⁵Nène a ye Abràham hɛ̃ àdòdò, eye be xɔ̀ Mawu be fìãfìãa.

¹⁶Àgbètɔwo tànà àmè kè wu woa. Ènu tàta lè woa gbɔa, nyi kãkã ɖo e ji na ènudɔ̃dɔ̃ be èɖa ɖoɖo.

¹⁷Ekè Mawu jro la ɖè è, nyuɛ̃ ɖe, fiɔ àmè kèwo la xɔ̀ fìãfìã be ècrɔ̃nuawo, be yebe ɖoɖo a mu la trɔ òa, ye ŋuti be sɔ ènu tàta bɔ̀ ɖo fìãfìãa ŋuti ɖo.

¹⁸Nène a, ènu èvè màtrɔ kèawo, ekèwo mè Mawu mu teŋu ɖà àjè lè òa, le na èjì jè e mè sɛ̃ŋu, mi, àmè kèwo gble ènuwo keŋu ɖɛ, ne mia le ŋùɖo kè wo sɔ ɖo ŋùkɔ̀ na mia.

¹⁹Ŋùɖo kèa lè na mi sìgbè èkla be seŋuge nène. E ɖo kãkã ɖo e ji, likè, eye be to mawuxɔa be èxɔ̀mèsòvɔa mè, yì kaka gòxɔa be kɔ̀kɔ̀ɛpea.

²⁰Funua ye Yesù yì, e jè ŋùkɔ̀ yì na mi. E nyi *mawunɔ gã kòkòɖàbì na mi, zɔ̃ ɖo Mɛlkisedɛk be ɖoɖo a ji.