Read gen Hebrùwo 7 Bible Online

Hebrùwo 7 - gen bible

Hebrùwo 7

¹Mɛlkisedɛk kèa nyi Salɛ̀m be èfìɔ, ku Mawu, èjihũitɔa be mawunɔ. Ekè Abràham trɔ so àhùagbe kè ji, be ɖù èfìɔwo ji lèa, Mɛlkisedɛk zɔ̃ yì dogò è, eye be tusì na ɛ̀.

²Abràham sɔ ènu kèwo kpata be xlà gbɔ̀awo be tèpe èwogɔ̃a na ɛ̀. Cucugbãa Mɛlkisedɛk be nyikɔa gɔ̃mè ye nyi “Jɔ̀jɔɛwɔ̀wɔ be èfìɔ”; sɔ kpe èa, e nyi Salɛ̀m be èfìɔ, ekè gɔ̃mè ɖèɖè nyi “Ŋuti fàfa be èfìɔ.”

³E ye kè mu ɖo ètɔ, àlo ènɔ̀, àlo hɛ̃nu òa, mu ɖo jìgbèzã kaka la va ɖo èkuzã ò. Vɔ̀ ekè be ɖì Mawu be Èvia, e kpɔ̀tɔ̀ nyi mawunɔ kaka sɔ yì.

⁴Mì kpɔ àlekè àmè kèa be nyiɖìɖi lòlò ɖoa ɖa, àmè kè tɔgbe Abràham sɔ ènu kèwo be hɛ̃ gbɔ̀, so àhùa wɔ̀wɔ mèawo be tèpe èwogɔ̃a na a.

⁵Sɔ zɔ̃ ɖo èsea jia, wo ɖè èmɔ na Levì be jìjimèvi kèwo nyi mawunɔawo be woa xɔ̀ ènunɔ̀amèsiwo be àkpa èwogɔ̃a lè dùkɔ̃a si, dùkɔ̃mèvi kèwo nyi woa nɔ̀viwo, so Abràham be jìji mèa.

⁶Vɔ̀ Mɛlkisedɛk kè mu so Levì be jìjimè òa, xɔ̀ ènuwo be mamã èwogɔ̃a lè Abràham si, eye be tusì na àmè kè xɔ̀ fìãfìã so Mawu gbɔa.

⁷Ne wo mu la do àɖìka òa, àmè kè le tusìa, wu àmè kè wo tusì na a.

⁸Eye lè fikèa, àmè kèwo xɔ̀nà ènuwo be mamã èwogɔ̃awo nyi àmè kèwo kunaawo. Vɔ̀a, lè Mɛlkisedɛk kè xɔ̀ ɛ̀a tɔ̀ gomèa, ŋɔ̀ŋlɔ̃ a le gblɔ̃ na mi be e lè àgbè.

⁹Eye kplògòdòa, wo la gblɔ̃ be, to Abràham jia, Levì kè xɔ̀nà ènu èwogɔ̃a ŋutɔ cã na ènu èwogɔ̃a.

¹⁰Đo a, e kpɔ̀tɔ̀ lè tɔgbea Abràham be àdɔ̀mè wàlɛbɛ kè Mɛlkisedɛk yì dogò èa.

¹¹Levì be mawunɔ nyinyi lè *èse kè wo na Izràɛl be dùkɔ̃a mè. Vɔ̀a ne Levìwo be mawunɔ nyinyi wɔ̀ èdɔ àdodoe a, mu gbà lè veve ɖe be mawunɔ bu ne gbà va so, Mɛlkisedɛk be ɖoɖo nu ò. Mu la kè jɔ̀ lè Arɔ̀n be kɔ̀tà mè bòhũa?

¹²Đo ne wo ɖɔ̀lì mawunɔ nyinyia, e lè be woa ɖɔ̀lì èsea cã.

¹³Mia Tɔhonɔ̀ kè ŋuti wo gblɔ̃ ènyà kèawo soa, jɔ̀ so kɔ̀ta ɖe kè mè àmè ɖe mu wɔ̀ mawunɔ be èdɔ lè vɔsakpe ji kpɔ ò.

¹⁴E mè kɔ̀ be e jɔ̀ so Yudà be kɔ̀ta mè, eye Mosè mu gblɔ̃ ènyà ɖekpe so kɔ̀ta kèa ŋuti lè mawunɔ be èdɔwɔ̀wɔ mè ò.

¹⁵Ènyà kèa mè gbà kɔ̀ wu be mawunɔ bu va kè ɖì Mɛlkisedɛk.

¹⁶Wo mu ɖo è mawunɔ lè àgbètɔwo be ɖoɖo mè ò. Vɔ̀ wo ɖo è lè àgbè be ŋusɛ̃ kè mu ɖo ènuwuwu òa mè.

¹⁷Đo a, ŋɔ̀ŋlɔ̃ a gblɔ̃ be: “Wò nyi mawunɔ tɛ̀gbɛ̀, zɔ̃ ɖo Mɛlkisedɛk be ɖoɖo ji.”

¹⁸Nène a, wo ɖè ɖoɖo xoxoa jo, ɖo mu gbà lè veve ɖe ò,

¹⁹ɖo èsea mu na ènu ɖekpe zɔ̃ sù ò, eye, lè ègo bu mèa, ŋùɖo àdodoe kè vaa, ji mi to, dɔ̃ gogo Mawu.

²⁰Ekè e nyi be ekèa mu va e mè, eye ènu tàta mu bɔ̀ ɖo e ŋuti òa, ɖo ènu tàta mu bɔ̀ ɖo àmè kpɔ̀tɛawo be mawunɔ nyinyia ŋuti ò.

²¹Vɔ̀ wo ɖo Yesù mawunɔ kudo ènu tàta, wàlɛbɛ kè Mawu gblɔ̃ na ɛ̀ be: “Tɔhonɔ̀ kã àtãŋu, eye mu la trɔ ò: 'Wò nyi mawunɔ kaka sɔ yì.'”

²²Ye ŋutia Yesù nyi àmè kè ɖo èkpe *zòɖùɖu kè nyɔ wua ji na mi.

²³Wu ekèa, wo sùgbɔ trɔna zũ mawunɔwo, ɖo èku mu nana wo nɔ̀nà ànyi kaka sɔ yì ò.

²⁴Vɔ̀ Yesù lè àgbè tɛ̀gbɛ̀, eye wo mu la teŋu sɔ yebe èdɔa na àmè bu ò.

²⁵Eŋuã ŋuti ye e sù la hlùɛ̃ àmè kèwo dɔ̃ gogo Mawu to e ji fifìawo gã na hùenuwo keŋu, ɖo e lè àgbè ne bèa nɔ̀ fãkue na Mawu ɖo woa ta tɛ̀gbɛ̀.

²⁶Yesù nyi mawunɔ kè jè na mia. E nyi àɖèsã, àmè kè ŋuti àgɔ̀ ɖe àlo, èvuɛ̃ ɖe mu lè ò. Wo klã ɛ̀ jo lè èvuɛ̃wɔ̀tɔwo ŋuti, eye wo kɔ ɛ̀ yìji wu jiŋùkusiwo.

²⁷Mu lè sìgbè * mawunɔ gã kpɔ̀tɛawo nène, ne bèa nɔ savɔ gbè sia gbè ɖo ye ŋutɔ be èvuɛ̃wo ta cucugbãa, e yomè a, na dùkɔ̃a tɔ̀awo ò. E savɔ zè ɖèka na hùenuwo keŋu, ekè e sɔ ye ɖokoe na a.

²⁸Mosè be èsea ɖona mawunɔ gã, àmè kèwo nyi àmè gbɔjɔwoa. Vɔ̀ Mawu be àtãŋu be ènyà kè jè èsea yomè a, ɖo Èvia, *mawunɔ gã, àmè kèa zɔ̃ sù kaka sɔ yì.