Read gen Hebrùwo 8 Bible Online

Hebrùwo 8 - gen bible

Hebrùwo 8

¹Ènu kè mi le gblɔ̃a be àkpa vevetɔa ye nyi be: *mawunɔ gã kèa lè mia si. E nɔ̀ ànyi ɖo Mawu, Ŋusɛ̃kpatatɔa be èfìɔzìkpea be ɖùsi mè, lè jiŋùkusi.

²E le wɔ̀ * mawunɔ gã be èdɔ lè kɔ̀kɔ̀ɛpe kè nyi gòxɔ kè Tɔhonɔ̀ ŋutɔ tù; mu nyi ekè àgbètɔ tù òa.

³Wo cãna mawunɔ gã ɖe sia ɖe ne bèa nɔ wɔ̀ ènu nana, eye ne bèa nɔ savɔ na Mawu. Ye ŋuti e lè veve ɖe be mawunɔ gãa cã ne nɔ na ènu.

⁴Ne e nyi be Kristò lè ànyigbã jia, mu la nyi mawunɔ ŋutɔ cã ò, ɖo mawunɔwo lè, kèwo le savɔ, zɔ̃ ɖo Yudàviwo be èsea ji vɔ̀.

⁵Vɔ̀, èdɔ kè mawunɔwo wɔ̀nàa nyi ekè wo wɔ̀nà lè jiŋùkusia be kpɔwɔɛ ku yebe ŋùfɛ̃ kpò. Đo ekè Mosè jro be yèa tù gòxɔa, Mawu gblɔ̃ na ɛ̀ be: “Wɔ̀ ènuwo keŋu ɖo nɔ̀nɔmè kè wo sɔ fiɔ wò lè ètoa jia nu.”

⁶Vɔ̀ fifìa, Yesù be mawunɔ gã be èdɔ kè be wɔ̀a, nyɔ wu woa tɔ̀a fuu, ɖo àmè dòmèɖotɔ be *zòɖùɖu kè be wɔ̀ lè Mawu kudo yebe dùkɔ̃a dòmèa, nyɔ wu, ɖo e li ɖo àjɔ̀gbè fìãfìã be ènu àdodoewo ji.

⁷Ne àgɔ̀ ɖe mu nɔ̀ *zòɖùɖu cucugbã tɔ̀a ŋuti òa, mu gbà hiã be woa gbà gblɔ̃ èvègɔ̃ ɖe be ènyà ò.

⁸Vɔ̀ Mawu sò àgɔ̀ na yebe dùkɔ̃a, ekè be gblɔ̃ be: “Ŋùkèkèwo gbãnà ye Tɔhonɔ̀ gblɔ̃, ekèwo mè mù la gbìgbɔ̀ ɖù èzò yeye ku Izràɛl kudo Yudà be dùkɔ̃awo lè.

⁹Zòɖùɖu kèa, mu la nɔ̀ sìgbè ekè mù wɔ̀ kudo woa tɔwo va yìa nène ò, ekè mè mù le àlɔ̀tinu na wo, kplɔ̀ wo to lè Ejiptè be èdùa mè ò; wo dà zòɖùɖu ŋua ji; nyè cã mù trɔ lè woa yomè. Tɔhonɔ̀ ye gblɔ̀ ɛ̀.”

¹⁰Tɔhonɔ̀ be: “Ekèa ye nyi èzò kè mù la ɖù ku Izràɛl be dùkɔ̃a, lè ŋùkèkè ŋuawo yomè. Tɔhonɔ̀ gblɔ̃ be: mù la sɔ *èse nyèwo do woabe susuwo mè, mù la ŋlɔ̀ wo ɖo woabe èjìwo mè, mù la nyi woabe Mawu, eye wo la nyi àpe dùkɔ̃.

¹¹Àmè ɖe mu la nɔ̀ woa dòmè, la gbà fiɔ ènu yebe èhavi àlo nɔ̀via be: 'Jèsi Tɔhonɔ̀' ò. Đo nyàwo a, woa kpata wo la jèsi mù, so ɖèvi ji va sɛ̃ àmègãxo ji.

¹²Mù la sɔ woabe èvuɛ̃wo kè wo, eye nyè mu la gbà ɖo ŋùkuvi woabe èvuɛ̃wo ji ò.”

¹³Ekè be gblɔ̃ be zòɖùɖu yeyea, Mawu na be cucugbã tɔ̀a doxoxo; eye ènu kè doxoxo, eye be sĩa, ɖo la bu.