Read gen Hebrùwo 9 Bible Online

Hebrùwo 9 - gen bible

Hebrùwo 9

¹*Zòɖùɖu cucugbãa ɖo yebe ɖoɖo na sɛ̃sɛ̃ kudo mawuxɔ ànyigbã ji tɔ̀a.

²Wo tù gòxɔ cucugbã tɔ̀ kè wo yɔna be tèpe Kɔ̀kɔ̀ɛ a. Funua ye kãligbɛ̃tia lè, kudo èkplɔ̃ kè ji vɔsa kpɔ̃nɔa nɔ̀nàa.

³Lè xɔ̀mèsòvɔ èvègɔ̃a be ŋùgbedòmèa, gòxɔ ɖe lè funua, kè wo yɔna be Kɔ̀kɔ̀ɛpewo be Kɔ̀kɔ̀ɛpea.

⁴Sìka-vɔsakpe kè ji wo tɔna èzò lifi lèa, lè e mè ku *Zòɖùɖu-Ɖakà kè wo fã sìka do a; àɖakà a mè ye sìka-gbã kè mè manà lèa ku Arɔ̀n be èkpò kè jè eye be pòsea lè, kudo èkpe kèwo ji wo ŋlɔ̀ zòɖùɖu be ènyàwo ɖoawo.

⁵*Zòɖùɖu ɖakàa be ètamè ye gogo be *Kerubì kèwo fiɔna be Mawu lè mia dòmèawo lè. Woabe àwàdawo cɔ̃ tèpe kè wo sanavɔ lè na èvuɛ̃ be kèkèa. Vɔ̀a gàmè mu lè fifì ne mia teŋu pò nupo so ekè a ŋuti ɖèka-ɖèka ò.

⁶Ekè wo ɖo ènuawo dɛnu-dɛnu leke a, mawunɔwo yìnà tèpe cucugbã a ŋùkèkè sia ŋùkèkè, sɔ wɔ̀nà woabe èdɔ.

⁷Vɔ̀ *mawunɔ gã a ɖèka kpò ye yìnà gòxɔ èvègɔ̃ a mè, zè ɖèka lè èpè mè. E ɖo la hɛ̃ èlã be èhũ yì, la na ɖo ye ŋutɔ ku dùkɔ̃ a be èvuɛ̃ kèwo wo wɔ̀ lè mànya mèawo ta.

⁸Gbɔ̃gbɔ̃ Kɔ̀kɔ̀ɛ le ɖè fiɔ lè wɔ̀na kèawo mè be, wo mu kpɔ hũ Kɔ̀kɔ̀ɛpea be èmɔ hàɖe ò, kaka kè gòxɔ cucugbãa lèa.

⁹Ekèa nyi jèsìdo ɖe na hùenu kè mè mi lèa be: ènu nana ku èlãwo be vɔsa na Mawu a, mu teŋu na àmè kèwo le sumɔawo be èjì ne kɔ̀ ò.

¹⁰Ènu kèawo keŋu kù ɖo ènu ɖùɖu, ènu kè wo la nù, kudo èkɔ̀nu vòvòvò kèwo lè àmè ɖokoe lèlèɖìawo ŋuti, eye wo le nyi ɖoɖo kèwo lè, sɔ na wàlɛbɛ kè Mawu la gbìgbɔ̀ wɔ̀ wo yeyea.

¹¹Vɔ̀ Kristò va sìgbè *mawunɔ gã nène, na ènunyuɛ̃ kèwo ye la ɖɛ vaawo. Gòxɔ kè mè be wɔ̀ yebe èdɔ lèa zɔ̃ sù wu ekè lèa, eye wo mu tù ì kudo àlɔ̀ ò, ekè gɔ̃mè ye nyi be, mu so xixe kèa mè ò.

¹²Wàlɛbɛ kè Kristò ɖo gòxɔ kɔ̀kɔ̀ɛa mè zè ɖèka na hùenuwo keŋuã, mu sɔ gbɔgbɔɛ àlo ènyìviwo be èhũ sɔ savɔ ò. Ye ŋutɔ be èhũ be sɔ na, eye e xɔ̀ hlùɛ̃gã màvɔ gbèɖe na àmèwo so Mawu gbɔ.

¹³Àmè màkɔ̀màkɔwoa, gbɔgbɔɛwo ku ènyì-suwo be èhũ gbàkudo ènyìnɔwo be àfi ye wo hlɛ̃na kɔ̀ ɖo woa ŋuti, sɔ lènà wo ɖì.

¹⁴Ne e le nènea, àleke Kristò be èhũ mu la teŋu wɔ̀ wu nènea ò? Kristò kè sɔ ye ɖokoe savɔ to Gbɔ̃gbɔ̃ Kòkòɖàbìa jia, mu la klɔ miabe *jìjigbè, so èdɔ màkɔ̀màkɔwo ŋuti ne mia sumɔ Mawu Àgbè-àgbè a òa?

¹⁵Ye ŋuti Kristò nyi zòɖùɖu yeye be àmè dòmèɖotɔ, àleke be àmè kèwo Mawu yɔawo woa xɔ̀ ènu nyuɛ̃ màvɔ gbèɖe be àjɔ̀gbè kè be fìã na yebe àmèwoa. Ekèa va e mè, ɖo e ku, sɔ ɖè àmèwo be dàda kèwo wo wɔ̀, wàlɛbɛ kè wo nɔ̀ zòɖùɖu xoxoa gɔ̃mèa jo.

¹⁶Àfi kè wo wɔ̀ xoma lè, na ècrɔ̃ɖùɖua, e lè be woa ɖè è fiɔ cucugbãa be àmè kè wɔ̀ ɛ̀a ku.

¹⁷Xoma kè wo ŋlɔ̀ na ècrɔ̃ɖùtɔa mu ɖo àsìxɔ̀xɔ, kaka kè àmè kè ŋlɔ̀ ɛ̀a lè àgbè ò. Yebe èku yomè gbɔ̀xue xoma a ɖo yebe àsìxɔ̀xɔ.

¹⁸Ye ŋuti wo sɔ èhũ ɖo èkpe zòɖùɖu xoxoa ji keŋu gbɔ̀xue be ɖo yebe àsìxɔ̀xɔ.

¹⁹Ekè Mosè ɖè gbèfã ègbèɖèɖe kèwo ye lè èsea mèawo, ɖèka ɖèka na dùkɔ̃a keŋu vɔ̀a, e sɔ ènyìviwo ku gbɔgbɔɛwo be èhũ, èsì kudo àlɛ̃fu jɛ̃, gbàkudo izɔp, sɔ wu ì ɖo *èse be xoma a ku dùkɔ̃a ŋuti.

²⁰E gblɔ̃ be: “Ekèa ye nyi zòɖùɖu be èhũ, zòɖùɖu kè be *èse Mawu do na mìa.”

²¹Nène a kea, e gbà hlɛ̃ èhũ kɔ̀ ɖo gòxɔa kudo sɛ̃sɛ̃a be ènuzãzãwo ŋuti.

²²Zɔ̃ ɖo èsea jia, wo sɔ èhũ kɔ̀nà ènu sia ènu ŋuti, eye wo mu teŋu sɔ èvuɛ̃ kè àmè, ne wo mu kɔ̀ èhũ ɖɛ ò.

²³Ne e nyi be wo wɔ̀ èkɔ̀nu kèawo, sɔ kɔ̀ ènu kèwo lè jiŋùkusiawo ŋutia, eŋuã, lè jiŋùkusinuwo ŋutɔ tɔ̀ gomèa, wo savɔ kèwo nyɔ wu ànyigbã ji tɔ̀woa, eye wo kɔ̀ woa ŋuti.

²⁴Kristò mu ɖo Kɔ̀kɔ̀ɛpe kè wo sɔ àmè be àlɔ̀ tùa mè ò. Kɔ̀kɔ̀ɛpe ŋuaa, kɔ̀kɔ̀ɛpe àdodoe a be nɔ̀nɔmè kpò be nyi. Jiŋùkusi ŋutɔ ye be yì, funua ye be lè Mawu be ŋùkɔ̀ lè, ɖo mia ta.

²⁵Mu nyi ne Kristò bèa sɔ ye ɖokoe nɔ̀ na eji-eji, sìgbè *mawunɔ gã kè yìnà kɔ̀kɔ̀ɛpea, èpè sia èpè kudo èlãwo be èhũ nène ò.

²⁶Đo a, ne e nyi nènea, eŋuã, e lè na ɛ̀ be bèa nɔ ɖù àyà, sùgbɔ, eji-eji, so wàlɛbɛ kè wo ɖo xixea. Vɔ̀ lè nyàwo toto mèa, e va lè hùenuwo be vɔ̀vɔnu, ne bèa gũ èta na èvuɛ̃, ekè be sɔ ye ɖokoe sɔ savɔa.

²⁷Àmè ɖekpekpe ɖo la ku zè ɖèka. E yomè a, Mawu la ɖo kòjo na ɛ̀.

²⁸Nène a ke ye Kristò cã sɔ ye ɖokoe sɔ savɔ, zè ɖèka, ne bèa ɖè àmè sùgbɔ be èvuɛ̃wo jo. E la gbà trɔ va, zè èvègɔ̃a, mu nyi ne bèa gbà ɖè èvuɛ̃ jo ò; vɔ̀ ne bèa hlùɛ̃ àmè kèwo le tɔtè kpɔ ɛ̀awo gã.