Read gen Yakobò 2 Bible Online

Yakobò 2 - gen bible

Yakobò 2

¹Nɔ̀vi nyèwo, sìgbè àmè kèwo xɔ̀ mia Tɔhonɔ̀ Yesù Kristò, gogo be Tɔhonɔ̀a ji sè nènea, mì mu gbà nɔ kpɔ àmè ŋùmè lè mìabe wɔ̀nawo mè ò.

²Eye ne, àmè ɖe do àwù nyuɛ̃, do sìkalɔ̀gavi, va mìabe bɔ̀bɔa, eye àmè bu cã, do àwù xoxo pòɖi ɖe vaa,

³mì kɔ̀nà ŋùmè do àwù nyuɛ̃tɔa, cina ji ɖo e ŋuti, gblɔ̃nà na ɛ̀ be: “Mù ɖè kuku, va nɔ̀ ànyi ɖo fikè.” Vɔ̀a mì gblɔ̃nà na wɔ̀amènɔ̀a ya be: “Nɔ̀tè ɖo funu!” Àlo “Nɔ̀ ànyi ɖo àpe àfɔ̀ nu!”

⁴Ne mì le wɔ̀ lekea, mu nyi vòvòtoto mì le do àmèwo dòmè lè mìa ɖokoewo mè ŋuaa? Lekea, mì trɔ zũ kòjo ɖotɔ kèwo be kòjo likè ɖo susu vuɛ̃wo ji.

⁵Nɔ̀vi nyè ɖèvewo, Mawu cã àmè kèwo nyi wɔ̀amènɔ̀wo lè àgbètɔwo be ŋùmè a, be woa nyi àdɔ̀kùnɔ̀wo lè xɔ̀sè mè, eye woa xɔ̀ èfìɔɖùɖu kè Mawu fìã na àmè kèwo lɔ̃ ɛ̀awo.

⁶Vɔ̀a mìawo yaa, mì le do vlo wɔ̀amènɔ̀! Mu nyi àdɔ̀kùnɔ̀wo ye dona àyà na mì òa? Mu nyi woawo ye dɔ̃nà mì yì kòjoɖopewo òa?

⁷Mu nyi woawo ye zũnà mì ɖo Kristò be nyikɔ nyuɛ̃ kè lè mìa ŋutia ŋuti òa?

⁸Ne mì wɔ̀ ɖo fìɔdu be èsea ji tututu, sìgbè àlekè wo ŋlɔ̀ ɛ̀ ɖo mawunya mè nènea, eŋuã mì wɔ̀ ènu kè sɔ̀gbèa. Ènu kè wo ŋlɔ̀ ɖɛa ye nyi be: “E jè be wòa lɔ̃ èhawòvi sìgbè wò ŋutɔ ɖokoe wò nène.”

⁹Vɔ̀ ne mì kpɔna ŋùmè na àmè lè mìabe wɔ̀nawo mèa, eŋuã mì wɔ̀ èvuɛ̃, eye èsea gblehùɛ do mì be mì nyi *èse ji dàtɔwo.

¹⁰Đo àmè sia àmè kè wɔ̀ ɖo èseawo kpata ji, vɔ̀ be dà ɖèka pɛ jia, e zũ woawo keŋu ji dàtɔ.

¹¹Đo àmè kè do *èse be: “Mù gbà wɔ̀ gbòlò ò a”, e ye ke gbà do èse be: “Mù gbà wù àmè ò.” Ye ŋutia ne wò mu wɔ̀ gbòlò ò, vɔ̀ wò wù àmèa, eŋuã wò trɔ zũ èsejidàtɔ.

¹²Nène a, mì na mìabe ènupòpo kudo mìabe wɔ̀nawo ne ɖè è fiɔ be èse kè na mi vòvoa ye wo la sɔ ɖo kòjo na mi.

¹³Đo lè kòjoɖoɖo mèa, Mawu mu la ku ŋuzĩzĩ na àmè kè mu kuna ŋuzĩzĩ na àmè ò. Gãke Mawu be ŋuzĩzĩ kuku pò èta na yebe kòjoɖoɖo.

¹⁴Nɔ̀vi nyèwo, ne àmè ɖe gblɔ̃ be xɔ̀sè lè yè si, eye yebe wɔ̀na mu ɖènà ɛ̀ fiɔ òa, àlè kɛ ye be ɖè ò? Yebe xɔ̀sèa la teŋu hlùɛ̃ ɛ̀ gãa?

¹⁵Mì na mia sɔ ɛ̀ be àvɔ vũvũ lè nɔ̀vi nyɔ̃nù, àlo nɔ̀vi ŋusù xɔ̀sètɔ ɖewo ŋuti, eye wo mu kpɔna ènu ɖùnà gbè sia gbè ò.

¹⁶Fifìa, mìa dòmètɔ ɖèka gblɔ̃ na wo be: “Mì yì lè ŋuti fàfa mè. Àvìvɔ mu gbà wɔ̀ mì ò. Mì ɖù ènu, mìa ɖɔpò.” Vɔ̀a, àmèa mu ji ènu kèwo hiã woabe ŋutilãa na wo òa, àlè kɛ ye be ɖè ò?

¹⁷Nène a, ne xɔ̀sè kpò lè àmè ɖe si, eye wɔ̀na mu bɔ̀ ɖo e ŋuti òa, yebe xɔ̀sèa ku.

¹⁸Vɔ̀a àmè ɖe la gblɔ̃ be: “Wò ɖo xɔ̀sè, vɔ̀a nyè yaa, mù ɖo èdɔwo. Sɔ xɔ̀sè wò kè ŋuti èdɔwo mu bɔ̀ ɖo òa fiɔ mù, eye nyè cã mù la sɔ xɔ̀sè nyè fiɔ wò, to èdɔ nyèwo ji.”

¹⁹Wò xɔ̀ ɛ̀ sè be Mawu ɖèka kpò ye lè. Wò wɔ̀ ènu nyuɛ̃ ɖe. Gbɔ̃gbɔ̃ vuɛ̃wo ŋutɔ cã xɔ̀ ɛ̀ sè nènea, eye wo hũhũna!

²⁰Èwò yɛ̀yìnɔ̀, wò jro be woa ɖè è fiɔ yè be xɔ̀sè kè ŋuti wɔ̀na mu bɔ̀ ɖo òa, nyi ènu gbaloa?

²¹Àleke wɔ̀ Mawu bù mia tɔgbe Abràham be e lè jɔ̀jɔɛ ɖo ò? Yebe wɔ̀na ŋuti ye! Đo e sɔ èvia Izàk yì vɔsakpea ji be yèa sɔ ɛ̀ savɔ na Mawu.

²²Wò kpɔ be yebe xɔ̀sè kudo yebe èdɔwo ye zɔ̃ ɖo du, eye yebe èdɔwo na yebe xɔ̀sèa cã sù blibo.

²³Nène a ye mawunya kèa va e mè be: “Abràham xɔ̀ Mawu ji sè, ye ŋutia Mawu bù ì be e lè jɔ̀jɔɛ,” eye Mawu yɔ ɛ̀ be yèbe èxlɔ̃.

²⁴Mì kpɔ ɛ̀ fifìa? Wo mu kpɔna àmè be xɔ̀sè ɖèɖe kpò bùnà ɛ̀ be e lè jɔ̀jɔɛ ò; yebe èdɔwo ye bɔ̀nà ɖo e ŋuti.

²⁵Nène a pɛpɛpɛ ye Mawu bù Ràhab, gbòlòwɔ̀tɔa cã yeŋu. Mawu bu ì àmè jɔ̀jɔɛ, ɖo yebe èdɔwo ŋuti. Đo e xɔ̀ Izràɛlviwo be bèkpɔɛwo, e kpe ɖo woa ŋuti, na be wo si to èmɔ bu jo.

²⁶Fifìa, e mè kɔ̀ be àlekè àmètia ɖèɖe nyi ènu kuku, ne gbɔ̃gbɔ̃ mu lè e mè òa, nène ke ye xɔ̀sè cã nyi ènu kuku, ne èdɔ mu bɔ̀ ɖo e ŋuti ò.