Read gen Yakobò 3 Bible Online

Yakobò 3 - gen bible

Yakobò 3

¹Nɔ̀vi nyèwo, mì mu gbà na be, lè mìa dòmèa, àmè sùgbɔ ne sɔ woa ɖokoewo wɔ̀ ènufiɔtɔwo ò. Sìgbè àlekè mì nya ɛ̀ nènea, wo la ɖo kòjo sɛ̃sɛ̃ na mi, àmè kèwo fiɔna ènua, wu àmè buwo.

²Đo mia kpata mi dànà sùgbɔ. Ne àmè ɖe lè, kè mu dànà lè ènupòpo mè òa, e ya sù blibo, eye e ɖo ŋusɛ̃ ɖo àmèti bliboa keŋu ji.

³Ne mi do ènumèga ènu na èsɔwo be woa zɔ̃ ɖo miabe èjro jia, mi teŋu trɔna èsɔ bliboa, yìnà àfi kè mi jro a.

⁴Mì kpɔ ètɔ̀jihũwo cã ɖa. Ne wo lòlò ŋutɔ cã, eye àya sɛ̃sɛ̃ dɔ̃nà wo cã a, èhũɖoti vi tukui ɖe kpò ye èhũɖotɔa sɔ trɔna èhũ bliboa be tùnàtà àfi kè be jro be ne yìa.

⁵Nène a pɛpɛpɛ ye àɖe cã lè. Ekè be nyi ŋutinu vi tukui ɖe kpò cã a, ènugãwo wɔ̀wɔ ŋuti be kãna àdã ɖo. Kpɔɖa! Èzò viɖe kpò ye bìnà àve gã ɖe, eye be bìnà ɛ̀ keŋu.

⁶Àɖe lè sìgbè èzò nène. Xixe kè mè ènu màjɔ̀ màjɔ wɔ̀wɔ xɔ̀ nɔ̀pe ɖoa ye nyi àɖe lè miabe ŋutinuwo dòmè. E pònàɖi àmèti bliboa. E sɔna èzò màvɔ tɔna miabe àgbèzãwo keŋu, eye wo bìnà vlàvlàvlà.

⁷Èlã ɖekpe mu lè, èlã wɔ̀adã, àlo xèvi, èlã kèwo tana lè pòdo jiawo, àlo àpùmèlãwo, ɖekpe mu lè, kè ji àgbètɔ mu teŋu ɖù ò.

⁸Vɔ̀ àgbètɔ ɖekpe mu la teŋu ɖù àɖe ya ji ò. Èvuɛ̃ kè ènu mu tìnà kɔ̀ na òa be nyi, eye àɖi kè wùnà àmèa ɖɔ ɛ̀ tãŋu.

⁹E ye mi sɔ kafuna Tɔhonɔ̀ Àta, eye, e ye ke mi gbà sɔ sɛ̃nakpɛ̃ na àgbètɔ kè Mawu ɖo ɖo ye ŋutɔ be nɔ̀nɔmè nua.

¹⁰Ènu ɖèka ŋua, kè mè *sìtu tona lèa, e ye mè ke ye kpɛ̃sɛ̃ cã tona lè! Nɔ̀vi nyèwo mu jè be ne nyi nènea ò.

¹¹Èsìdo ɖe teŋu ji èsì vivi, la gbà ji èsì veve so èdo ɖèka mèa?

¹²Nɔ̀vi nyèwo vòti la teŋu sɛ̃ àmìti be èkusɛ̃sɛ̃woa? Àlo vɛ̃ti la teŋu sɛ̃ vòti be èkusɛ̃sɛ̃woa? Nène a ke ye èsìdo kè jina èjè be èsìa, mu la teŋu gbà ji èsì vivi cã ò.

¹³Àmè kɛ ye nyi ènunyatɔ kudo ènugɔ̃mèsètɔ lè mìa dòmè ò? Ne sɔ àgbè nɔ̀nɔ nyuɛ̃ ɖè ekèa fiɔ, to yebe èdɔwo ji, eye ne wɔ̀ ɛ̀ kudo ɖokoe bɔ̀bɔ̀ kè so ènunya mèa.

¹⁴Vɔ̀ ne ŋuhuã jiŋɔ ku ŋùbia gbɔ̃gbɔ̃ ɖo mìabe èjì mèa, mì mu gbà nɔ go be yèwo nyi ènunyatɔwo, la nɔ ɖà àjè ɖo nyàwo a si ò.

¹⁵Ènunya kèa mu so Mawu gbɔ ò, ànyigbã ji tɔ̀ ye, àgbètɔ tɔ̀ ye, Àbòsam ŋutɔ cã tɔ̀ ye be nyi.

¹⁶Đo àfi kè ŋuhuã ku àjrè lèa, ènu mànyɔ-mànyɔ ku èdɔ vuɛ̃ siasìawo ye nɔ̀nà funua.

¹⁷Vɔ̀a ènunya kè so Mawu gbɔa ya kɔ̀, e jìnà fàfa, e dona jì, e sènà ènu gɔ̃mè na àmè, e ɖɔ fuu ku ŋuzĩzĩkuku, ènunyuɛ̃wo tona so e mè, mu dona vòvòtoto àmè mè ò, eye blamùtùmù ɖekpe cã mu lè e mè ò.

¹⁸Àmè kèwo hɛ̃nà fàfa vana àmè dòmèawo dona ènu lè fàfa mè, eye wo yànà àgbè jɔ̀jɔɛ.