Read gen 1Petrò 1 Bible Online

1Petrò 1 - gen bible

1Petrò 1

¹Xoma kèa so ènyè Petrò, Yesù Kristò be àmèdɔ̃dɔ̃ gbɔ. Mù le ŋlɔ̀ ɛ̀ ɖoɖa mì, Mawu be àmè cãcã kèwo nyi àmèjrowo, kãkã ɖo Pɔ̃tìo, Galatìa, Kapadokìa, Azìa ku Bitinìa be àgowo jia.

²Wo cã mì sìgbè àlekè Mawu Àtaa ŋutɔ ɖo è ɖɛa nène, eye Gbɔ̃gbɔ̃ Kɔ̀kɔ̀ɛ a kɔ̀ mìa ŋuti. Mì zũ àɖèsã ne mìa va sè ètonu na Yesù Kristò, ne bèa sɔ yebe èhũa klɔ mìa ŋuti. Màje ku fàfa ne sùgbɔ na mì kpe è.

³Mi kafu Mawu, mia Àpetɔ Yesù Kristò be Ètɔ! E gbìgbɔ̀ jì mi, to yebe ŋuzĩzĩkuku gãa mè, ɖoa, to Yesù Kristò be fɔ̃fɔ̃ so èku mèa, e na mi ŋùɖo àgbè-àgbè,

⁴na ècrɔ̃nu mà-gble mà-gble, mà-ɖoɖi, màklo, kè wo jrà ɖo ɖɛ lè jiŋùkusiwo na mìa.

⁵Mìawo kè ji Mawu be ŋusɛ̃ le kpɔ, to xɔ̀sè mè, kaka na gà kè mè hlùɛ̃gã kè wo la ɖè fiɔ lè àzã mlɛ̃a gbèa la vaa.

⁶Mì le kpɔ jìjɔɛ ɖo ènyà kèa ŋuti, togbɔ be, na hùenu vi ɖe a, mì la sè veve lè tètèkpɔ vòvòvòwo mè,

⁷Àleke wo dona sìka kè gblenaa kpɔ lè èzò mèa, nènea ke ye wo la do mìabe xɔ̀sè kè xɔ̀ àsì wu sìka ŋutɔ cã a, kpɔ lè èzò mè, la sɔ kpɔ be e la nɔ̀ ànyi kaka sɔ yì màa. Àleke be woa teŋu kafu mì, woa na mì gogo kudo bùbu, lè Yesù Kristò be ɖèɖèfiɔ zã a gbè.

⁸Àmè kè mì mu kpɔ ò, vɔ̀ mì lɔ̃a, ekè mì mu le kpɔ fifì cã ò, gãke mì xɔ̀ e ji sè, eye mìabe jìjɔɛ kpɔkpɔ wu gbɔ̃gblɔ̃.

⁹Jìjɔɛ kèa mì ɖo e, ɖo, wo hlùɛ̃ mì gã. Ekèa ye nyi xɔ̀sè kè mì ɖo na Kristò be àjɔ̀.

¹⁰Mawu be gblɔ̃ɖɛtɔwo kù ènu gɔ̃mè, eye wo biɔ ènyà sè kito-kito so hlùɛ̃gã kèa ŋuti. Wo gblɔ̃ ènyà ɖɛ so màje kè Mawu ɖo ɖɛ na mìa ŋuti.

¹¹Wo jè àgbàgba, ji gɔ̃mè na wàlɛbɛ kudo hùenu kè sɔ̀ kudo ènu kèwo Kristò be Gbɔ̃gbɔ̃ kè lè woa mèa ɖè fiɔa, ekèwo ɖù ɖase so Kristò be àyàɖùɖu kudo gogo kè la jè e yomè a ŋuti.

¹²Mawu ɖè è fiɔ yebe gblɔ̃ɖɛtɔwo be àŋɛ̀do kè wo xɔ̀a mu nyi woawo ŋutɔ tɔ̀ ye be nyi ò, vɔ̀ bòhũa mìa tɔ̀ ye. Àŋɛ̀ kè wo le do na mì fifìa ye nyi àŋɛ̀ nyuɛ̃ kè wo do na mì to Gbɔ̃gbɔ̃ Kɔ̀kɔ̀ɛ, kè wo ɖo ɖoɖa so jiŋùkusia be ŋusɛ̃ ji. Mawu be àtikplɔtɔwo ŋutɔ cã jro xoxo be yèwoa nya ènu so e ŋuti gbɔ̀xue.

¹³Ye ŋutia mì nɔ̀ ŋùzɔ̃, ne mìa le mìa ɖokoewo nyuɛ̃ ɖe. Mì sɔ mìabe ŋùɖo kpata dà ɖo màje kè wo la na mì, ne Yesù Kristò vaa ji.

¹⁴Sìgbè èvi sè ètonuwo nènea, mì mu gbà na jojro kèwo ɖù mìa ji sã, lè mànya mànya mèawo ne gbà kpɔ ŋusɛ̃ ɖo mìa ji fifì ke ò.

¹⁵Àmè kè yɔ mì vaa, lè kɔ̀kɔ̀ɛ, ye ŋutia e jè be mìa cã mìa nɔ̀ kɔ̀kɔ̀ɛ lè mìabe wɔ̀na ɖe sia ɖe mè.

¹⁶Đo Ŋɔ̀ŋlɔ̃awo gblɔ̃ be: “Mì nɔ̀ kɔ̀kɔ̀ɛ, ɖo mù lè kɔ̀kɔ̀ɛ.”

¹⁷Lè mìabe kuefãwo mèa, mì yɔna Mawu, àmè kè mu sina àmè be ŋùmè ò, eye be ɖona kòjo jɔ̀jɔɛ na àmè sia àmè, so àmè sia àmè be wɔ̀nawo ŋutia, be Àta. Ekèa ŋutia, e lè be, wàlɛbɛ kè kpɔ̀tɔ̀ ne mìa nɔ̀ ànyigbã jia, mìa ɖè mìabe bùbu na ɛ̀ fiɔ, lè mìabe wɔ̀nawo mè.

¹⁸Mì nya be mu nyi klòsalò, àlo sìka kè gblenaa ye wo na ɖo mìa ta, sɔ jo mì so àgbènɔ̀nɔ màɖè àlè kè mìa tɔgbewo fiɔ mìa mè ò.

¹⁹Kristò be èhũ xɔ̀ àsìa ye wo sɔ plè mì! Kristò kèa ye wo sɔ savɔ sìgbè àlɛ̃vi kè sù blibo eye èɖi ɖe mu lè e ŋuti òa nène.

²⁰Mawu cã ɛ̀ ɖɛ, gbɔ̀xue wo ɖo xixea be dodoe, eye e ɖè e fiɔ lè àzã mlɛ̃ kèawo ji ɖo mìa ta.

²¹To e jia, mì va xɔ̀ Mawu, àmè kè fɔ̃ ɛ̀ so àmè kukuwo dòmè, eye be na ɛ̀ gogo be nɔ̀pea, ji sè fifì. Ekèa ŋuti ye mì sɔ mìabe xɔ̀sè kudo ŋùɖo ɖo Mawu ji ɖo.

²²Fifìa, mì lè mìabe èklawo ɖì, lè ètonu sèse na nyàwoa mè, na nɔ̀vi lɔ̃lɔ̃ àdodoe. Mì lɔ̃ mìa nɔ̀nɔwo, veku-veku kudo èjì kɔ̀kɔ̀ɛ.

²³Đo wo gbìgbɔ̀ jì mì. Mu nyi àgbètɔ kè kunaa ye gbìgbɔ̀ jì mì ò. Vɔ̀ bòhũa, àmè kè mu kuna gbèɖe òa ye jì mì, to Mawu be ènyà àgbè-àgbè, kè lè tɛ̀gbɛ̀a ji.

²⁴Eŋuã ŋuti ye mawunya gblɔ̃ be: “Àgbètɔwo keŋu lè sìgbè ègbe nène, eye woabe gogo keŋu lè sìgbè ègbe be èsepòpo nène. Ègbea yrɔ̀nà, eye yebe èsepòpo gɛ̃na.

²⁵Vɔ̀a Tɔhonɔ̀ be ènyàa lè tɛ̀gbɛ̀.” Ènyà kèa ye nyi àŋɛ̀nyuɛ̃ kè wo do na mìa.