Read gen 1Petrò 2 Bible Online

1Petrò 2 - gen bible

1Petrò 2

¹Mì tɔtè ènuvuɛ̃ ɖe sia ɖe wɔ̀wɔ. Àɖàŋù vuɛ̃ ɖoɖo na àmè, blamùtumùnu wɔ̀wɔ, ŋuhuã kudo àmènya gbɔ̃gblɔ̃ ne to lè mìa dòmè.

²Sìgbè vifɛ̃ hũkɔ̃ɛ̃wo nènea, mì na Gbɔ̃gbɔ̃ a be ànɔsi kè wo mu tɔ èsì òa, ne jro mì veku-veku, àleke be ne mì nù ìa, mìa teŋu sĩ kpe è, ne woa hlùɛ̃ mì gã.

³Mawunyaa gblɔ̃ be: “Mìa ŋutɔ mì ɖɔ àlekè Tɔhonɔ̀ wɔ̀nà àdɔ̀mènyuɛ̃a kpɔ.”

⁴Ye ŋutia mì dɔ̃ va Tɔhonɔ̀ gbɔ. E ye nyi èkpe àgbè-àgbè kè àmèwo gbe, vɔ̀a e nyi èkpe kè wo cã a, eye e ɖo àsì xɔ̀xɔ gã ɖe lè Mawu gbɔ.

⁵Mìa cã, sìgbè èkpe àgbè-àgbè nènea, mì sɔ mìa ɖokoe tù gbɔ̃gbɔ̃mè-xɔ̀. Èxɔ̀ kèa mè ye mì la nyi mawunɔwo be èha kɔ̀kɔ̀ɛa lè, eye mì la to Yesù Kristò ji, la wɔ̀ gbɔ̃gbɔ̃mè vɔsa, kè la jè ŋùmè na Mawu a.

⁶Đo wo ŋlɔ̀ ɖo mawunya mè be: “Kpɔɖa! Mù le ɖo koŋùjikpe cãcã xɔ̀ àsì ɖe ɖo Ziɔ̀n àmè sia àmè kè xɔ̀ ɛ̀ ji sè a, mu la ɖù ŋùkpɛ̃ ò.”

⁷Na mì, àmè kèwo xɔ̀sèa, èkpe kèa xɔ̀ àsì ŋutɔ. Vɔ̀, na àmè kèwo mu xɔ̀sè òa: “Èkpe kè èxɔ̀tùtɔwo gbea, ye va trɔ zũ koŋùjikpe.”

⁸Mawunya bu cã gblɔ̃ be e nyi: “Èkpe kè àmèwo la nɔ klɛ̃, àkpã kè la na wo la jè ànyia.” Wo jè ànyi, ɖo wo gbe be yèwo mu la wɔ̀ ɖo ènyàa ji ò. Ènu kè ɖo la jɔ̀ ɖo woa jia yeŋu.

⁹Vɔ̀ mìawo yaa, jìjimè kè Mawu cã a, ye mì nyi. Èfìɔ be mawunɔwo, dùkɔ̃ kɔ̀kɔ̀ɛ. Mì nyi àmèha kè Mawu cã a, ne mìa ɖègbèfã ènu jɔ̀ àsu kèwo be wɔ̀a. E ye yɔ mì so vìvìti mè, va yebe ŋùdã be kɔ̀kɔ̀ɛa nu.

¹⁰Mìawo kè mu nyi yebe dùkɔ̃ sã òa, fifìa, mì nyi yebe dùkɔ̃. Mìawo kè Mawu mu ku ŋuzĩzĩ na sã òa, fifìa, e ku ŋuzĩzĩ na mì.

¹¹Àmè ɖèvewo, mì àmè kèwo nyi àmèjrowo kudo èmɔzɔ̃tɔwo lè àmèjro-nyigbã jia, miabe pòpòfiɔnya ye nyi ekè: mì mu gbà wɔ̀ ɖo ŋutilã be èjro kèwo wɔ̀nà àhùa kudo èkla be èjro ji ò.

¹²Mì nɔ̀ àgbè nyuɛ̃ lè àgbàlè kèwo dòmè mì lèawo gbɔ, àleke be ne wo pò nupo so mìa ŋuti be mì nyi ènuvuɛ̃wɔ̀tɔwo ŋutɔ cã a, e yomè a woa va kpɔ èdɔ nyuɛ̃ kèwo mì wɔ̀, eye woa na gogo Mawu, gbè kè gbè be la vaa.

¹³Đo Tɔhonɔ̀ ŋutia, mì bɔ̀bɔ̀ mìa ɖokoewo ɖo àgbètɔwo be ŋusɛ̃ ɖe sia ɖe kè wo ɖo ɖo *èse nua gɔ̃mè. Mì wɔ̀ ekèa na Èfìɔ gã kè si ŋusɛ̃ lè wu àmèwo keŋuã.

¹⁴Mì bɔ̀bɔ̀ mìa ɖokoewo, nènea ke na dùjiɖùtɔ kèwo Èfìɔ gãa dɔ̃na ɖoɖa ne woa dɔ̃ èto na ènu gbegble wɔ̀tɔwo, eye woa kafu ènu jɔ̀jɔɛ wɔ̀tɔawo cã a.

¹⁵Đo Mawu be èjro ye nyi be mìa wɔ̀ ènu nyuɛ̃, àleke be sùkunɔ̀wo be ènumànya ne ze, ne wo mu gbà kpɔ ènyà ɖekpe gblɔ̃ so mìa ŋuti ò.

¹⁶Mì nɔ̀ àgbè sìgbè àblɔ̀ɖèviwo nène, eye mì mu gbà sɔ àblɔ̀ɖè kè mì kpɔa wɔ̀ ènuvuɛ̃ ò, vɔ̀ bòhũa, mì nɔ̀ àgbè sìgbè Mawu be sumɔ̃viwo nène.

¹⁷Mì na bùbu àmè sia àmè. Mì lɔ̃ nɔ̀vi xɔ̀sètɔwo keŋu. Mì vɔ̃ Mawu. Mì na bùbu Èfìɔa.

¹⁸Sumɔviwo, mì bɔ̀bɔ̀ mìa ɖokoewo na mìabe àpetɔwo, eye mì na wo bùbu blibo. Mu nyi na àpetɔ nyuɛ̃ kèwo ɖo xòmèfaa ɖèɖe kpò ò, vɔ̀ bòhũa, mì bɔ̀bɔ̀ mìa ɖokoewo na ekèwo nyi àmè nyrãkuwo cã.

¹⁹Đo ne àmè ɖe le kpe èfũ kunùtɔ̀, eye, ɖo Mawu ŋutia, e dojì sè vevea, e la kpɔ màje xɔ̀.

²⁰Ne mì wɔ̀ ènu gbegble ɖe, kè ta wo pò mì ɖo, eye mì dojì xɔ̀ pòpoa, kàfù kafu kɛ ye lè ekèa mè na mì ò? Vɔ̀, ne mì wɔ̀ ènu nyuɛ̃, vɔ̀ kpe èfũ ɖo e ta, eye mì dojì xɔ̀ ɛ̀a, màje ye ekèa nyi lè Mawu gbɔ na mì.

²¹Ènu kèa gbɔ ye Mawu yɔ mì va, ɖo Kristò cã kpe èfũ ɖo mìa ta, eye e gble yebe kpɔwɔɛ ɖɛ na mì, ne mìa to yebe àfɔ̀ tope.

²²Kristò mu wɔ̀ èvuɛ̃ ɖekpe kpɔ ò, eye àjè ɖekpe cã mu to so yebe ènu mè kpɔ ò.

²³Ekè wo zũ ìa, mu zũ àmè ɖo e tèpe ò. Wàlɛbɛ kè wo le wɔ̀ fùnya fùnya ku ìa, mu do ŋɔji na àmè ɖe ò, vɔ̀ bòhũa, e dojì ɖo Mawu, àmè kè ɖona kòjo jɔ̀jɔɛa ŋuti.

²⁴Kristò ŋutɔ sɔ miabe èvuɛ̃wo ɖo yebe ŋutilã mè yì àtisògaa ŋuti. E wɔ̀ ekèa, àleke be mia ku na èvuɛ̃, eye mia nɔ̀ àgbè sɔ wɔ̀ ènu jɔ̀jɔɛ. Eye to yebe àbìwo jia, mì kpɔ èdɔ yɔ̀yɔ.

²⁵Đo, nyàwo ye be nyi be mì trã èmɔ sãa, le dã sìgbè àlɛ̃wo nène. Vɔ̀ fifìa, mì trɔva mìabe èklawo be kplɔ̀tɔ kudo woa ji kpɔtɔa gbɔ.