Read gen 1Petrò 3 Bible Online

1Petrò 3 - gen bible

1Petrò 3

¹Mìa nyɔ̃nùwo cã, mì bɔ̀bɔ̀ mìa ɖokoewo na mìa srɔ̃wo, àleke be, ne àmè ɖewo lè woa dòmè kèwo mu xɔ̀ Mawu be ènyà sè òa, mìabe àgbè nyuɛ̃ nɔ̀nɔ ne trɔ wo, ne woa xɔ̀ Mawu ji sè. Mu la hiã be mìa kè ènu sɔ gblɔ̃ ènyà ɖe ŋutɔ cã ò,

²ɖo ne mì do bùbu mìa ɖokoewo ŋuti, eye mì nɔ̀ àgbè kɔ̀kɔ̀ɛa, e la wɔ̀ èdɔ ɖo mìa srɔ̃wo ji.

³Mìabe àcɔ ɖoɖo mu gbà nyi ènu kè la ze lè ŋùkuta kpò, sìgbè èɖà pòpo, sìkanuwo ku àwù xɔ̀ àsìwo dodo nène ò.

⁴Vɔ̀a ne nyi ekè so mìabe èjì mè, àcɔ ɖoɖo mà-gble mà-gble, gbɔ̃gbɔ̃ kè fa kpoo a be àcɔ, nyi ènu xɔ̀ àsì gã ɖe lè Mawu be ŋùmè.

⁵Lè blèmà mè a, nène a ye nyɔ̃nù kɔ̀kɔ̀ɛ kèwo dojì ɖo Mawu ŋutiawo bɔ̀bɔ̀nà woa ɖokoewo na woa srɔ̃wo, eye be nyi àcɔ ye wo ɖona na woa ɖokoewo.

⁶Nène a ye Sarà cã bɔ̀bɔ̀ ye ɖokoe na Abràham, eye be yɔna ɛ̀ be, “Tɔhonɔ̀ nyè.” Sarà be èvi-nyɔ̃nùwo mìawo cã mì nyi fifì, ekè mì le wɔ̀ ènu jɔ̀jɔɛ, eye mì mu le na ènu ɖekpe le do vɔ̃vɔ̃ na mì ò.

⁷Mìa ŋusùwo cã a, mì nɔ̀ èdu ku mìa srɔ̃wo. Mìa nɔ ɖoŋù be nyɔ̃nù ye wo nyi, ŋusɛ̃ mu lè woa si ò. Mì nɔ bù wo, ɖo mìa kudo wo ye Mawu la na àgbè jɔ̀ àgbè a. Mì nɔ wɔ̀ ekèa ne ènu ɖekpe mu gbà xe èmɔ na mìabe kuefãwo ò.

⁸Mɛmlɛ̃ nua, mìa kpata mìabe susu ne nɔ̀ ɖèka; àmè be ènu ne wɔ̀ ŋuzĩzĩ na mì; mì lɔ̃ mìa nɔ̀nɔwo sìgbè nɔ̀viwo nène; mì kpɔ ɖo e mè na àmè, eye mìa nɔ bɔ̀bɔ̀ mìa ɖokoewo.

⁹Ne wo wɔ̀ èvuɛ̃ ɖo àmè ɖe ŋutia, mu gbà ɖo e tèpe ò. Ne wo zũ àmè ɖe cã a, mu gbà zũ àmè ɖo e tèpe ò. Mì biɔ *sìtu na wo bòhũ, ɖo wo yɔ mì be mìa va kpɔ gomè lè *sìtu mè.

¹⁰Ŋɔ̀ŋlɔ̃ a gblɔ̃ be: “Àmè sia àmè kè jro be yèa nɔ̀ àgbè, la sè vivi, eye yèa ɖo àgbè-zã nyuɛ̃woa, mu gbà gblɔ̃ àmè-nya ò, eye mu gbà ɖà àjè ò.

¹¹Ne tɔtè èvuɛ̃ wɔ̀wɔ, ne bèa wɔ̀ ènyuɛ̃. Ne ji ŋuti fàfa, eye bèa jè e yomè.

¹²Đo Tɔhonɔ̀ be ŋùkuvi lè ènu jɔ̀jɔɛwɔ̀tɔwo ji eye e sɔ̀gbè la ɖo èto woabe kuefãwo. Vɔ̀a, Tɔhonɔ̀ sinatè ɖo èvuɛ̃wɔ̀tɔwo ŋuti.”

¹³Ne mì sɔ vevedodo wɔ̀nà ènu nyuɛ̃a, àmè kɛ ye la wɔ̀ èvuɛ̃ ɖo mìa ŋuti ò?

¹⁴Vɔ̀a, ne e hĩa, eye mì ɖù àyà ɖo jɔ̀jɔɛwɔ̀wɔ ta ŋutɔ cã a, Mawu tusì na mì. Mì mu gbà vɔ̃ àgbètɔwo ò, eye mì mu gbà titɔ cã ò.

¹⁵Mì sɔ bùbu na Kristò lè èjì mè, sìgbè mìabe Tɔhonɔ̀ nène. Mì nɔ̀ klalò, wè sia wè, la ɖo ènyà ŋuti na àmè sia àmè kè la biɔ mì ènyà so ŋùɖo kè lè mìa sia ŋuti.

¹⁶Vɔ̀a, mì wɔ̀ ɛ̀ ku bùbu kudo fàfa. Mì na mìabe *jìjigbè ne vò, àleke be ne wo zũ mìa, èŋù bèa kpɛ̃ àmè kèwo gblɔ̃nà ènyà kpòtoe so nɔ̀nɔmè nyuɛ̃, kè lè mìa si lè èkàdodo ku Kristò mèa ŋuti.

¹⁷Đo, ne e nyi Mawu be èjroa, e nyɔ be àmè ne ɖù àyà ɖo jɔ̀jɔɛwɔ̀wɔ ta, wu be, bèa ɖù àyà ɖo èvuɛ̃ wɔ̀wɔ ta.

¹⁸Nyàwo be nyi be Kristò ŋutɔ kpe èfũ[1] ɖo àmèwo be èvuɛ̃wo ta, zè ɖèka kpò, ɖo hùenuwo keŋu nu. Eye kè nyi àmè jɔ̀jɔɛa, ku ɖo ènu màjɔ̀ màjɔ wɔ̀tɔwo ta, ne bèa teŋu kplɔ̀ mì yì Mawu gbɔ. Đo, lè ŋutilã tɔ̀ gomèa, wo wù ì, vɔ̀a Gbɔ̃gbɔ̃ a gbɔ ɛ̀ àgbè.

¹⁹To Gbɔ̃gbɔ̃ Kɔ̀kɔ̀ɛ a jia, e yì do àŋɛ̀nyuɛ̃ a na àmèkuku kèwo be èklawo lè ègàkpa mèa.

²⁰Àmè kuku kèawo ye nyi àmè kèwo mu ɖo èto Mawu sã ò, wàlɛbɛ kè be le gbɔ̃ èji ɖɛ blɛ̀wùa. Wàlɛbɛ ŋua ye Nɔa le kpà àɖakàhũa. Eye àmè ènyi pɛɛ kpò ye ɖo àɖakàhũa mè, eye wo hlùɛ̃ wo gã to èsìɖɔɖɔa mè.

²¹Mawusilèle sɔ̀ kudo èsìɖɔɖɔ kèa, eye, e ye le hlùɛ̃ mì gã fifìa. Mu nyi èɖi kɔklɔ jo lè àmè ŋuti be èsì be nyi ò. Vɔ̀ bòhũa, e nyi kuku ɖèɖe na Mawu, ne bèa na àmè be *jìjigbè ne vò. Mawusilèle hlùɛ̃ mì gã to Yesù Kristò be fɔ̃fɔ̃ so èku mè.

²²E yì jiŋùkusi, eye e lè Mawu be ɖùsi mè, lè àtikplɔtɔwo, jiɖùɖuwo ku ŋusɛ̃ kèwo lè jiŋùkusiawo nu.