Read gen 1Petrò 4 Bible Online

1Petrò 4 - gen bible

1Petrò 4

¹Ye ŋutia, ekè Kristò ɖù àyà lè ŋùtilã mèa, mìawo cã, mì ɖo ètamè sìgbè Kristò nène, ne mìa sɔ do ŋusɛ̃ mìa ɖokoewo, ɖo àmè sia àmè kè ɖù àyà lè ŋùtilã mèa, mu gbà wɔ̀nà èvuɛ̃ ò.

²Nène a, so fifì kaka sɔ yìa, mì nɔ̀ àgbè ɖo Mawu be èjro ji, mu nyi ɖo ènu kè jrona àgbètɔa ji ò.

³Hùenu kèwo mè mì to, nɔ̀ àgbè, wɔ̀ ènu kèwo àgbàlèwo wɔ̀nàa dìdì. Ènu kèwo be àgbè mì nɔ̀ va yìawo ye nyi: èdɛ̃ vuɛ̃ wùwu, wɔ̀wɔ ɖo ènu kèwo jrona àmèawo ji, àhàmumu, ènusuɖùɖu, àhàsunùnu kudo vòdu sɛ̃sɛ̃ fìtì fìtì.

⁴Fifìa e wɔ̀ ŋùdã na wo be mì mu gbà le zɔ̃ ku wo, le nɔ̀ àgbè yàkà, ŋɔjitɔ̀ ò. Ye ŋutia, wo le zũ mì.

⁵Vɔ̀a, wo la va na àkɔ̃ŋùta, àmè kè sɔ̀gbè la ɖo kòjo na àmè àgbè-àgbèwo ku àmè kukuwo.

⁶Ekèa ŋuti wo do àŋɛ̀nyuɛ̃ a na àmè kukuwo cã ɖo. Àleke be, togbɔ be wo ɖo kòjo na wo so woabe àgbè nɔ̀nɔ ŋuti vɔ̀ cã a, èmɔnukpɔkpɔ sù woa si fifì, be woa nɔ̀ àgbè to Mawu be Gbɔ̃gbɔ̃ ji.

⁷Ènuwo keŋu be ènuwuwu ɖo vɔ̀. Ye ŋutia mì nɔ̀ àlɔ̀ji, eye mì le mìa ɖokoewo nyuɛ̃ ɖe, ne mìa teŋu fãkue.

⁸Wu ènu kèawo keŋuã, mì lɔ̃ mìa nɔ̀nɔwo veku-veku, ɖo lɔ̃lɔ̃ cɔ̃na ènu èvuɛ̃ sùgbɔ kèwo àmè wɔ̀nàawo ji.

⁹Mì xɔ̀ mìa nɔ̀nɔwo àmèjro, lihũi mà li.

¹⁰Mìa dòmètɔ ɖe sia ɖe ne sɔ yebe ènu nana tɔ̀xɛ kè be xɔ̀ so Mawu gbɔa kpe ɖo mìa nɔ̀nɔwo ŋuti. Sìgbè ènujikpɔtɔ nyuɛ̃ kèwo le kpɔ ènu nana hamè-hamèwo ji na Mawu nènea, mì wɔ̀ ènu nana kèawo ŋuti dɔ, ne woa ɖè àlè na mìa nɔ̀nɔwo.

¹¹Ne àmè ɖe le gblɔ̃ mawunyaa, ne gblɔ̃ ɛ̀ sìgbè àmè kè Mawu do ègbè àsi na be ne gblɔ̃ na àmèwo nène. Ne àmè ɖe le wɔ̀ sùmɔ̀ sumɔ dɔa, ne sɔ ŋusɛ̃ kè Mawu sɔ na ɛ̀a wɔ̀ ɛ̀, àleke be, lè ènuwo keŋu mèa, woa na gogo Mawu to Yesù Kristò ji. Àmè kè tɔ̀ ye nyi bùbu ku ŋusɛ̃ kaka sɔ yì. * Àmèn.

¹²Àmè ɖèvewo, wo le do mì kpɔ, eye mì le kpe èfũ, le sè veve kaɖi kaɖi. Ekèa mu gbà dãŋù do mì, sìgbè ènu kè mu sɔ̀gbè òa nène ò.

¹³Mì kpɔ jìjɔɛ be yèwo cã yèwo le kpe èfũ sìgbè Kristò nène, àleke be ne e ze lè gogo mèa, mìa cã mìa teŋu kpɔ jìjɔɛ, la sò àyo.

¹⁴Ne àmèwo zũ mì, ekè mì nyi Kristò yomè jètɔwo ŋutia, mì kpɔ jìjɔɛ, ɖo Mawu be gogo be Gbɔ̃gbɔ̃ a lè mìa ji.

¹⁵Vɔ̀a àmè ɖekpe mu gbà ɖù àyà lè mìa dòmè sìgbè èhlɔ̃dãtɔ, fìãfìtɔ, ènu gbegble wɔ̀tɔ, àlo àmè kè dona ènu ènyà kè mu kã ɛ̀ òa mè nène ò.

¹⁶Sĩ vɔ̀a, ne mìa dòmètɔ ɖe ɖù àyà, ɖo, e nyi Kristòtɔ̀ ŋutia, mu gbà wɔ̀ ŋùkpɛ̃ na ɛ̀ ò, vɔ̀ bòhũa, ne na gogo Mawu ɖo Kristò be nyikɔ ŋuti.

¹⁷Kòjoɖoɖo be hùenua sù fifìa vɔ̀, eye wo la tɔ e ji so Mawu be àxomètɔwo ji. Ne wo tɔ e ji so mia jia, leke e la va nɔ̀ ɖo na àmè kèwo mu xɔ̀ Mawu be àŋɛ̀nyuɛ̃ a ji sè ò?

¹⁸Mawunya gblɔ̃ be: “Ne e nyi be e sɛ̃ŋu, gbɔ̀xue wo la hlùɛ̃ ènu jɔ̀jɔɛwɔ̀tɔ gãa, leke be la nɔ̀ na àmè màvɔ̃ Mawu kudo èvuɛ̃wɔ̀tɔ ɖo ò?”

¹⁹Ye ŋutia àmè kèwo ɖùnà àyà, sìgbè lekè Mawu jro a nènea, wo ne wɔ̀ ènu jɔ̀jɔɛ, eye wo ne sɔ woabe èkla do àsi na woabe Đotɔ, àmè kè wɔ̀nà ànùkuaa.